Luki 4 - U TIENU MAAMA TILI 2013

Sutaani tulini Jesu

¹ Jesu den ñani Jurden kpenu kani ki gbie leni U Tienu Fuoma Yua. Wani U Tienu Fuoma Yua den gedini o mi fanpienma po.

² Lanpo, Sutaani den tulini o hali dana piinaa. Waa den dini liba laa dana nni. Laa dana n pendi mi koma den cuo o.

³ Lani, Sutaani den yedi o: «A yaa tie U Tienu Bijua, ŋan yedi li tanli na n tua jiema.»

⁴ Jesu den guani ki yedi o: «Li diani: O nisaalo kan yaa ye kelima mi jiema bebe yaa po.»

⁵ Sutaani den gedini o yaa kaanu n kpedi ki teni ke o laa ŋanduna diema kuli yenma,

⁶ ki yedi o: «N baa pa ŋa laa bali, laa diema leni mi kpiagidi kuli, kelima bi puni nni likuli. Nmo baa pa la min bua yua kuli.

⁷ Lanwani, a yaa gbaani n nintuali, likuli baa tua a yaala.»

⁸ Jesu den guani ki yedi o: «Li diani: A baa jigini o Diedo a Tienu, Ki yaa kpiagidi wani bebe.»

⁹ Sutaani den gedini o Jerusalemi, ki sieni o U Tienu diegu yuli po, ki yedi o: «A yaa tie U Tienu Bijua, ŋan yugi ki cii tiipo, kelima li diani:

¹⁰ O baa puogi o malekinba Ke ban guudi a.

¹¹ Bi baa tiebi a leni bi nii, Ke a taali n da tuudi tanli.»

¹² Jesu den guani ki yedi o: «Li go yedi: Da biigi o Diedo a Tienu.»

¹³ Sutaani n den tulini o laa tulinma kuli ki gbeni, o den foagidi o kani ki ŋaa o hali yogunuba.

Jesu cili o tuonli Galile diema nni 4.14—9.50 Jesu cili o mawangima

¹⁴ Jesu den guani Galile leni mi Fuoma paalu. O yeli den ñani laa diema nni kuli.

¹⁵ O den bangi li bali maama bangima diena nni ke bi niba kuli pagi o.

Nasareti dogu yaaba yie Jesu

¹⁶ Jesu den gedi Nasareti wan den fandi naani. U Tienu fuodima daali o den kua li bali maama bangima dieli nni, nani wan den maani ki tiendi maama. O den fii ki baa cogi U Tienu maama,

¹⁷ ke bi teni o o saawalipualo Esayi yaa tili. Wan den gbabidi li, o den laa lan diani naankani yaa maama n tie ne:

¹⁸ O Diedo Fuoma ye n niinni Kelima o gandi nni Ke min yaa wangi a luoda o Laabaaliŋamo. O soani nni ke min kpaani i yonbi faabima, Ke min pa a juama mi nunnualima. O soani nni ke min yaa faabidi ban miabi yaaba,

¹⁹ Ki kpaani ke o Diedo ŋanbili binli cua.

²⁰ Jesu n den cogi laa maama, o den guani ki gbabi li tili ki teni li o jiidika, ki guani ki kali. Yaaba n den ye li bali maama bangima dieli nni kuli den diidi o.

²¹ O den yedi ba: «Yin gbadi i Diani maama yaama ne tieni dinla.»

²² Bikuli den tiendi o po siedi ki pagi o leni wan maadi yaa maŋanma, ki nua o leni li pakili. Bi den tua: «Laa tie Josefi bijua ka?»

²³ Jesu den yedi ba: «Laa pia kuli tama ke yi baa pua nni yaa kpanjama n tie ne: ‹Fini lotoli, paagi a yuli,› ki go yedi: ‹Ti gbadi ŋan tieni yaala Kafarnawum po kuli, ŋan tieni la nekanba mo a dandogu nni.› »

²⁴ O den pugini ki yedi: «N waani yi i moamoani, bi kan gaa saawalipualoba kuli bonŋanla o dandogu nni.

²⁵ N go waani yi i moamoani ke Eli yogunu, tanpoli den luoni, ke ki taaga ki go mi hali binataa leni ŋmaaliluoba. Mi koncianma den ye mi diema nni kuli, a kpepuona mo den ye Isidayeli diema nni boncianla.

²⁶ Ama ba yeni, U Tienu ki den soani Eli bi siiga oba kuli kani se Sidon diema dogu Sarepita yaa kpepuoli kani.

²⁷ A gbaada boncianla den ye Isidayeli diema nni o saawalipualo Elise yogunu. Ba yeni, bi niinni oba ki den paagi, se Naama Siiri diema yaa joa.»

²⁸ Yaaba n den ye li bali maama bangima dieli nni n den gbadi laa maama, bi pala den beni boncianla.

²⁹ Bi den fii ki deli ki ñani o u dogu nni, ki gedini o bi dogu n ye yaa juali yuli po, ki baa lu o li yidima kani.

³⁰ Ama Jesu den poandi bi siiga, ki ñani ki ban caa.

Jesu paagi ki cicibiadiga n ye yua yaa niinni

³¹ Jesu den gedi Galile dogu Kafarnawum. Mi fuodima daali, o den bangi bi niba.

³² O bangima den paki ba kelima o den maadi leni li bali.

³³ Li den sua ke ki cicibiadiga n ye yaa joa yaa niinni ye li bali maama bangima dieli nni. O den tiani boncianla ki yedi:

³⁴ «Ŋain, fini Jesu, Nasareti yua, be n ye tinba leni fini siiga? A cua ki baa bolini ti. N bani ŋan tie yua. A tie U Tienu Nigagidiŋamo.»

³⁵ Jesu den funi leni ga, ki yedi: «Suoni ki ña o joa ne niinni.» Ki cicibiadiga den guli o joa yeni li nitaanli siiga ki ñani o niinni kaa tieni o bonbiadiliba kuli.

³⁶ Li den paki yaaba n ye likani kuli ke bi tua biyaba: «Mi naa maama te? O maadi mu cicibiadimu leni li bali leni u paalu, ke mu ña mun ye yaaba niinni.»

³⁷ O yeli den ñani laa gaanilindima tinbuona nni kuli.

Jesu paagi a yiama boncianla

³⁸ Jesu den fii ki ñani li bali maama bangima dieli nni, ki gedi Simon denpo. Li den sua ke Simon cuadinaa dua likani ke o gbanandi beni boncianla. Bi den mia Jesu ke wan paagi o.

³⁹ O den gedi o kani ki yini o po, ki funi leni ti gbananbiendi leni li bali, ke ti kagidi o po. Lanyogunu o den fii ki gaa bi cangu.

⁴⁰ Ku juofangu, yaaba n den pia a yiama kuli den cuani ba Jesu kani. Bi yianbuoli den kandi. Jesu den maani o nii yendo yendo kuli po, ki paagi ba.

⁴¹ Mu cicibiadimu moko den ñani bi niba boncianla niinni ki tangi ki tua: «A tie U Tienu Bijua.» Ama Jesu den fu leni mu, kaa tuodi ke mu maadi, kelima mu den bani ke o tie U Tienu n Gandi Yua.

Jesu wangi o Laabaaliŋamo kaantoe

⁴² Lan den fii ki faa, Jesu den ñani ki gedi li fuali po. Bi niba boncianla den lingi o. Ban den pundi o kani, bi den bua wan yaa ye leni ba ki da ña bi kani.

⁴³ Ama o den yedi ba: «Li tie tiladi min yaa wangi dotoe mo U Tienu diema Laabaaliŋamo, kelima o den soani nni lani yaa po yo.»

⁴⁴ O den wangi o Laabaaliŋamo li bali maama bangima diena nni, ya n ye mi diema nni kuli.