Luki 22 - U TIENU MAAMA TILI 2013

Jesu fala leni o kuuma 22—23 Jufinba nikpiaga juogi ke bi baa kpa Jesu

¹ Yaa dupen n ki pia dabinli jaanma, yaama n yi mi Pendima jaanma, den nagidi.

² Bi kopadicianba yudanba leni li bali maama banda den lingi ban baa tieni maama ki kpa Jesu, kelima bi den jie ku niligu.

Juda tuo ke o baa janbi Jesu

³ Sutaani den kua Juda pali nni, wani ban go yi yua Isikarioti, yua n den tie bi piiga n niliediba siiga yendo.

⁴ O den gedi ki ban juogi leni bi kopadicianba yudanba leni U Tienu diegu jiidikaaba yudanba, wan baa tieni maama ki janbi Jesu, ki teni ban cuo o.

⁵ Bi pala den mangi boncianla, ke bi niani ke bi baa pa o i ligi.

⁶ O den tuo, ki ji lingi wan baa baa yaa folu ki janbi Jesu ki teni ba, ke ku niligu ki bani.

Jesu teni ke bi ŋanbi mi Pendima jaanjiema

⁷ Yaa dupen n ki pia dabinli jaanma dana siiga, lan den bili ban kodi mi Pendima jaanma pebiga yaa daali den pundi.

⁸ Jesu den soani Pieli leni Jan ki yedi ba: «Gedi mani ki ban ŋanbi ti po mi Pendima jaanjiema tin je.»

⁹ Bi den buali o: «A bua tin ŋanbi ma le?»

¹⁰ O den guani ki yedi ba: «Yi yaa kua u dogu nni yaa yogunu, yi baa tuogi o joa ke o bugi li ñincuali. Yin ŋoadi o ki ban kua wan baa kua yaa diegu nni,

¹¹ ki yedi likani diedaano: ‹Canbaa yedi: Mini leni n ŋoadikaaba n baa je mi Pendima jaanjiema yaa candieli nni, ye le?›

¹² O baa waani yi li dietuadili, yaali n yabi ke yaala n dagidi kuli ye lienni. Yin ŋanbi lankani.»

¹³ Bi den gedi ki ban sua ke li bonla kuli tie nani wan waani ba maama. Bi den ŋanbi mi Pendima jaanjiema.

O Diedo jiema

¹⁴ U yogunu n den pundi, Jesu den kali u saajekaanu kani, wani leni o tondiba.

¹⁵ O den yedi ba: «N bi bua hali boncianla ki taani leni yi ki je yaa Pendima jaanjiema n tie ne, hali ki daa laa fala.

¹⁶ N kadi ki waani yi, ke n kan go je ma hali li maalima n baa doagidi ki dudi U Tienu diema nni.»

¹⁷ Lani, o den taa ki tadiñokaaga ki tuondi U Tienu ki yedi: «Yikuli n gaa mani li bonñokaala na ki boagidi.

¹⁸ N yedi yi, dinla liiga, n kan go ño duven, hali U Tienu diema n baa cua yaa yogunu.»

¹⁹ O go den taa dupen ki tuondi U Tienu, ki cabidi ki teni ba ki yedi: «Line n tie n gbanandi, min puni yi yaadi. Yin yaa tiendi yeni, ki tiadi n po.»

²⁰ Ban den dini ki gbeni, o go den taa ki tadiñokaaga ki teni ba ki yedi: «Yaa bonñokaala n tie ne tie n soama, yaama n wuli yi po, ki teni ke U Tienu kuani leni yi o Ŋantaadipaano.

²¹ Ama diidi, yua n baa janbi nni, taani ki kaa leni nni u saajekaanu na.

²² O Joa Bijua caa nani lan diani ki bili o po maama. Ama fala baa yaa ye leni yaa nilo n baa janbi o.»

²³ Bi den cili ki buali biyaba, bi siiga yua n baa tieni laa bonla.

Bi ŋoadikaaba siiga yua n cie

²⁴ Mi niama den fii bi siiga, ke bi bua ki bandi bi siiga yua n cie bikuli.

²⁵ Jesu den yedi ba: «I nilanbuoli badiba die ba leni u paalu, yaaba n mabindi ba mo teni ke bi yi ba bi nitodikaaba.

²⁶ Lan da tie yeni yi yaa kani. Ama, yi siiga yua n cie yikuli n tua nani ki bonwaaga yeni, yua n tugi li yuli mo n tua nani o naacemo yeni.

²⁷ Ŋme n cie oyua, yua n kaa u saajekaanu kani, bi yua n tendi mi jieme? Yua n kaa ki baa je ka? Ama mini wani n ye yi siiga nani yua n tendi mi jiema yeni.

²⁸ Yinba, yi tie yaaba n den juuni ki ye leni nni n biigima kuli nni, ki pundi hali moala.

²⁹ Lani yaa po, nani n Baa n dini nni li bali maama, nmoko dini yi yene.

³⁰ Lani, yi baa yaa di ki go ñu n saajekaanu kani n diema nni, ki kaa i bali-kalikaani po, ki jia Isidayeli piiga n buoliedi buudi.»

Pieli baa ti nia ke waa bani Jesu

³¹ Jesu go den yedi: «Simon, Simon, Sutaani den mia ke wan baa u sanu ki yagi yikuli nani ban yagini ŋalikama maama yeni.

³² Die n mia U Tienu a po ke a dandanli n da bodi. A yaa ti lebidi ki guani n kani, ŋan yaa paagidi a kpiiba pala.»

³³ Pieli den guani ki yedi o: «N Daano, n bogini ki baa yaa ye leni a ba li kpaadidieli leni mi kuuma nni kuli.»

³⁴ Jesu den yedi o: «Pieli, n waani a, dinla ñiagu hali ke ku kootongu daa mua, a baa nia taalimitaa ke ŋaa bani nni.»

³⁵ Lani, Jesu den buali bikuli: «Min den soani yi, ke yii kubi ligiboagili, kaa kubi sancenboagili leni cacaadi yeni, yi den luo liba bi?» Bi den guani ki yedi o: «Liba kuli.»

³⁶ O den yedi ba: «Ama dinla liiga, yua n pia ligiboagili, wan taa li, yua n pia sancenboagili, wan mo n taa li, yua n ki pia jugisiega, wan kuadi o kpalibu ki daa.

³⁷ I Diani n yedi n po yaala: ‹Bi coadi ki taani o leni bi nikpaba,› baa tieni ki dudi moala.»

³⁸ Bi den yedi o: «Ti Daano, diidi ki le, jugisiemulie ye ne.» O den yedi ba: «Li dagidi.»

Jesu gedi ki ban jaandi Olivie Tiidi juali po

³⁹ Jesu den ñani ki gedi Olivie Tiidi juali po nani wan yen maani ki caa maama. O ŋoadikaaba den yegi leni o.

⁴⁰ Wan den pundi likani, o den yedi ba: «Yaa jaandi mani ke yin da ti kua mi tulinma nni.»

⁴¹ Lani, o den piadi bi kani nani o nilo n baa lugidi li tanli lin baa yaa bianu, ki gbaani ki jaandi ki tua:

⁴² «N Baa, a yaa tuo, ŋan ñani n kani yaa tadiñokaaga n tie ne min da ño, die lan da tua mini ka n bua yaala, kali fine n bua yaala.» [

⁴³ Lanyogunu maleki den ñani tanpoli ki doagidi o po o yuli ki paagi o pali.

⁴⁴ Li paboancianli den kubi o ke o jaandi ki pugidi. O tontonjena den tua nani mi soama yeni ki condi tiipo.]

⁴⁵ Wan den jaandi ki gbeni, o den guani o ŋoadikaaba kani ki sua ke bi goa, kelima bi paboanli po.

⁴⁶ O den yedi ba: «Be n teni ke yi goa? Fii mani ki yaa jaandi, ki da kua mi tulinma nni.»

Bi cuo Jesu

⁴⁷ Jesu n da den maadi, ku niligu den cua, ke ban yi yua Judasi, bi piiga n niliediba siiga yendo, ye bi liiga. O den nagini Jesu ki baa gobini o.

⁴⁸ Jesu den yedi o: «Judasi, a baa gobini o Joa Bijua yene ki janbi o?»

⁴⁹ Yaaba n den ye leni Jesu n laa yaala n baa tieni, bi den buali o ki yedi: «Ti Daano, tin pedi ba mu jugisiemu bi?»

⁵⁰ Bi siiga yendo den pedi ki joandi bi kopadicianba bado naacemo jientubili.

⁵¹ Jesu den yedi: «Cedi mani yeni.» O den sii o joa yeni tubili ki paagi li.

⁵² Lani, Jesu den yedi bi kopadicianba yudanba, U Tienu diegu jiidikaaba yudanba leni bi nikpela, bani yaaba n den taani ki cua ki baa cuo o: «Yi cua ki kubi kubi mu jugisiemu leni i gbiami, nani yi lingi o sanjialo yeni.

⁵³ Min den ye leni yi daali kuli U Tienu diegu nni, yii den cuo nni, ama moala yi yogunu pundi, ke li biigili paalu mo diedi.»

Pieli nia ke waa bani Jesu

⁵⁴ Bi den cuo Jesu ki gedini bi kopadicianba bado diegu nni. Pieli den ŋua foagima.

⁵⁵ Ban den cuoni u mu u luolu siiga, ki taani ki kaa ki yie, Pieli den kali leni ba.

⁵⁶ Yaa jafanba n tuuni ku diegu yeni niinni siiga yendo den laa o, ke o kaa u mu kani, ki noanli o ki yedi: «O joa na moko den ye leni o.»

⁵⁷ Pieli den nia ki yedi o: «Aa-a, o pua ne, mii bani o.»

⁵⁸ Lan yeni waamu, nitoa den laa o ki yedi: «Amoko tie bi niba yeni siiga yua yo.» Pieli den guani ki yedi: «Aa-a, mii tie o.»

⁵⁹ Lan den waagi waamu, nitoa moko den ñii ki yedi: «Moamoani lige, o joa na moko den ye leni o, kelima o tie Galile yua yo.»

⁶⁰ Pieli den guani ki yedi o: «Aa-a, mii bani ŋan maadi yaala.» Lanyogunu hali ke o da maadi, ku kootongu den mua.

⁶¹ O Diedo den jigidi ki diidi Pieli. Pieli ji den tiadi wani o Diedo n yedi o yaa maama na: «Ku naa ñiagu, hali ke ku kootongu daa mua, a baa nia taalimitaa ke ŋaa bani nni.»

⁶² O den ñani ki ban mua leni li paboanli.

Bi sugi ki go pua Jesu

⁶³ Yaaba n den kubi Jesu den ñuadi o ki pua o,

⁶⁴ ki fini o nunga li cabili ki tua: «Ŋme n pua ŋa? Bandi o!»

⁶⁵ Bi go den sugi o sugitoadi boncianla.

Jesu sedi bi cancantieba nintuali

⁶⁶ Lan den yendi, Jufinba cancantieba taancianli, lani n tie bi kopadicianba yudanba, li bali maama banda leni a nikpela, den taani ki gedini Jesu bi taanli kani ki yedi o:

⁶⁷ «A yaa tie U Tienu n Gandi Yua, ŋan waani ti.» Jesu den guani ki yedi ba: «N yaa waani yi la, yi kan dugi n maama po.

⁶⁸ N yaa buali yi liba mo, yi kan guani puu.

⁶⁹ Die dinla liiga, o Joa Bijua baa yaa kaa U Paaciamu Daano U Tienu jienu po.»

⁷⁰ Bikuli den yedi o: «Lanwani, a tie U Tienu Bijua yo?» O den guani ki yedi ba: «Yinba yi ba n yedi. N tie wane.»

⁷¹ Lani yaa po, bi den yedi biyaba: «Siedinba ki go tie tiladi. Tinba ti ba, ti gbadi la o ñoabu nni.»