Luki 8 - U TIENU MAAMA TILI 2013

Yaaba n den ŋua Jesu

¹ Yaa dana n ŋua, Jesu den caa i dociami leni i dowaali nni kuli, ki kpaani ki wangi U Tienu diema Laabaaliŋamo.

² Bi piiga n niliediba den yegi leni o. Bi puotianba, mu cicibiadimu n den kpa ye yaaba yaa niinni leni yaaba n den pia yiantoe, ke Jesu paagi ba kuli, den cangi o. Bi siiga puoyendo den yi Mariyama, ki ñani Magidala, cicibiadimulele n den ñani yua yaa niinni.

³ One mo Janni, o bado Herodi ligikubilo Susa pua, one mo Susanni leni puotoaba boncianla, yaaba n den ñandi bi piama nni ki todi Jesu leni o ŋoadikaaba bi yema nni.

I bonbii pagima kpanjama

⁴ Ku niligu boncianla den ña i dogi nni kuli ki kpendi Jesu kani. Bi niba n den taani boncianla, o den pua mi naa kpanjama:

⁵ «O kpakpaalo den ñani ki baa pagi o bonbuoli. Wan den pagini, i tiami den baa u sankunu. Bi den ŋmaa yi ke ti bonyugiditi mo dini yi.

⁶ I tiami mo den baa ku tancaligu po. Yin den pudi, yi den kuodi, kelima yii den pia soangima.

⁷ I tiami mo den baa ti konkondi nni. Ti konkondi den taani ki fii leni yi ki dini yi.

⁸ I tiami mo den baa ki tinŋanga nni, ki kpedi ki loni bonbiyenbu kuli kobiga kobiga.» Jesu n den maadi lani kuli, o den kpaani: «Yua n pia a tuba ki baa gbadi, wan gbadi.»

Jesu n pua mi kpanjama yaala yaa po

⁹ O ŋoadikaaba den buali o laa kpanjama bundima.

¹⁰ O den guani ki yedi ba: «Bi puni yinba yin bandi U Tienu diema bondoaginkaala, ama nitoaba po, n maadi ba leni mi kpanjama ke ban yaa nua leni bi nuni ki nan da le liba, ki go yaa cengi leni bi tuba ki nan da gbadi liba.

Jesu bundi i bonbii pagima kpanjama

¹¹ Cengi mani mi kpanjama yeni bundima. I bonbuoli tie U Tienu maama.

¹² Yaaba n tie nani u sankunu tinga yeni tie yaaba n gba U Tienu maama, ke Sutaani cua ki ñani ma bi pala nni, ke ban da daani ki baa mi tindima.

¹³ Yaaba n tie nani ku tancaligu yeni tie yaaba n gbadi U Tienu maama, ki gaa ma lanyogunu leni li pamanli. Ama baa pia jiinmoani, bi daani u yogunu waamu bebe po, ama mi tulinma yaa cua yaa yogunu, se ban ŋaa li dandanli.

¹⁴ Yaa bonbii n baa ti konkondi nni tie yaaba n gbadi U Tienu maama, ama bi yaa suagi liiga, bi cedi ke bi yema yanyagidi, ŋalimani leni mi yemanma yankuali dini laa maama, ke bi bonluonkaala liba kuli ki beni.

¹⁵ Yaa bonbii n baa ki tinŋanga nni mo tie yaaba n gbadi U Tienu maama, ki gaa ma yaa pala n tiegi ki ŋani nni, ki kpaagi mi po ki kubi ma bonŋanla, ki juuni ki ban loni li bonluonkaala.

Ki fidisanga kpanjama

¹⁶ Niloba kan cuoni ki fidisanga ki taa li sancianli ki ŋoagini ga, yaa ka ki kubini ga u duanu tiipo, kali wan tuani ga u fidisantuankaanu, ke yaaba n kua li dieli nni n yaa nua mi yenma.

¹⁷ Liba kuli ki ye ki wuo ki kan wuodi. Liba kuli ki ye ki duagi ki kan doagidi bi niba n bandi.

¹⁸ Lani yaa po, fangi mani yi yula leni yin cengi maama, kelima bi baa pa ki pugini yua n pia, ama yua n ki pia wani, bi baa gaa o kani ba wan nua ke o pia yaala.»

Jesu naa leni o waamu

¹⁹ Jesu naa leni o waamu den cua ki baa le o ki naa fidi ki pundi o kani, kelima bi niba n yabi maama po.

²⁰ Bi niba den yedi Jesu: «A naa leni a waamu se niinpo ki bua ki le ŋa.»

²¹ Jesu den guani ki yedi: «N naa leni n waamu tie yaaba n cengi U Tienu maama, ki tiendi man yedi yaale.»

Jesu duani ku tafaaciangu

²² Dayenli, Jesu leni o ŋoadikaaba den kua ku ñinbiagu nni ke o yedi ba: «Tin duodi mani ki gedi napo yaa boanjaali.» Bi den fii ki caa. Ban den kudi ki caa yaa yogunu, Jesu den guani.

²³ Ku faabiadigu den kua mi ñincianma nni, ke mi ñima bua ki gbie ku ñinbiagu, ke li bia bi po.

²⁴ Bi den nagini ki fundi Jesu ki yedi o: «Canbaa, canbaa, ti bia.» O den fundi ki maadi leni ku faagu leni a ñinguona leni li bali, ke likuli duani suo.

²⁵ O den yedi o ŋoadikaaba: «Yi dandanli ye le?» Ti jawaandi leni li pakili den cuo ba, ke bi yedi biyaba: «One wani daa, o tie ŋme ki maadi ba ku tafaagu leni mi ñima ke likuli tuo ki tieni wan yedi yaala?»

Jesu ñani ki cicibiadiga Gerasi yua niinni

²⁶ Bi den duodi mi ñincianma ki pundi Gerasi dogu tinbianu yuu n tiegi Galile.

²⁷ Jesu n den ñani ku ñinbiagu nni ki se li wali po, u dogu nni nilo, mu cicibiadimu n den ye yua yaa niinni den cua ki tuogi o. Li den waagi ke o joa yeni ki go yie tiadi. Waa go den ye diedi nni, o ji den ye a takula nne.

²⁸ Wan den laa Jesu, o den tiani, ki gbaani o nintuali ki kpaani boncianla: «Be n ye mini leni fini siiga, Jesu, U Tienu yua n ye hali tanpolijoma Bijua? N mia ŋa, ŋan da faligi nni.»

²⁹ O den yedi yeni kelima Jesu den yedi ki cicibiadiga n ña o niinni, kani yaaga n den diedi o ke li waagi yeni. Bi den luo o i kuseseli ki kpaagi o ti kpaadi, ki kpaa o, ama o yen cenli li bonlolikaala ke ki cicibiadiga caani o li fuali po.

³⁰ Jesu den buali o: «A yi lede?» O den guani ki yedi o: «Ti yabi!» O den yedi yeni kelima mu cicibiadimu boncianla ye o niinni.

³¹ Mu den miadi Jesu ke wan da yedi mun ña ki gedi u kulu nni.

³² Li den sua ke u duokuliciamu ye likani li juali po ki gbi i moajiini. Mu cicibiadimu den mia Jesu ke wan pa mu u sanu mun kua i duoli yeni niinni, ke o puni mu.

³³ Lani, mu cicibiadimu den ñani o joa yeni niinni, ki ban kua i duoli niinni, ke u duokulu kuli digi mi joayidima po ki jiidi ki baa mi ñincianma nni, ki mia ki bodi.

³⁴ Yaaba n kpaa ba n den laa yaala n tieni, bi den sani ki ban waani li laabaalo u dogu leni li dobila nni.

³⁵ Bi niba den ñani ki gedi ki baa n le yaala n tieni. Bi den pundi Jesu kani ki laa mu cicibiadimu n ñani yaa joa yaa niinni yeni, ke o kaa Jesu taana kani ki yie ti tiadi ki go pia o yama, ke ti jawaandi cuo ba.

³⁶ Yaaba n laa yaala n tieni kuli den togidi ba lan tieni maama, ke mu cicibiadimu n den ye yua yaa niinni paagi.

³⁷ Lani, Gerasi yaaba leni u dobila yaaba kuli den taani ki mia Jesu, ke wan ña bi kani kelima ti jawaanciandi den cuo ba. Jesu den kua ku ñinbiagu nni ki baa guani ki duodi.

³⁸ Mu cicibiadimu n ñani yaa joa yaa niinni den miadi Jesu ke wan cedi wan yaa ye leni o. Ama Jesu den cabi o ki yedi:

³⁹ «Lebidi ki guani a denpo, ki ban togidi U Tienu n tieni a po yaala kuli. O den gedi ki ban wangi u dogu nni kuli, Jesu n den tieni o po yaala.»

Jesu pia u paalu ki cie u yianu leni mi kuuma

⁴⁰ Jesu n duodi ki pundi napo yaa boanjaali yaa yogunu, ku niligu den biali o kelima bikuli guu o.

⁴¹ Ban den yi yua Jayirusi ke o tie li bali maama bangima dieli yudaano, den cua ki gbaani Jesu taana kani, ki mia o wan cua o deni,

⁴² kelima o den pia bonpoyenyenga, yua n pia nani piiga n binalie, ke o yia ki bua ki kpe. Jesu n den caa, ku niligu den miabi o.

⁴³ O pua den ye likani ke o soama wuliti kaa se hali piiga n binalie. O den biani o piama kuli a lotola kani. Oba kuli ki den fidi ki paagi o.

⁴⁴ O den cua ki nagini Jesu puoli po ki sii o liadicuadi. Lanyogunu liga o soañakaama den sedi.

⁴⁵ Jesu den yedi: «Ŋme n sii nni?» Bikuli n den nia ke baa sii o, Pieli den yedi: «Canbaa, ku niligu lindi ki miabi a.»

⁴⁶ Jesu den guani ki yedi: «O nilo sii nni, kelima n bandi ke u paalu ñani n kani.»

⁴⁷ O pua yeni n den sua ke waa wuo, o den cua ki digibi ki gbani Jesu nintuali ki waani bi niba kuli wan bi sii o yaala yaa po, ki go waani ke lanyogunu lige ke o paagi.

⁴⁸ Jesu den yedi o: «N bisalo, a dandanli paagi a. Gedi leni mi yanduanma.»

⁴⁹ Jesu n da den maadi yaa yogunu, o nilo den ñani li bali maama bangima dieli yudaano denpo, ki cua bi kani, ki yedi: «A bisalo yeni, waa ye, da go coagini canbaa.»

⁵⁰ Jesu n den gbadi lani, o den yedi li bali maama bangima dieli yudaano: «Da jie liba, daani bebe, o baa faabi.»

⁵¹ Jesu n den pundi o joa yeni deni, waa den tuo nitoa kuli n yegi leni o ki kua, kali Pieli, Jan, Jaki, ki biga yeni baa leni o naa.

⁵² Bi niba kuli den buudi buudi o po i kumoe. Jesu den yedi: «Da buudi mani, waa kpe ka, o goa yo.»

⁵³ Bi den laa o ti laadi, ki ñuadi o kelima bi bani ke o kpe.

⁵⁴ Jesu den cuo ki biga nuu ki kpaani: «Ki biga, fii.»

⁵⁵ O naano den guani ki kua o niinni ke o fii lanyogu liga. Jesu den yedi ba ban pa o wan je.

⁵⁶ Li pakili den cuo ki biga danba. Jesu den yedi ba ke ban da maadi niloba kuli yaala n tieni.