Malaki 2 - U TIENU MAAMA TILI 2013

Bi kopadicianba n fangi bi yula

¹ Li Miali Diedo U Paaciamu Kuli Daano yedi: «Moala, yaa ñoamabonli n tie ne bili yinba bi kopadicianba po.

² Yi yàá teni ke yi bontienkaala kpiagidi n yeli, kaa cengi min yedi yaala, kaa kuani la yi pala nni, n baa soli yi bonbaakaala. Ba moala n soli la, kelima yii kuani n bali maama yi pala nni.

³ N baa waani yi puoliŋuani fala. N baa taa yin padi yaa yandi mi jaanma yogunu pobindi, ki madi yi nunmu nni. Bi baa taani ki tugi yinba leni tini kuli.

⁴ Lani, yi baa bandi ke n bili yi po laa ñoamabonli, ki bua ke min den kuani yaa ŋantaado leni Levi buolu n yaa ye. Li Miali Diedo U Paaciamu Kuli Daano n yedi yeni.

⁵ N den puni ba li miali leni mi yanduanma laa ŋantaado nni. N den bangi ba li fangili. Bi den fangi n yeli, ki digibi n nintuali.

⁶ Bi den bangi yaa bangima n tiegi, faama ki den ye bi ñoana nni. Bi den cuoni n nintuali leni mi yanduanma leni mi teginma, ki pegidi ki ñandi niba boncianla mi biadima sanu nni.

⁷ O kopadiciamo tuonli n tie ki bangi bi niba. Bi niba baa buali wane li bali maama, kelima wani n tie Li Miali Diedo U Paaciamu Kuli Daano tondo.

⁸ Ama yinba wani nan jadi ki ŋaa u sanu. Yi guli niba boncianla leni yi bangima. Yi miidi min den kuani yaa ŋantaado leni Levi buolu. Li Miali Diedo U Paaciamu Kuli Daano n yedi yeni.

⁹ Lani n teni ke n baa cedi Isidayeli yaaba kuli n yie yi ki fali yi, kelima yii tuo ki ŋua n sani, ki go pia u nigagidu mo, yin kuandi n bali maama yaa yogunu.»

Bonlilie nne ke Isidayeli yaaba tudi bi Tienu po

¹⁰ Naani tikuli ki pia baayendo ka? Naani U Tienyendu yeni ka tagi tikuli? Lanwani, be yaa po ke ti nan janbidi ti lieba, ki biidi U Tienu n kuani yaa ŋantaado leni ti yaajanba?

¹¹ Juda fidi ban den niani yaa ñoanianu. Bi soani Jerusalemi nni leni Isidayeli diema nni kuli yaa tuonli n gundi, kelima bi biidi U Tienu diegu, wan bua kuni yaagu bonŋanla yeni. Bi taa bi puoba, yaa nibuoli n ŋua i buli yeni siiga.

¹² O Diedo n ñani Jakob puoliŋuani siiga, yaaba n tieni laa bonla, ki da go li tuo laa niba buolu n taani leni ti diema yaaba ki padi a pada Li Miali Diedo, U Paaciamu Kuli Daano po.

¹³ Bontoala go ye ke yi tiendi la. Yi mua ki ñiidi, hali ke yi nunsiidi milini U Tienu padibinbinli, kelima waa go nua ki faadi yi pada, kaa go tuo ki gaani liba kuli yi nuu nni mo.

¹⁴ Yi buali yaala yaa po ke li tie yeni. Li tie ke o Diedo tie siedi fini leni a jawaapua siiga. A janbi ŋan den niani wani yua u ñoanianu, ke a baa yaa ye leni o.

¹⁵ Naani U Tienu ki den teni ke yi siiga yuakuli leni o pua tua gbananyendi leni yanyenma ka? Be yaa po ke o tieni la? Li tie ke o Diedo bua yi bila n yaa tie U Tienu niba moamoane. Lanwani, fangi mani yi yula. Oba kuli yi siiga n da janbi o jawaapua.

¹⁶ Li Miali Diedo, Isidayeli Tienu, U Paaciamu Kuli Daano yedi: «N nani li puoñanli leni yi siiga yua n tieni o pua laa tugumoangu. Lanwani, fangi mani yi yula, ke oba kuli yi siiga n da janbi o pua.»

U Tienu bujiali leni o ninñingbadima 2.17—3.24 O Diedo baa soani o tondo

¹⁷ Yi coagini o Diedo leni yi macianma, ki nan go tua: «Ti coagini o leni be?» Li tie ke yi ŋua ki tua ke yua n tiendi mi biadima tiegi o Diedo nintuali, ke o Diedo pali mani laa nibuolu po yo. Yi go tua: «Yaa Tienu n tiegi yeni nan ye le?»