Luki 9 - U TIENU MAAMA TILI 2013

Jesu soani o piiga n tondiliediba

¹ Jesu den yini ki taani bi piiga n niliediba, ki puni ba u paalu leni li bali ban yaa paani mu cicibiadimu, ki go paagidi bi niba ban yia yaa yianbuoli kuli.

² O den soani ba ke ban yaa wangi U Tienu diema maama, ki go yaa paagidi a yiama moko.

³ O den yedi ba: «Yin da taa liba li sancenli po, ba gbiamu, ba sancenboagili, ba jiema, ba ligi, ki da taa liadalie mo.

⁴ Yin kua yaa diegu nni kuli, yin yaa ye lankani hali yin baa n fii.

⁵ Bi yàá tuo ki gaa yi cangu naankani, yin ña laa dogu nni yaa yogunu, yin kpia ba yi taatama, lan tua siedi bi yiema po.»

⁶ Lani, bi ŋoadikaaba den fii ki gedi ki goadi i dowaali nni ki wangi o Laabaaliŋamo, ki paagidi a yiama i kaani kuli.

Herodi yanlengidima

⁷ Herodi yua n den die Galile diema den gbadi yaala n tiendi kuli. O yama den lengidi kelima bi tianba den tua ke Jan Batisi fii bi tinkpiba siiga.

⁸ Bine n yaa tua ke o saawalipualo Eli n go doagidi o yuli. Bine mo ke bi saawalipua-kpeliba siiga yendo n fii bi tinkpiba siiga.

⁹ Wani Herodi mo den tua: «N den teni ke bi jia Jan yuli, lanwani min gba ke bi maadi yua yaa po li naa bonla kuli tie ŋme?» O den moandi ki baa le o.

Jesu dini niba tudamuu

¹⁰ Jesu tondiba den guani o kani ki togidi o ban den tieni yaala kuli. Lani, o den taa ba bi bebe, ke bi gedi Betisayida dogu kunu po.

¹¹ Bi niba boncianla den bandi ki ŋoadi o. Jesu den biali ba, ki waani ba U Tienu diema maama, ki go paagi yaaba n ki pa.

¹² U yienu n bua ki kua, bi piiga n niliediba den nagini Jesu kani ki yedi o: «Cabi ku niligu ban yadi ki gedi yaa dobila leni yaa koajaana n kuu, ki ban baa u duankaanu leni li bonjekaala, kelima tin ye naani na tie fuali.»

¹³ Jesu den yedi ba: «Pa ba mani yiba ban je.» Bi den guani ki yedi o: «Tii pia liba, kali dupen bonbimuu leni jamilie, li yàá tie ke ti baa gedi tiba ki ban daa li bonjekaala yaa niba n ye ne kuli po yaa ka.»

¹⁴ Bi jaba bebe den bua ki pundi tudamuu (5 000). Jesu den yedi o ŋoadikaaba: «Teni mani ban boagidi nani niba piimuu muu yeni, ki kali caga caga.»

¹⁵ Bi den tieni yeni ki kaani bi niba kuli.

¹⁶ Jesu den taa bi dupenmuudiba leni i janliedi yeni, ki yaadi ki noanli tanpoli po ki jaandi ki seligi la. Lani, o den cabidi cabidi ki teni o ŋoadikaaba ban boagidi ku niligu.

¹⁷ Yuakuli den dini ki guo. Bi den wodi ban dini ki sieni yaala ki gbieni piiga n baabuodilie.

Pieli kadi ki waani ke Jesu tie Kilisiti

¹⁸ Dayenli, Jesu den piadi ki jaandi ke o ŋoadikaaba bebe ye leni o. O den buali ba: «Bi niba boncianla tua ke n tie ŋme?»

¹⁹ Bi den guani ki yedi o: «Boncianla tua ke a tie Jan Batisi, bine Eli, bine mo ke bi saawalipuaba siiga nni yendo n fii bi tinkpiba siiga.»

²⁰ O go den yedi ba: «Yimo te, yimo nan yedi ke n tie ŋme yo?» Pieli den guani ki yedi o: «A tie U Tienu n Gandi Yua.»

²¹ Jesu den maadi leni li bali ki yedi ke ban da waani la niloba kuli.

Jesu pua saawali ke o baa kpe ki go fii

²² O go den yedi ke li tie tiladi o Joa Bijua n le fala boncianla, ke Jufinba nikpela, bi kopadicianba yudanba leni li bali maama banda n yie o, ki kpa o. Ama ke li dataali daali o baa fii bi tinkpiba siiga.

O nilo n baa ŋoadi Jesu maama

²³ Lani, Jesu den yedi bi niba kuli: «Yua n bua ki yaa ŋua nni kuli, wan yie o yuli, ki yaa bugi o dapoanpoanli daali kuli ki nan yaa ŋua nni.

²⁴ Yua n bua ki gaa o miali kuli, o baa biani li. Ama yua n baa biani o miali kelima mini yaa po kuli, baa faabi li.

²⁵ O nilo yaa baa ki diedi ŋanduna kuli ke o miali nan bodi, bi ki bolini o yuli, li baa ŋanbi o po be?

²⁶ Yua n jie i fe mini leni n maama po, o Joa Bijua moko baa ti jie o po i fe o yaa cua leni o kpiagidi leni Baa yaa kpiagidi ki yegi leni yaa malekinba n gagidi ki ŋani.

²⁷ N waani yi i moamoani, yaaba n ye nekanba, bi tianba kan kpe kaa laa U Tienu diema.»

Jesu lebidi cain

²⁸ Jesu n den maadi laa maama ke dananii pendi, o den taa Pieli, Jan leni Jaki ki doni li juali po ki baa n jaandi.

²⁹ Wan den jaandi yaa yogunu, o nunga den lebidi, o tiayiekaadi moko den lebidi ki pendi hali ki ñuliti.

³⁰ Jabilie den maadi leni o. Li den tie Musa leni Eli.

³¹ Bi den doagidi tanpoli kpiagidi nni, ki maadi leni Jesu wan baa kpe yaa kuuma Jerusalemi nni po.

³² Mi guama den gbadi Pieli leni o lieba. Ama bi den fundi ki laa Jesu kpiagidi leni yaa jaliediba n se leni o.

³³ Bi jaba yeni n den ña Jesu kani yaa yogunu, Pieli den yedi o: «Canbaa, li ŋani tin yaa ye ne. Tin tii sugataa, fini yenli, Musa yenli, Eli mo yenli.» Waa den bani wan maadi yaala.

³⁴ Wan den maadi yeni yaa yogunu, ku tawaligu den jiidi ki libini ba. Bi ŋoadikaaba n den laa ke bi kua ku tawaligu nni, ti jawaandi den cuo ba.

³⁵ U nialu den maadi ku tawaligu nni, ki yedi: «One n tie n Bijua, min gandi yua, cengi mani o.»

³⁶ U nialu yeni n den maadi ki gbeni, bi sua ke Jesu ye obebe. Bi ŋoadikaaba den muubi bi ñoana, kaa togidi oba lanyogunu ban laa yaala.

Jesu ñani ki cicibiadiga o jawaalo niinni

³⁷ Lan den fii ki faa, bi den jiidi li juali po. Yaa niligu n yabi den tuogi Jesu.

³⁸ O joa den kpaani ku niligu siiga ki yedi: «Canbaa, n mia ŋa ŋan diidi n po n bijua na, kelima o tie n bonjayenyenga.

³⁹ Ki cicibiadiga n fii o po yaa yogunu kuli, lanyogu liga o yen kuudi, kan yaa digini o leni u paalu ki kpalini o ti ñinsanpunpudi ki faligidi o. Ki ñama o niinni pa o po.

⁴⁰ N bi mia a ŋoadikaaba ke ban deli ki ñani ga o kani, ke baa fidi.»

⁴¹ Jesu den guani ki yedi: «Yinba, yaa nibuolu n luo li dandanli ki go bia, n baa yaa taa ki ye leni yi ki go juuni yi po ki pundi u laa yogunu? Cuani a bijua na.»

⁴² Ki biga n den nagini Jesu kani yaa yogunu, ki cicibiadiga den guli o ki go digini o leni u paalu. Jesu den funi leni ga, ki paagi ki biga, ki teni o o baa.

⁴³ U Tienu kpiagidi leni o paalu den paki yaaba n ye likani kuli. Bi niba n den laa Jesu n tieni yaala kuli, ke li fangicianli leni li pakili cuo ba, o den yedi o ŋoadikaaba:

Jesu go pua o kuuma saawalo

⁴⁴ «Yinba, yin diadi mani yi tuba ki cengi mi naa maama bonŋanla: Bi niba baa janbi o Joa Bijua, ki cuo o ki mubini o bi nisaaliba nuu nni.»

⁴⁵ Ama bi ŋoadikaaba ki den gaa laa maama n bua ki yedi yaala. Li den duagi bi po ke ban da gaa ma. Bi den jie, baa buali Jesu li po.

Yua n tugi li yuli Jesu ŋoadikaaba siiga

⁴⁶ Mi niama den fii bi ŋoadikaaba siiga, ke ban bandi bi siiga yua n tugi li yuli.

⁴⁷ Jesu den bani ban maliti yaala bi pala nni, ki taa ki biga ki sieni o kani

⁴⁸ ki yedi ba: «Yua n gaa ki naa biga cangu n yeli nni, o gaa mini n ba yaa cangoe. Yua n gaa mini mo yaa cangu, o gaa yua n soani nni yaagoe. Yi siiga yua n wa ki cie yikuli, wani n tugi li yuli.»

Yua n kaa yie Jesu kuli tie ti yua

⁴⁹ Jan den yedi: «Canbaa, ti den laa yaa joa n deli mu cicibiadimu a yeli nni ke ti yie o po, kelima waa taani leni ti ki ŋua ŋa.»

⁵⁰ Jesu den guani ki yedi o: «Da go yie mani, kelima yua n kaa yie yi po kuli taa yi po.»

Jesu ñani Galile ki gedi Jerusalemi 9.51—19.27 Samari diema doyendu yaaba naa gaa Jesu cangu

⁵¹ U yogunu n den nagini ke U Tienu baa ñani Jesu ŋanduna nni ki duoni o tanpoli, Jesu den jagi ki bili ke o baa gedi Jerusalemi.

⁵² O den soani bi tondiba ke bi kua o liiga. Bi den gedi ki ban kua Samari diema doyendu nni ki baa lingi o po ku candiegu.

⁵³ Ama baa den tuo Jesu cangu, kelima wan caa Jerusalemi yeni yaa po.

⁵⁴ O ŋoadikaaba Jaki leni Jan n den laa lani, bi den yedi: «Ti Daano, a bua tin yedi u mu n ña tanpoli po ki bolini ba bi?»

⁵⁵ Jesu den jigidi ki noanli ba ki funi leni ba.

⁵⁶ Bi den suagi liiga ki gedi dotogu.

Yaaba n bua ki ŋoadi Jesu

⁵⁷ Ban den ye u sanu nni o nilo den yedi Jesu: «N baa yaa ŋua ŋa ŋan caa naani kuli.»

⁵⁸ Jesu den guani ki yedi o: «I coli pia i fali, ti bonyugiditi mo pia a tiana, ama o Joa Bijua wani naa pia wan baa yaa dua naani.»

⁵⁹ Jesu den yedi nitoa mo: «Ŋoadi nni.» O den guani ki yedi o: «N Daano, pa nni min da kpa gedi ki ban piini n baa no.»

⁶⁰ Jesu den yedi o: «Cedi bi tinkpiba n piini bi tinkpiba, ama fini, gedi ki ban yaa wangi U Tienu diema maama.»

⁶¹ Nitoa go den yedi o: «N Daano, n baa ŋoadi a, ama pa nni min da kpa gedi ki ban cabi n denpo yaaba.»

⁶² Jesu go den yedi o: «Yua n mubini li naakuuli ki baa yaa ko, ki go gbagidi ki nua puoli, waa dagidi U Tienu diema po.»