Luki 23 - U TIENU MAAMA TILI 2013

Bi gedini Jesu Pilati bujiali kani

¹ Lani, bi cancantieba taanli kuli den fii ki gedini Jesu guveneeri Pilati po.

² Bi den cili ki kuli o ki yedi: «Ti den laa one ke o yaandi ti niba, ki tua ke ban da pa o badiciamo Sesari li lubili. O go den tua ke wani n tie U Tienu n Gandi Yua, o badiciamo.»

³ Pilati den buali Jesu: «A tie Jufinba bado bi?» Jesu den guani ki yedi o: «Fini n yedi yeni.»

⁴ Pilati den yedi bi kopadicianba yudanba leni ku niligu: «Mii laa ke o joa na tieni tagiliba kuli.»

⁵ Bi den nia ki yedi: «O den cili hali Galile po ki tagi Jude nni kuli, ki pundi hali ne, ki bangi bi niba ki tigini ba ke ban yie li bali.»

Pilati teni ke bi gedini Jesu Herodi po

⁶ Pilati n den gbadi laa maama, o den buali o joa yeni yaa tie Galile nilo yo.

⁷ Wan den gbadi ke o tie Herodi diema nilo, o den soani o Herodi po. Li sua ke Herodi ye Jerusalemi laa dana nni.

⁸ Wan den laa Jesu, o pali den mangi boncianla, kelima hali yogu o den bua ki le o. Li tie ke o den gba ke bi maadi o maama ke o sugini wan tieni mi bancianma wan le.

⁹ O den buali Jesu i buali boncianla, ama waa den guani o maamiba kuli.

¹⁰ Bi kopadicianba yudanba leni li bali maama banda den ye likani ki kuliti Jesu boncianla kaa cedi.

¹¹ Herodi den taani leni o toatieba ki fali o, ki ñuadi o, ki lani o ti tiakpiagidi, ki guani o Pilati po.

¹² Landaali Herodi leni Pilati den mangi leni biyaba, ti yibalindi n den kpa ye bani yaaba yaa siiga.

Pilati jia ki kadi ke ban kpa Jesu

¹³ Pilati den taani bi kopadicianba yudanba, Jufinba liiga yaaba leni ku niligu kuli,

¹⁴ ki yedi ba: «Yi den cuani n kani o joa na ki yedi ke o yaandi bi niba ki tua ke ban yie li bali. To, n buali o yi nintuali ki sua waa tieni liba yin kuli o yaala kuli siiga.

¹⁵ Herodi moko naa sua ke o pia tagiliba, lane ke o guani o ti kani. O joa na ki tieni liba kuli yaala n pundi tin kpa o.

¹⁶ Lani yaa po, n yaa baa teni ke bi pua o, sn baa ŋa o.» [

¹⁷ Li den sua ke mi Pendima jaanma nagini, ke li tie tiladi Pilati n faabi kpaadiyenli ku niligu po.]

¹⁸ Ku niligu kuli den taani ki tiani: «Teni ban kpa o joa na, ki faabi ti po Barabasi.»

¹⁹ Bi den kuani Barabasi li kpaadidieli nni, kelima o den fiini mi janjanma u dogu nni, ki go kpa o nilo.

²⁰ Pilati den bua ki faabi Jesu. Lani yaa po, o go den maadi leni ku niligu.

²¹ Ama bi den tangi ki tua: «Joani o li dapoanpoanli po! Joani o li dapoanpoanli po!»

²² Pilati go den maadi ba mi taataama ki yedi: «O tieni be ke li bia? Mii laa ke o tieni yaa bonbiadila n pundi mi kuuma. Lanwani, n baa teni ban pua o, ki ŋaa o.»

²³ Bi go den ñii ki tangi ki tua ke ban joani o li dapoanpoanli po, hali ke bi tantani den paadi Pilati.

²⁴ Lani yaa po, Pilati den jia ti buudi ki kadi, ke ban mia ban tieni Jesu yaala yeni, baa tieni.

²⁵ O den ŋaa ban den kuani yaa joa li kpaadidieli nni, kelima mi janjanma leni mi nikpama po yeni, nani ku niligu n mia maama. Bi taa Jesu ki teni ba, ke ban tieni o ban bua yaala.

Bi joani Jesu li dapoanpoanli po

²⁶ Ban den ñani Jesu likani ki caani o ki baa n kpa o, bi den tuogi Sireni dogu yua ke bi yi o Simon, ke o ñani i kuani po. Bi den cuo o ki bugini o li dapoanpoanli, wan yaa bugi ki ŋua Jesu.

²⁷ Niba boncianla den ŋua o. Bi siiga bi puoba den ye, ki pua bi bena ki mua Jesu po.

²⁸ O den jigidi ki yedi ba: «Yinba Jerusalemi puoba, da mua mani n po, ama yaa mua mani yi yula po leni yi bila po,

²⁹ kelima dana baa ti cua, ke bi baa yedi: ‹Li pamanli ye leni mu ŋoalimu, yaaba n ki mali leni yaaba n ki ŋaani biga kuli.›

³⁰ Lanyogunu, bi niba baa yaa maadi leni a joaciama ki tua: ‹Baa mani ti po,› ki go yaa miadi leni a joabila ki tua: ‹Ŋoagini mani ti.›

³¹ Ku dasoangigu yaa cuo u mu, ku dakuongu mo baa kua le?»

³² Bi go den cuani nikpabilie ki baa taani ki kpa ba leni Jesu.

³³ Ban den pundi ban yi yaa kaanu “ku Yukuokuogu”, bi den joani Jesu li dapoanpoanli po, ki go joani bi nibiadiliediba yeni moko a dapoanpoana po, yendo Jesu jienu po, olielo mo o ganu po.

³⁴ Jesu den yedi: «N Baa, tieni bi po sugili, kelima baa bani ban tiendi yaala.» Bi den toani tiatia ki boagidi o tiayiekaadi.

³⁵ Ku niligu den se likani ki diidi. Jufinba yudanba den ñuadi Jesu ki tua: «O den gaani nitoaba, o yaa tie Kilisiti U Tienu n Gandi Yua, wan gaa o yuli.»

³⁶ Bi minteela moko den ñuadi o, ki cua o kani ki teni o mi ñinmiligima, ki yedi:

³⁷ «A yaa tie Jufinba bado, ŋan gaa a yuli.»

³⁸ Yaa diani n tie ne den taabi ki yiini o yuli po: «One n tie Jufinba bado.»

³⁹ Bi nibiadiliediba yaaba n den juani a dapoanpoana po yeni siiga yendo den sugi Jesu, ki yedi: «Ŋaa tie U Tienu n Gandi Yua ka? Gaa a yuli ki nan gaa timo!»

⁴⁰ Ama o lielo den funi leni o ki yedi: «Ŋaa jie U Tienu, fini yua n taa cuonu leni one?

⁴¹ Tinba yaa cuonu wani tiegi, kelima ti gaa ti tuona panpaani yo. Ama one wani naa tieni bonbiadiliba kuli.»

⁴² Lani, o den yedi: «Jesu, ŋan tiadi n po a yaa ti cua ki diedi a diema yaa yogunu.»

⁴³ Jesu den guani ki yedi o: «N waani a moamoani, dinla liga a baa yaa ye leni nni ŋalijani.»

Jesu kuuma

⁴⁴ Lan den bua ki pundi u yensiicocolu, u yienu den biigi, ke li biigili tieni ki tinga nni kuli, ki yaa caa hali li yenlebidili.

⁴⁵ U Tienu diegu kpalidoaginkaabu den padi siiga nni, ki boagidi kaanilie.

⁴⁶ Jesu den kpaani ki yedi: «N Baa, n guani n miali a nuu nni.» Wan den yedi yeni, o den fuo ki jiidi.

⁴⁷ Minteela kobiga yudaano n den laa yaala n tieni, o den pagi U Tienu ki yedi: «Moamoani, o joa na den li tiege!»

⁴⁸ Yaa niligu n den taani likani ki diidi, n laa yaala n tieni, bi den lebidi ki kuni ki pua bi bena.

⁴⁹ Yaaba n den bani Jesu kuli leni yaa puoba n den ciani o hali Galile, den se foagima ki nua yaala n tiendi.

Jesu piinma

^50-51 Jufinba cancantieba taancianli yaaba siiga yendo den ye ke bi yi o Josefi, yaa nilo n ŋani ki tiegi, ki tie Jufinba dogu Alimate yua. O den guu ke U Tienu diema cuama. Waa den taani leni o lieba bi jagili leni ban den tieni yaala kuli nni.

⁵² Laa joa den gedi Pilati kani ki mia o ke wan teni o Jesu gbanandi.

⁵³ O den jiini o li dapoanpoanli po, ki bobini o bu kpalipienbu, ki duani o li takuli nni. Li den sua ke bi kpie li takuli yeni ku tangu po ki daa duani kpiemo kuli lienni.

⁵⁴ Landaali den tie U Tienu fuodima daali boginli. Li den sua ke mi fuodima daali cilima yogunu bua ki pundi.

⁵⁵ Bi puoba, yaaba n den ñani Galile ki ciani Jesu yeni, den ŋoadi Josefi ki laa li takuli leni wan duani Jesu maama.

⁵⁶ Lani, bi den guani bi denpo ki bogini yaa tibidi n pia u nuulumanu leni tulale. Mi fuodima daali bi den fuodi, nani li bali maama n bili maama.