Luki 21 - U TIENU MAAMA TILI 2013

O kpepuoluodo paabu

¹ Jesu den diidi ki laa ke a piada kpiendi bi paabu U Tienu diegu ligitiagu nni.

² O go den laa ke o kpepuoluodo mo kpieni falinolie lienni.

³ O den yedi: «N waani yi i moamoani, o kpepuoluodo na puni ki cie yaaba n sieni kuli,

⁴ kelima bi ñani bi ŋalimani nni bi ligijodi ki kpieni, ama wani leni o luoma kuli, o ñani wan pia yaala kuli ki baa je, ki kpieni.»

Jesu pua saawali ke bi baa bolini U Tienu diegu

⁵ Bi nitianba den maadi U Tienu diegu maama, ban den maa leni yaa tanŋama leni bi niba n den puni U Tienu yaa paabu, ki bogidi gu. Jesu den yedi:

⁶ «A dana baa ti cua ke yin nua yaala na, bi kan ti ŋaa baa tanyenli n sieni ki yaa maa li lieli po. A kuli baa padi ki baa.»

Yaa fala n baa ti cua mi juodima yogunu

⁷ Bi den buali Jesu: «Canbaa, u laa yogune ke li baa cua? Be n baa tua li sinankeeno ke li yogunu bua ki pundi?»

⁸ Jesu den guani ki yedi: «Fangi mani yi yula ke ban da boandi yi, kelima bi niba boncianla baa ti cua n yeli nni ki yedi: ‹Mini n tie U Tienu n Gandi Yua›, ki go yedi: ‹U yogunu nagini.› Yin da ŋoadi ba mani.

⁹ Yi yaa ti gbadi ke bi maadi bu toabu maama, ki go gbadi ke bi maadi mi janjanma maama, yin da tuo lan jieni yi, kelima laa bonla baa kpa cua tiladi, ama lanyogunu da ka baa tua mi juodima.»

¹⁰ O go den yedi ba: «Nibuolu baa fii ki tuogi leni nibuoto, diema mo baa fii ki tuogi leni dietoama.

¹¹ Mi tindigibicianma baa yaa tiendi, mi koncianma leni i yianbiadipuodike moko baa yaa tiendi i kaantiami, li bonlidinkacianla yaala n pia i jeje leni yaa sinankeene n yabi baa ña tanpoli ki yaa tiendi.

¹² Ama hali ke lani kuli daa tieni, bi baa cuo yi ki waani yi fala, ki teni yi li bali maama bangima diena yudanba, ki kuani yi a kpaadidiena nni, ki gedini yi bi badicianba leni guveneerinba bujiali kani, kelima n yeli po.

¹³ Likuli baa pa yi u sanu yin tieni n po siedi.

¹⁴ Ama yin yaa bani yi yama nni ke laa tie yin tuodi ki kpaagi yin baa ti maadi yaala ki gaa yi yula ka.

¹⁵ Mini n ba n baa ti pa yin baa maadi leni yaa yanfuoma ke yi koanginkaaba siiga, ba yendo kan fidi ki nia ki yie ma.

¹⁶ Ba yi danba, yi kpeliba, yi waamu, yi kpiiba leni yi danlinba baa yaa janbidi yi ki tendi yi yi yibalinba. Bi baa kpa yi siiga bi tianba.

¹⁷ Bi niba kuli baa nandi yi kelima n yeli po,

¹⁸ die yi yudi, ba yuyengu kan baa tiipo.

¹⁹ Yi yaa juuni yi baa gaa yi miana.

Jesu waani Jerusalemi bolinma

²⁰ Yi yaa ti laa ke bi toatieba lindi ki cebini Jerusalemi, yin bandi lanyogunu ke u bodima nagidi.

²¹ Lanyogunu, yaaba n ye Jude nni n sani ki gedi a juana po, yaaba n ye Jerusalemi tugu nni n ña lienni ki foagidi, yaaba n ye i kuani po n da kua u dogu nni.

²² Laa dana baa yaa tie li pantuuli dana, ke yaala n den diani kuli n tieni ki dudi.

²³ Fala baa yaa ye leni yaa puoba n punbi leni yaaba n da ŋaandi laa dana nni, kelima o falaciamo baa tieni mi diema na niinni, U Tienu pabienli cuonu baa jiidi u naa nibuolu po.

²⁴ Bi yibalinba baa kpa ba leni mu jugisiemu, ki gedini yaaba n sieni ti yonbidi i nibuoli kuli nni. I nilanbuoli yaaba baa paadi Jerusalemi, ki ŋmaa u hali U Tienu n bili bi po yaa yogunu n dudi.

U Tienu bebe n bani o Joa Bijua cuama yogunu

²⁵ Sinankeeninba baa tieni u yienu, o ŋmaalo leni a ŋmabila nni kuli. Tinga nni mo ti yanyagiciandi baa teni i nibuoli kuli n jie ki womi, kaa bani ban baa tieni yaala kelima mi ñincianma fuciangu po leni mi ñinguona fiipuama po.

²⁶ Tanpoli paaciami mo baa digibi. Lani yaa po, bi niba yaa kpaagi yaala n baa tieni ŋanduna nni, bi baa pabi ti jawaandi po.

²⁷ Lani, bi baa le ke o Joa Bijua ye ku tawaligu nni ki kpendi leni u paalu leni ti kpiagiciandi.

²⁸ Laa bonla yaa cili ki tiendi, yin sedi mani ki yaadi yi yula, kelima yi faabima nagidi.»

Bu kankanbu kpanjama

²⁹ Lani, Jesu den pua ba mi kpanjama ki yedi: «Diidi mani bu kankanbu leni yaa tiidi n sieni kuli.

³⁰ I beni yaa bundi yaa yogunu, yi bani ke ku siagu nagini.

³¹ Li go tie yene, yi yaa laa ke laa bonla tiendi, yin bandi ke U Tienu diema nagini.

³² N waani yi i moamoani, ke mi naa nifiima kuli kan pendi ke lani kuli ki tieni.

³³ Tanpoli leni ki tinga kuli baa pendi, ama n maama kan pendi abada.

Guudi mani o Joa Bijua cuama

³⁴ Fangi mani yi yula, ki da tuo mi jekandikaama, li dañokandikaali leni mi yema yanyagidi n fie yi yantiana, ki guli yi ke landaali cuama n da ludi yi.

³⁵ Landaali baa cua nani ku diagu yeni ki ludi ki cuo yaa niba n ye ŋanduna nni kuli.

³⁶ Lani yaa po, yin yaa guu, ki yaa jaandi U Tienu yaa yogunu kuli, ke yin fidi ki ña yaa bonla n baa cua kuli nni, ki sedi o Joa Bijua nintuali.»

³⁷ Daali kuli Jesu den bangi bi niba U Tienu diegu nni, ñiagu mo kuli, o yen ña ki caa ki ban dua ki ye Olivie Tiidi juali po.

³⁸ Bi niba kuli den yagidi ki kpendi o kani U Tienu diegu nni, ki baa cengi o maama.