Luki 3 - U TIENU MAAMA TILI 2013

Jesu tuonli boginma 3.1—4.13 Jan Batisi mawangima

¹ Loma yaaba badiciamo Tibeli Sesari bali piiga n binmuuli binli, Ponsi Pilati den tie Jude diema guveneeri, Herodi den die Galile diema, o waalo Filipi n yaa die Itule leni Takonita diema, Lisaniasi mo n yaa die Abileni diema.

² Hana leni Kayifi den taani ki tie bi kopadicianba yudanba. Laa binle Sakari bijua Jan den ye mi fanpienma nni, ke U Tienu maadi leni o.

³ Lani, o den caa yaa dogi n baali Jurden kpenu, ki wangi bi niba ke ban lebidi bi pala, wan batisi ba, ban baa bi tuonbiadi sugili.

⁴ Nani lan diani maama o saawalipualo Esayi tili nni: O nilo kpaani mi fanpienma nni ki tua: Yin bogini mani o Diedo sanu, Ki naadi mani o sani.

⁵ Bi baa gbieni ti joaloandi kuli, Ki jiini joacianli leni joabiga kuli ki ladi ki dagini, Ki naadi a sangoana, Ki piini ti sanbuodi.

⁶ Nisaalo kuli baa le U Tienu faabima.

⁷ Bi niba boncianla den kpendi Jan kani ke wan batisi ba. O den tua ba: «Yinba, u waalabi-buolu na, ŋme fandi yi yin sani ki cia U Tienu pabienli yaali n baa cua na?

⁸ Yin yaa tuuni mani yaa tuona n doagidi ke yi lebidi yi pala. Yin da tua yi pala nni: ‹Ti pia Abalahama ke o tie ti yaaja.› N waani yi ke U Tienu baa fidi ki teni yaa tana n tie ne n tua Abalahama puoliŋuani.

⁹ Ba moala bi caani li yali i tijiini po. Yaa tibu n ki luoni yaa bonluonkaala n ŋani kuli, bi baa pedi bu ki lu u mu nni.»

¹⁰ Bi niba boncianla den buali o ki tua: «Ti nan baa tieni lede?»

¹¹ O den guani ki yedi ba: «Yua n pia liadalie, wan boagidi leni yua n ki pia. Yua n pia mi jiema moko n tieni yeni.»

¹² Bi lubigaaba moko den cua ke wan batisi ba, ki yedi o: «Canbaa, ti baa tieni lede?»

¹³ O den guani ki yedi ba: «Yin da gaa mani li lubili ki cie ban bili maama.»

¹⁴ Bi toatieba moko den buali o: «Ti mo baa tieni lede?» O den yedi ba: «Da tiendi mani bi niba u paalu, ki da gaani suuna ki kuli oba. Yin mangi mani yi pala leni yi ŋmapani.»

¹⁵ Bi niba den guu U Tienu n Gandi Yua cuama. Bikuli den buali bi yula Jan yaa tie U Tienu n Gandi Yua.

¹⁶ O den yedi bikuli: «Mini n batisi yi leni mi ñima, ama yua n pia u paalu ki cie nni baa cua, mii pundi ba yua n baa lodi o cacaagbansiama. Wani, o baa batisi yi leni U Tienu Fuoma Yua leni u mu.

¹⁷ O kubi o kaaligu o nuu nni. O baa ŋanbi o jalu cain, ki lendi ki tigi ki wodi ŋalikama ki kuodi o buali nni, ki nan sia mi fenma yaa mu n ki pia gbindima.»

¹⁸ Jan den wangi bi niba o laabaaliŋamo ki go tundi ba tunditoe boncianla.

¹⁹ Ama wan den funi leni Herodi yua n den die Galile kelima o waalo pua Herodiasi po leni wan tieni yaa tuonbiada kuli po,

²⁰ Herodi go den pugini laa tuonbiadi kuli po tuonbiatoadi, ki luoni Jan li kpaadidieli nni.

Jan batisi Jesu

²¹ Bi niba kuli n den kpendi ke Jan batisi ba, o den batisi Jesu moko. Jesu n den jaandi yaa yogunu, tanpoli den luodi

²² ke U Tienu Fuoma Yua ñani lipo ki naani leni ki kpaajiega, ki jiidi ki jagini Jesu po. Bi den gbadi u nialu ke u maadi hali tanpoli po ki yedi: «A tie n Bibuadiga. N pali mani a po hali boncianla.»

Jesu yaajanba

²³ Jesu den cili o tuonli ki pia nani bina piitaa. Bi den nua ke o tie Josefi bijua. Josefi den tie Heli bijua,

²⁴ Heli mo tie Mata bijua, Mata mo tie Levi bijua, Levi mo tie Meliki bijua, Meliki mo tie Janayi bijua, Janayi mo tie Josefi bijua,

²⁵ Josefi mo tie Matatiasi bijua, Matatiasi mo tie Amosi bijua, Amosi mo tie Nahumi bijua, Nahumi mo tie Esili bijua, Esili mo tie Nagayi bijua,

²⁶ Nagayi mo tie Mahati bijua, Mahati mo tie Matatiasi bijua, Matatiasi mo tie Semeyini bijua, Semeyini mo tie Joseki bijua, Joseki mo tie Joda bijua,

²⁷ Joda mo tie Johana bijua, Johana mo tie Lesa bijua, Lesa mo tie Sorobabeli bijua, Sorobabeli mo tie Salatieli bijua, Salatieli mo tie Neri bijua,

²⁸ Neri mo tie Meliki bijua, Meliki mo tie Adi bijua, Adi mo tie Kosama bijua, Kosama mo tie Elimadama bijua, Elimadama mo tie Eri bijua,

²⁹ Eri mo tie Jesu bijua, Jesu mo tie Elieseri bijua, Elieseri mo tie Jolima bijua, Jolima mo tie Mata bijua, Mata mo tie Levi bijua,

³⁰ Levi mo tie Simeon bijua, Simeon mo tie Juda bijua, Juda mo tie Josefi bijua, Josefi mo tie Jonama bijua, Jonama mo tie Eliakim bijua,

³¹ Eliakim mo tie Meleya bijua, Meleya mo tie Mena bijua, Mena mo tie Matata bijua, Matata mo tie Natan bijua, Natan mo tie o bado Davidi bijua,

³² Davidi mo tie Isayi bijua, Isayi mo tie Obedi bijua, Obedi mo tie Boasi bijua, Boasi mo tie Sala bijua, Sala mo tie Nasoni bijua,

³³ Nasoni mo tie Aminadabi bijua, Aminadabi mo tie Adimini bijua, Adimini mo tie Alini bijua, Alini mo tie Esilomo bijua, Esilomo mo tie Peretisi bijua, Peretisi mo tie Juda bijua,

³⁴ Juda mo tie Jakob bijua, Jakob mo tie Isaaka bijua, Isaaka mo tie Abalahama bijua, Abalahama mo tie Tera bijua, Tera mo tie Nahori bijua,

³⁵ Nahori mo tie Serugi bijua, Serugi mo tie Reu bijua, Reu mo tie Faleki bijua, Faleki mo tie Ebeli bijua, Ebeli mo tie Sela bijua,

³⁶ Sila mo tie Kayinam bijua, Kayinam mo tie Afakisada bijua, Afakisada mo tie Sem bijua, Sem mo tie Nowe bijua, Nowe mo tie Lemeki bijua,

³⁷ Lemeki mo tie Matusalemi bijua, Matusalemi mo tie Enoki bijua, Enoki mo tie Jeleda bijua, Jeleda mo tie Maleleela bijua, Maleleela mo tie Kayinam bijua,

³⁸ Kayinam mo tie Enosi bijua, Enosi mo tie Seti bijua, Seti mo tie Adama bijua, Adama mo tie U Tienu bijua.