Luki 6 - U TIENU MAAMA TILI 2013

O Joa Bijua n die mi fuodima daali

¹ Dayenli, U Tienu fuodima daali Jesu den tagi ki poandi ŋalikama kuani nni. O ŋoadikaaba den jobidi ŋalikama siandi ki nugi ki ŋmani.

² Farisieninba bi tianba den yedi ba: «Be n teni ke yi tiendi yaala n kua mi fuodima daali?»

³ Jesu den guani ki yedi ba: «Naani yii cogi Davidi n den tieni yaala mi koma n den cuo o, wani leni yaaba n ye leni o kuli yo?

⁴ O den kua U Tienu diegu nni, ki taa dupengagidika ki ŋmani. Li den kua nitoa kuli n ŋmani dupen yeni, li yàá tie bi kopadicianba yaa ka. Ama Davidi den taa ki ŋmani, ki go teni yaaba n yegi leni o moko.»

⁵ Jesu go den yedi ba: «O Joa Bijua n die mi fuodima daali.»

Jesu paagi yaa joa yaa nuu n faani

⁶ Datoali mi fuodima daali goga, Jesu den kua li bali maama bangima dieli nni ki bangi bi niba U Tienu maama. O joa den ye likani ke o jienu faani.

⁷ Li bali maama banda leni Farisieninba den kpaagi Jesu, ki baa le o yaa baa paagi o mi fuodima daali. Yeni, bi baa baa ban baa fidi ki kuli o leni yaala.

⁸ Jesu den bani ban bungi yaala ki yedi yua yaa nuu n faani: «Fii ki sedi siiga nne.» O den fii ki sedi.

⁹ Jesu den yedi ba: «N buali yi: ‹Naani li pia u sanu tin tieni yaala n ŋani bi yaala n bia mi fuodima daali, ki faabi o nilo, bi ki bolini o yo?› »

¹⁰ O den diidi ki lindi bikuli ki yedi o joa yeni: «Tandi a nuu.» O den tandi u ke u paagi.

¹¹ Bi pala den beni hali ke li pendi, ke bi juogi leni biyaba ban baa tieni Jesu yaala.

Bi piiga n tondiliediba

¹² Lanyogunu Jesu den gedi li juali po ki baa n jaandi. O den tieni ñiamungu ki jaandi U Tienu.

¹³ Lan den fii ki faa, o den yini o ŋoadikaaba, ki gandi bi siiga nni piiga n nibilie, ki yini ba bi tondiba.

¹⁴ Bi yela n tie ne: Simon, Jesu n den yini yua Pieli leni o waalo Andre, Jaki leni Jan, Filipi leni Batelemi,

¹⁵ Matie leni Toma, Alife bijua Jaki leni Simon ban den yi yua o Yankuadaano,

¹⁶ Jaki bijua Jude leni Judasi Isikarioti, yua n den ti tua i janbi daano.

Jesu bangi ku niligu ki go paagi a yiama

¹⁷ Jesu den jiidi li juali po leni ba, ki sedi u tialu po. O ŋoadikaaba toaba boncianla den ye likani. Nitoaba moko den wuli ki ladi likani, ki ñani Jude nni leni Jerusalemi, Tiiri, Sidon leni yaa dogi n baali mi ñincianma kuli. Bikuli den cua ki bua ki gbadi o maama, ki go bua wan paagi ba bi yiani po.

¹⁸ Mu cicibiadimu n den ye yaaba yaa niinni ki yagini bi yama moko den paagi.

¹⁹ Ku niligu siiga yuakuli den moandi ki bua ki sii o, kelima u paalu den ña o niinni ki paagidi bikuli.

Li pamanmoanli leni o falabiado

²⁰ Lani, Jesu den yaadi ki diidi o ŋoadikaaba ki yedi: «Li pamanli ye leni yinba yaaba n tie a luoda, kelima U Tienu diema tie yi yaame.

²¹ Li pamanli ye leni yinba, mi koma n pia yaaba moala, kelima yi baa guo. Li pamanli ye leni yinba yaaba n buudi moala ne, kelima yi baa ti yaa laa.

²² Li pamanli ye leni yi, bi niba yaa nani yi, ki deli ki ñandi yi bi siiga, ki sugidi yi, ki sengi yi nani ti joagindi yeni kelima o Joa Bijua yaa po.

²³ Li yaa tua yi po yeni yaa daali, yin mangi mani yi pala ki yaa yugi ki ciini li pamanli po, kelima yaa panpaani n bili yi po tanpoli po yabi. Bi yaajanba moko den tuuni bi saawalipuaba yene.

²⁴ Ama fala baa yaa ye leni yinba a piada, kelima yi mali ki baa yi yemanma no.

²⁵ Fala baa yaa ye leni yinba yaaba n pia ke li kandi moala ne, kelima mi koma baa ti gbadi yi. Fala baa yaa ye leni yinba yaaba n laa ti laadi moala ne, kelima yi pala baa ti boandi, yin yaa mua ti nunsiidi.

²⁶ Fala baa yaa ye leni yi bi niba kuli yaa ti pagi yi, bi yaajanba moko den pagi bi saawalipua-faadanba yene.

Mi buama yibalinba po

²⁷ Yinba yaaba n cengi n maama, n yedi yi line: Yaa bua mani yi yibalinba, ki yaa tiendi yaala ŋani yaaba n nani yi po.

²⁸ Yaa gaaliti mani yaaba n solini yi, ki yaa jaandi yaaba n sugidi yi po.

²⁹ Nilo yaa pabi a kpianyendu po, ŋan pegidi ki teni o une mo. Nilo yaa fie a liadicianli, ŋan da yie ke o kan gaa a liadiga mo.

³⁰ Pa yua n mia ŋa kuli. Nilo yaa fie ŋan die yaala, da guani ki buali o la.

³¹ Yin yaa tiendi bi niba po, nani yin bua ban yaa tiendi yi po maama.

³² Yi yaa bua yaaba n bua yi, bi baa pagi yi yeni mo lede? Ba ti tuonbiadi danba moko bua yaaba n bua ba.

³³ Yi yaa ŋanbidi yaaba n ŋanbidi yi po yaa po, bi baa pagi yi yeni mo lede? Ti tuonbiadi danba moko tiendi yene.

³⁴ Yi yaa ledi yin daani ke yaaba n baa guani ki pa yi yi ligi, bi baa pagi yi yeni mo lede? Ti tuonbiadi danba moko ledi bi tuonbiadanlieba bi ligi, ke ban guani ki pa ba.

³⁵ Ama yin yaa bua mani yi yibalinba, yaa ŋanbidi mani bi niba po, ki yaa ledi ba ki da daani ke yi baa guani ki gaa bi kani liba. Yeni, yi panpaani baa yaa yabi, yi baa yaa tie U Tienu yua n ye hali tanpolijoma bila, kelima wani, o ŋanbidi bi ŋanwaadanba leni bi nibiadiba kuli po.

³⁶ Yin yaa tiendi mani mi ŋanma nani yi Baa moko n tiendi mi ŋanma maama yeni.

Ŋan da ja ti buudi

³⁷ Yin da ja mani ti buudi, ke U Tienu n da ti jia yimo yaa buudi. Yin da bu ki cuo oba, ke ban da ti bu ki cuo yimo. Lani, bi kan jia ki bili yimo yaa cuonu. Yaa tiendi mani yi nisaalilieba tagili po sugili, lani bi baa tieni yimo yaa tagili po sugili.

³⁸ Yaa puuni mani, lani bi baa yaa puuni yimo ki biigidi yi po bonŋanla, ki ñiigi ki yegini ki kuodi hali lan cuudi. Bi baa taa yin biigidi nitoaba po leni yaa bonbiigikaala, ki biigi yimo yaa po.»

³⁹ Jesu den pua ba mi kpanjama moko ki yedi: «Naani o juamo baa fidi ki dadi o juamo bi? Bani nibilie yeni kuli kan baa ku buogu nni te?

⁴⁰ O ŋoadika ki cie o canbaa, ama yaa ŋoadika n bangi ki gbeni, o baa yaa naani leni o canbaa.

⁴¹ Be yaa po ke a nua yaa muagu n ye a lielo nunbu nni, ki naa nua yaa dajenli n caa a yaabu nni?

⁴² Li gaa lede ke a baa yedi a kpiilo: ‹N kpiilo, cedi min ñani yaa muagu n ye a nunbu nni,› fini yua n ki nua yaa dajenli n caa a yaabu nni? Fini palalie daano, ŋan kpa ñani yaa dajenli n caa a yaa nunbu nni, lane a baa fidi ki le bonŋanla ŋan baa ñani yaa muagu n ye a lielo yaabu nni maama.

Bu tibu leni bu bonluonkaala

⁴³ Tiŋanbu kan luoni yaa bonluonkaala n ki ŋani. Yaa tibu n ki ŋani mo kan luoni yaa bonluonkaala n ŋani.

⁴⁴ Bi bandi tibu kuli kelima bu bonluonkaala po yo. Bi kan sobidi a kankana ku konkongu po, bi kan go sobidi i cabi u naakpanyuanu po.

⁴⁵ O niŋamo ñandi o paŋanli nni yaala n ŋani, o nibiado mo ñandi o pabiadili nni yaala n bia, kelima o nilo maadi yaala n gbie o pali nne.

A dielieda

⁴⁶ Be n teni ke yi yi nni: ‹Li Miali Diedo U Tienu,› ki naa tiendi min yedi yaala?

⁴⁷ N baa waani yi yua n cua n kani ki gbadi n maama ki tiendi min yedi yaala kuli n naani leni yua.

⁴⁸ O tie nani yaa nilo n den bua ki maa li dieli. O den gbiidi hali ke li ñuagi ki pundi ku tangu, ki puu li tanpuuli ku yaa po ki maa o dieli. Li ñingocianli n den cua ki puubi ki tudi li dieli yeni, lii den fidi ki ŋmiagi li kelima li den maa ku tangu po.

⁴⁹ Ama yua n gbadi n maama ki naa tiendi man yedi yaala, omo tie nani yaa nilo n maa li dieli ki naa kpa gbiidi ki puu li tanpuuli, ama ki puu ki tinfanga po. Li ñingocianli n puubi ki tudi li yaa yogunu liga, li den baa. Li dieli yeni mudima den bia.»