Malaki 3 - U TIENU MAAMA TILI 2013

¹ O Diedo U Paaciamu Kuli Daano n guani yi yaala tie line: «N baa soani n tondo, ke wan kua liiga ki ŋanbi n po u sanu. Lanyogunu, yin lingi o Diedo yua yeni baa ludi ki cua o diegu nni. Diidi, min den kuani leni yi yaa ŋantaado yeni tondo nne. Wani n kpendi yeni!» Li Miali Diedo U Paaciamu Kuli Daano n yedi yeni.

² Ŋme n baa fidi ki yaa ye o cuama daali? Ŋme n baa fidi ki sedi o yaa doagidi yaa yogunu? O baa yaa tie nani ban duadi ti kudi leni yaa mu yeni. O baa yaa tie nani a tiaŋuuda ciebu yeni.

³ O baa kali u maafanu nni nani yua duadi ŋanjilifa yeni. O baa ŋanbi Levi puoliŋuani, ki ñani bi po bi joagindi, nani ban ñandi wula leni ŋanjilifa Joagindi maama yeni. Yeni, bi go baa fidi ki padi yaa pada n tiegi o Diedo po.

⁴ Juda yaaba leni Jerusalemi yaaba n baa yaa kpendinni o Diedo po yaa pada baa yaa mani o po, nani lan den kpa tie maama hali yogu, puoli po bina nni.

⁵ Li Miali Diedo U Paaciamu Kuli Daano yedi: «N baa cua yi siiga ki jia ti buudi. N baa taa a lingida leni mi conconma danba tagili. N baa fii ki sedi yaaba n polini ki pua mi faama leni yaaba n mabindi bi tuonsoanba kaa pa ba bi ligi po. N baa fu leni yaaba n faligidi a kpepuona, a kpienbila leni bi canba.»

Guani mani o Diedo kani

⁶ U Paaciamu Kuli Daano go yedi: «N tie Li Miali Diedo, n kan lebidi, die yinba wani li tie Jakob puoliŋuani yo.

⁷ Hali yi yaajanba yogunu, yi yaadi ki ŋaa n ñoamabona, kaa tiendi ŋan bili yaala. Lebidi mani ki guani n kani, nmo baa lebidi ki guani yi kani. Li Miali Diedo U Paaciamu Kuli Daano n yedi yeni. Ama yi tua: ‹Ti baa lebidi ki guani a kani lede?›

⁸ Nmo buali yi line: ‹Naani o nisaalo baa fidi ki janbi U Tienu? Ama yi janbidi nni,› ki nan go tua: ‹Ti tieni be ki janbi a?› Yi janbidi nni yi diim leni yi paabu kane.

⁹ Ti solindi ŋua yi kelima yi janbidi nni, yinba Isidayeli nibuoli kuli.

¹⁰ Lanwani, yaa kpendinni mani yi diim kuli n ŋalimandiegu nni, ke li bonjekaala n yaa ye n diegu nni. Tieni mani yeni ki biigi nni yogunu kuli, ki le n yaa kan luodi yi po tanpoli bona, ki teni li seli n jiidi yi po hali ki yabidi ki kandi. Li Miali Diedo U Paaciamu Kuli Daano n yedi yeni.

¹¹ N kan tuo a bonfuoda n bolini yi bonbulikaala. Yi duventiidi baa luoni boncianla. Li Miali Diedo U Paaciamu Kuli Daano n yedi yeni.

¹² I nilanbuoli kuli baa yaa tua ke yi ye leni li pamanli, kelima yi diema baa yaa tie yaa kaanu n ŋani boncianla. Li Miali Diedo U Paaciamu Kuli Daano n yedi yeni.»

U Tienu n baa doagidi o teginma yaa daali

¹³ O Diedo yedi: «Yi maadi n po mi mapaama, ki nan tua: ‹Ti maadi a po be?›

¹⁴ Yi yedi: ‹Ki yaa tuuni U Tienu po tie duolikuomi bebe, ti den kubi o ñoamabona, ki go biidi ti pala ti bontienkaala po, wani Li Miali Diedo U Paaciamu kuli Daano nintuali, ama ti baa be lani kuli nni?

¹⁵ Moala, ti kpaagi ki sua ke bi japaadanba n ye leni mi yemanma, ke li bonla kuli cuoni ti tuonbiadi danba po, ba bi yaa biigi U Tienu leni bi tuonbiada, liba kuli ki yen tieni ba.› »

¹⁶ Lanwani, yaaba n fangi o Diedo Den maadi leni biyaba, ke o Diedo cengi ki gbadi ban yedi yaala. Bani yaaba n fangi o ki kpiagidi o yeli yeni kuli, o den teni ke bi diani bi yela li tili nni.

¹⁷ Li Miali Diedo U Paaciamu Kuli Daano yedi: «Min baa doagidi n paalu yaa daali, laa niba kuli baa tua n yaa niba, ki yaa tie mini n ba cele yaa niba. N baa gbadi bi po mi ninñima, nani o nilo n gba o bijua yua n tuuni o po ninñima maama.

¹⁸ Lani, yi baa le yaa paadima n ye bi niteginkaaba leni bi nibiadiba siiga. Yi baa le yaa paadima n ye yaaba n tuuni U Tienu po leni yaaba n ki tuuni o po siiga.»

U Tienu pabienli daali kpendi

¹⁹ Li Miali Diedo U Paaciamu Kuli Daano yedi: «N pabienli daali kpendi, ki naani leni yaa buaga n tongi hali ki moandi. Bi japaadanba leni bi nibiadiba baa buodi nani mi muayoma yeni. Landaali, bi baa buodi cain, puu kuli kan sieni bi kani.

²⁰ Ama yinba yaaba n fangi n yeli wani yaa po, mi teginma yienu baa pudi ki cuani mi paagima. Yi baa ña ki yaa yugi ki ciini nani a naabiwubida yeni.

²¹ Min baa doagidi n paalu yaa daali yeni, yi baa ŋmaa ki midi bi nibiadiba. Bi baa yaa tie nani mi fantanpienma yeni yi taana tiipo. Li Miali Diedo U Paaciamu Kuli Daano n yedi yeni.»

Eli baa guani ki cua

²² O Diedo go yedi: «Yin tiadi mani n naacemo Musa bali maama po, min den teni o n ñoamabona leni n mabilikaama yaama yinba Isidayeli yaaba kuli po, Horebi juali kani.

²³ Hali ke o Diedo daali, li dacianli yaali n pia i jeje yeni daa cua, n baa soani n saawalipualo Eli yi kani.

²⁴ O baa teni bibaanba leni bi bila n go yaa pia yanyenma. Lani, n kan ti cua ki bolini yi diema.»