Marki 1 - U TIENU MAAMA TILI 2013

Jesu tuonli Galile diema nni 1—9 Jan Batisi mawangima

¹ U Tienu Bijua Jesu Kilisiti Laabaaliŋamo cilima.

² Nani lan diani maama o saawalipualo Esayi tili nni: «Cengi, n soani n tondo a liiga, Ke wan bogini a sanu.

³ Li tie yua n kpaani mi fanpienma nni ki tua: ‹Yin bogini mani o Diedo sanu, Ki naadi mani o sani.› »

⁴ Lani n tie Jan yua n den cua ki batisi bi niba mi fanpienma nni, ki wangi ba yaa maama n tie ne: «Yin lebidi yi pala ki cua min batisi yi. Yeni, U Tienu baa pa yi sugili yi tuonbiadi po.»

⁵ Jude diema yaaba leni Jerusalemi dogu yaaba boncianla den kpendi Jan kani. Bi den tuodi ki doagidi bi tuonbiadi, ke Jan batisi ba Jurden kpenu nni.

⁶ Jan den la ti yuoyuokobidi tiadi, ki ñaagi ku gbanñagidigu, ki di i naaci leni ku muagu nni siadi.

⁷ O den wangi yaa maama n tie ne: «Toa ŋua n puoli ki pia u paalu ki cie nni. Mii pundi ba yua n baa gbaani ki lodi o cacaadi.

⁸ Mini, n batisi yi leni mi ñima, ama wani n baa batisi yi leni U Tienu Fuoma Yua.»

Jan batisi Jesu

⁹ Lanyogunu Jesu den ñani Nasareti Galile diema nni, ki cua Jan kani ke o den batisi o Jurden kpenu nni.

¹⁰ Jesu n den ña mi ñima nni yaa yogunu, o den laa ke tanpoli luodi, ke U Tienu Fuoma Yua ñani lipo ki ji nani ki kpaajiega yeni, ki ti jagini o po.

¹¹ Bi den gbadi ke u nialu maadi tanpoli po ki yedi: «A tie n Bibuadiga, n pali mani a po hali boncianla.»

Sutaani tulini Jesu

¹² Lanyogunu, U Tienu Fuoma Yua den tudi ki gedini Jesu mi fanpienma nni.

¹³ O den ye lipo leni ti fuayandi, ki tieni dana piinaa ke Sutaani tulini o. Malekinba den tuuni o po.

Jesu cili o tuonli Galile diema nni

¹⁴ Ban den cuo Jan ki kuani o li kpaadidieli nni ke li pende, ke Jesu den gedi Galile ki ban wangi U Tienu Laabaaliŋamo,

¹⁵ ki tua: «U yogunu pundi, U Tienu diema yogunu nagini. Yin lebidi ki tuo o Laabaaliŋamo.»

Jesu yini jankpaanbinaa ke bi ŋoadi o

¹⁶ Jesu n den balini Galile ñincianma, o den laa Simon leni o waalo Andre, ke bi lu i taali mi ñincianma nni. Bi den tie jankpaanba.

¹⁷ Jesu den yedi ba: «Ŋoadi mani nni, n baa teni yin yaa lingi bi niba.»

¹⁸ Lanyogunu liga, bi den ŋaa bi taali ki ŋoadi o.

¹⁹ Wan den suagi liiga waamu, o go den laa Sebede bijaliediba, Jaki leni o waalo Jan, ke bi ye ku ñinbiagu nni ki ŋanbidi bi taali.

²⁰ Jesu n den laa ba yaa yogunu, o den yini ba, ke bi ŋaa bi baa leni bi tuonsoanba ku ñinbiagu nni, ki ŋoadi o.

Jesu paagi ki cicibiadiga n ye yua yaa niinni

²¹ Jesu leni o ŋoadikaaba den gedi Kafarnawum dogu nni. Mi fuodima daali n pundi, Jesu den kua li bali maama bangima dieli nni, ki bangi yaaba n taani lienni.

²² O bangima den paki ba, kelima o den bangi leni li bali, waa den bangi nani li bali maama banda yeni ka.

²³ Lanyogunu ki cicibiadiga n den ye yaa joa yaa niinni den kua li bali maama bangima dieli yeni niinni, ki tiani:

²⁴ «Ŋain, fini Jesu, Nasareti yua, be n ye tinba leni fini siiga? A cua ki baa bolini ti yo? N bani ŋan tie yua. A tie U Tienu Nigagidiŋamo.»

²⁵ Jesu den funi leni ga ki yedi: «Suoni ki ña o joa na niinni.»

²⁶ Ki cicibiadiga den guli o joa yeni ke o digibi. Lani, ki den tiani boncianla ki ñani o niinni.

²⁷ Li den paki yaaba n ye likani kuli, ke bi buali biyaba: «Line tie be? Li tie bangipanma. O maadi leni li bali ki tendi ke ba mu cicibiadimu tiendi wan yedi yaala.»

²⁸ Lanyogunu o yeli den ñani Galile diema nni kuli.

Jesu paagi a yiama boncianla

²⁹ Jesu den ñani li bali maama bangima dieli nni, ki yegi leni Jaki leni Jan ki gedi Simon leni Andre denpo.

³⁰ Li den sua ke Simon cuadinaa dua, kelima o den pia ti gbananbiendi. Bi den jaligi ki waani Jesu.

³¹ O den nagini o kani ki cuo o nuu ki fiini o. Lanyogunu o gbananbiendi den kagidi o po, ke o fii ki gaa bi cangu.

³² Ku yenjuagu, u yienu n den kua yaa yogunu, bi niba den cuani Jesu kani a yiama leni mu cicibiadimu n ye yaaba yaa niinni kuli.

³³ U dogu nni yaaba den taani Simon buliñoabu kani.

³⁴ Jesu den paagi yaa niba n yabi leni ban den pia yaa yianbuoli kuli, ki deli mu cicibiadimu boncianla ki ñani mu mun ye yaaba yaa niinni. Waa den tuo ke mu cicibiadimu n maadi, kelima mu den bani wan tie yua.

Jesu gedi kaantoe ki ban wangi o Laabaaliŋamo

³⁵ Jesu den yagidi ki fii ke li daa faa, ki ñani ki gedi naani n foagi leni bi niba n ye naani, ki ban jaandi.

³⁶ Simon leni yaaba n den ye leni o den fii ki lingi o.

³⁷ Ban den laa o, bi den yedi o: «Bi niba kuli lingi a.»

³⁸ O den guani ki yedi ba: «Tin suagi mani liiga ki gedi a dobila nni, min ban waani o Laabaaliŋamo maama lanpo moko, kelima n den cua lani yaa po yo.»

³⁹ O den goadi Galile diema nni kuli, ki koa li bali maama bangima diena nni, ki wangi U Tienu maama, ki go deli mu cicibiadimu, ki ñandi mu mun ye yaaba yaa niinni.

Jesu paagi o gbaado

⁴⁰ O gbaado den cua o kani ki gbaani ki mia o ki yedi: «A yaa bua, a baa fidi ki ŋanbi nni.»

⁴¹ Mi ninñima den cuo Jesu o po, ke o tandi o nuu ki sii o ki yedi o: «N bua, ŋanbi.»

⁴² Lanyogunu mi gbaadima den gbeni o po, ke o ŋanbi.

⁴³ Lanyogunu goga Jesu den cabi o, ki maadi leni o leni li bali,

⁴⁴ ki yedi: «Fangi a yuli, ki da yedi niloba liba, ama gedi o kopadiciamo kani, wan ban le ŋa. Ŋan padi Musa n den bili yaa padili buolu a ŋanbima po, lan tua bi po siedi ke a ŋanbi.»

⁴⁵ Ama o joa yeni den gedi ki ban goadi ki wangi Jesu n tieni o po yaala kuli, hali ke li teni ke Jesu ki go den fidi ki kua doguba niinni, ke bi niba bani. O den se li fuali nni ke bi niba ña i kaani kuli ki kpendi o kani.