Luki 24 - U TIENU MAAMA TILI 2013

Jesu fiima bi tinkpiba siiga 24 Jesu ñani li takuli nni

¹ Aŋada daali, ku tiŋaapanpangu, bi puoba yeni den taa ban tuodi ki bogini yaa tibidi ke ti pia u nuulumanu yeni, ki guani ki gedi li takuli po.

² Bi den sua ke yaa tanpabigu n bii li takuli ñoabu bindi ki pigidi.

³ Bi den kua li takuli nni ki lingi, baa den laa o Diedo Jesu.

⁴ Ban kaa den bani ban baa maali yaala, jabilie yaaba n la yaa tiadi n ñuliti den doagidi ki sedi bi kani.

⁵ Ti jawaanciandi den cuo ba ke bi tibini bi nunmu ki nua tiipo. Bi jaba yeni den yedi ba: «Be yaa po ke yi lingi yua n fo yaaba n kpe siiga?

⁶ Waa go ye ne, o fii bi tinkpiba siiga. Tiadi mani ke wan den ye Galile po,

⁷ o den yedi yi: ‹Li tie tiladi ban cuo o Joa Bijua ki teni ti o tuonbiadi danba, ban joani o li dapoanpoanli po. Ama li dataali daali, o baa fii bi tinkpiba siiga.› »

⁸ Lani, bi puoba yeni den tiadi Jesu maama.

⁹ Bi den ñani li takuli kani, ki kuni ki ban togidi laa bonla bi piiga n niyendiba leni yaaba n sieni kuli.

¹⁰ Yaa puoba n den togidi Jesu tondiba laa bonla den tie Magidala dogu yua Mariyama, Janni, Jaki naa Mariyama leni puotoaba yaaba n den ye leni ba.

¹¹ Jesu tondiba den tama ke ban togidi yaala tie mafanma. Baa den dugi ke bi maama tie moamoani.

¹² Ama Pieli den fii ki sani ki gedi li takuli po. O den buani ki noanli lienni, ki laa ban den fini fini o kpiemo yaa cabipiena bebe n bili. O den lebidi ki kuni, ke yaala n tieni paki o boncianla.

Yaala n tieni Emayusi sanu nni

¹³ Landaali bi ŋoadikaaba siiga nibilie den caa Emayusi dogu, ke li foagi leni Jerusalemi nani piiga n kilo dajenbiyenga.

¹⁴ Bi den cuoni ki maadi leni biyaba yaala n den tieni tieni kuli.

¹⁵ Ban den maadi ki nia leni biyaba yaa yogunu, Jesu wani o ba den nagini ki yegi leni ba.

¹⁶ Bi den laa o, ama li den duagi bi po ke baa bandi o.

¹⁷ O den yedi ba: «Yi cuoni ki boe be ke yi pala biidi nanda?»

¹⁸ Bi siiga yendo ke bi yi o Kileopasi den guani ki yedi o: «Yaaba n ye Jerusalemi siiga kuli, fini bebe n ki bani yaa bonla n tieni u niinni a dana ne?»

¹⁹ O den buali ba: «Be n tieni?» Bi den guani ki yedi o: «Yaa bonla n tieni Jesu, Nasareti yua, yua n den tie U Tienu leni bi niba kuli nintuali, yaa saawalipualo n pia u paalu a tuona po leni mi maama po kuli.

²⁰ Bi kopadicianba yudanba leni ti yudanba den cuo o, ki teni ke bi jia o buudi ki bili ke ban kpa o. Bi den joani o li dapoanpoanli po.

²¹ Tinba, ti den daani ke wani n baa faabi Isidayeli buolu. Ama dinla n tie danataa leni laa bonla n tieni.

²² Ti siiga bi puotianba maama paki ti. Bi bi yagidi ki gedi li takuli po dinla ku tiŋaapanpangu,

²³ kaa ban laa o kpiemo. Bi guani ki yedi ti ke bi laa malekinba yaaba n doagidi bi yula bi kani, ki waani ba ke Jesu fo.

²⁴ Ti lieba bi tianba gedi li takuli po ki ban sua ke li bonla kuli tie nani bi puoba n yedi maama, die baa laa wan wani.»

²⁵ Lani, Jesu den yedi ba: «Yinba bi yanpiidanba na, yaaba n ki jaligi ki baa daani bi saawalipuaba n den yedi yaala kuli.

²⁶ Naani laa den tie tiladi ke U Tienu n Gandi Yua n le fala yeni, ki kua o kpiagidi kaanu?»

²⁷ Lani, Jesu den cili leni Musa yaa maama kani, ki pundi bi saawalipuaba yaama, ki bundi bi po i Diani nni kuli yaala n den maadi o po.

²⁸ Ban den nagini ban caa yaa dogu, Jesu den tieni nani o bua ki pendi ki suagi liiga.

²⁹ Ama bi den yie o po, ki yedi: «Sedi leni ti kelima u yienu kua ke u kaanu mo boandi.» Lani, o den kua ki sedi, ki ye leni ba.

³⁰ Wan den kaa u saajekaanu kani leni ba, o den taa dupen ki tuondi U Tienu ki cabidi ki teni ba.

³¹ Lani, bi nuni den ŋubidi ke bi bandi o. Ama o den yindi bi siiga ke baa go laa o.

³² Bi den yedi biyaba: «Wan bi maadi leni ti u sanu nni ki bundi ti po i Diani n yedi yaala yeni, laa bi tie nani u mu n co ti pala nni yeni ka?»

³³ Lanyogunu liga bi den fii ki guani Jerusalemi, ki laa ke bi piiga n niyendiba leni bi ŋoadikalieba taani ki kaa.

³⁴ Bi den yedi ba: «O Diedo fii bi tinkpiba siiga moamoani lige. O doagidi o yuli Simon po.»

³⁵ Bani bi niliediba yeni mo den togidi yaala n tieni u sanu po leni ban bandi Jesu maama, wan cabidi dupen yaa yogunu.

Jesu doagidi o yuli o ŋoadikaaba po

³⁶ Ban den maadi laa bonla yaa yogunu, Jesu wani o ba den doagidi ki sedi bi siiga ki yedi ba: «Mi yanduanma n yaa ye leni yi.»

³⁷ I jeje leni ti jawaanciandi den cuo ba, kelima bi den tama ke bi laa jiingoe.

³⁸ Jesu den yedi ba: «Be n teni ke yi yama yagi yeni? Be yaa po ke yi pia laa yanmaalibuolu?

³⁹ Diidi mani n nii leni n taana, mini lige. Sii mani n nii ki le, jiingu naa pia gbanandi leni kpaba, nani yin nua ke n pia maama.»

⁴⁰ Wan den maadi yeni, o den waani ba o nii leni o taana.

⁴¹ Li pamancianli po n den teni ke bi daa den daani o maama ki go ye leni ti jawaandi yeni, o den buali ba: «Yi pia li bonjekaala nekanba bi?»

⁴² Bi den teni o li janjenŋoabidili.

⁴³ O den gaa ki ŋmani bi nintuali.

⁴⁴ Lani, o den yedi ba: «Line n tie min da den ye leni yi ki wangi yi yaala, ke li tie tiladi ke yaala n diani ki bili n po Musa bali maama nni, bi saawalipuaba leni Pisomi tila nni kuli, n tieni ki dudi.»

⁴⁵ Lanwani, o den libidi bi yantiali ke ban fidi ki gbadi i Diani n yedi yaala.

⁴⁶ Lani, o den yedi ba: «Li diani ki yedi, ke U Tienu n Gandi Yua baa le fala, ki yuandi ki fii bi tinkpiba siiga li dataali daali.

⁴⁷ Bi baa cili Jerusalemi na ki yadi ki gedi i nibuoli kuli po, ki ban yaa wangi ke bi niba n lebidi bi pala, ki baa sugili bi tuonbiadi po.

⁴⁸ Yinba n tie laa bonla siedinba.

⁴⁹ Mini n ba baa soani yi po n Baa n niani yaala. Ama yin yaa ye mani u naa dogu nni hali tanpoli paalu n baa jiidi yi po.»

Jesu doni tanpoli

⁵⁰ Li yaa puoli, Jesu den ñani ba u dogu nni, ki gedini ba hali ki ban kuli Betani dogu. O den yugidi o nii ki gaali ba.

⁵¹ Wan den gaaliti ba yaa yogunu, o den paadi leni ba ki doni tanpoli po.

⁵² Ama bani wani n den gbaani ki pugi o ki gbeni, bi den lebidi ki guani Jerusalemi leni li pamancianli.

⁵³ Bi den ye U Tienu diegu nni daali kuli, ki pagi U Tienu.