Malaki 1 - U TIENU MAAMA TILI 2013

Isidayeli yaaba tuonbiadi 1.1—2.16

¹ O Diedo n den teni ke Malaki soagini o maama yaama Isidayeli yaaba po.

O Diedo gandi Isidayeli

² O Diedo yedi: «N bua yinba Isidayeli yaaba. Ama yi tua: ‹Be n doagidi ke a bua ti?› » O Diedo guani ki yedi: «Naani Esayu leni Jakob ki den tie naataani ka? Ama n den bua Jakob,

³ ki nani Esayu. N den bolini Esayu diema, yaama n den ye a juana nni, ki teni ke i tanboe diedi ma, ke mi tua fanpienma.

⁴ Edomi yaaba, Esayu puoliŋuani yeni tua ke bi yaa bolini bi dogi, bi go baa guani ki maa yi. Bi yaa guani ki maa yi, Mini Li Miali Diedo U Paaciamu Kuli Daano didi baa guani ki bolini yi. Bi niba baa yaa yi bi diema: “Mi biadima diema,” bani mi niba mo, bi baa yaa yi ba: “O Diedo pali n be yaa nibuolu po yogunu kuli.”

⁵ Yi nuni baa le lani kuli, yin yaa tua: ‹O Diedo pia u paalu ba leni Isidayeli diema kandima kuli po.› »

U Tienu fu leni bi kopadicianba

⁶ Li Miali Diedo U Paaciamu Kuli Daano yedi: «Ki biga jigindi o baa, O naacemo mo kpiagidi o canbaa. N yaa tie yi Baa, min pundi ki baa yaa jigidi yeni ye le? N yaa tie yi Canbaa, min pundi ki baa yaa kpiagidi yeni ye le? Yinba bi kopadicianba n fali n yeli ki nan tua: ‹Ti fali a yeli lede?›

⁷ Yi kpendinni n padibinbinli po, yaa pienma n joagini, ki nan go tua: ‹Ti tudi a po lede?› Yi tudima n tie ke yii pia fangili n padibinbinli po.

⁸ Naani yin yen cuani ki yanjuanga li padili po yeni, li tiegi? Naani yin yen cuani yaa yanga duugi, bi yanyianga yeni, li ŋani? Naani yi baa taa laa yanga ki ban pa guveneeri? Yi yaa tieni yeni, naani o baa gaa yi cangu leni ki nunmanga?

⁹ Lanwani, yinba bi kopadicianba, biigi mani moala ke yi baa mia yi Tienu, ke wan gbadi yi po mi ninñima. Naani yi bontienkaala baa tuo wan mangi o nunga yi po? Li Miali Diedo U Paaciamu Kuli Daano n yedi yeni.»

¹⁰ Li Miali Diedo U Paaciamu Kuli Daano go yedi: «Li baa yaa ŋani ki cie yinba bi kopadicianba po, yi siiga nni yendo n luoni n diegu buliñoana, ke yin da go cuondi n padibinbinli po u mu fanma fanma. N pali ki mani yi po ba waamu. Mii go bua ki gaa yi nuu nni padiliba kuli mo.

¹¹ Ki cili hali u yienu n pudi naani, ki ban tuoni hali wun baali naani, i nibuoli kuli kpiagidi n yeli. I kaani kuli bi niba padi ki siagi n yeli po a dugibila. Bi go padi yaa pada n ŋani ki dagidi n yeli po, ki kpiagidi n yeli. I nibuoli kuli kpiagidi n yeli. Li Miali Diedo U Paaciamu Kuli Daano n yedi yeni.

¹² Ama yinba, Isidayeli yaaba fali n yeli yeni, ki tua ke o Diedo padibinbinli joagini, ki go tua tin baadi likani yaa padijiedi naa tie puu.

¹³ Yi go tua ke yi baga ki ye leni li padibinbinli tuonli kelima li pia li coagili. Li Miali Diedo U Paaciamu Kuli Daano yedi: ‹Yi kpendinni ti yansukaadi, yaadi n duugi leni ti yanyiandi, ki padi n po. Naani n baa gaa laa paabu yi kani?› O Diedo n yedi yeni.

¹⁴ U nufanu n pua yua n pia o yankulu nni ki yantonga, ki niani ke o baa padi ka o Diedo po, ama ki nan kandi ki ŋaa kani ki taa ki yanyianga ki padi. Bandi mani ke mini Li Miali Diedo U Paaciamu Kuli Daano tie Badiciamoe. I nibuoli kuli fangi n yeli.»