Luki 20 - U TIENU MAAMA TILI 2013

Jufinba buali Jesu o bali n ñani naani

¹ Dayenli Jesu den kaa ki bangi bi niba U Tienu diegu nni, ki wangi ba o Laabaaliŋamo. Bi kopadicianba yudanba, li bali maama banda leni a nikpela den cua o kani,

² ki yedi o: «Waani ti yaa bali yaa po ke a tiendi li naa bonla. Ŋme n puni a laa bali?»

³ Jesu den guani ki yedi ba: «Nmoko baa buali yi bonyenla, yin waani nni.

⁴ Jan n den batisi bi niba yeni, o den baa laa bali tanpoli po, bi bi nisaaliba kane?»

⁵ Bi den bungi bi pala nni ki tua: «Ti yaa yedi ke o baa li tanpoli po, o baa yedi: ‹Be yaa po ke yii daani o maama?›

⁶ Ti yaa yedi: ‹Bi nisaaliba yaa kani mo›, bi niba kuli baa lugidi ti a tana, kelima bi nua ke Jan tie saawalipuale.»

⁷ Lani yaa po, bi den guani ki yedi Jesu ke baa bani Jan bali n ñani naani.

⁸ Jesu den yedi ba: «Nmoko kan waani yi yaa bali yaa po ke n tiendi laa bonla.»

Bi koaguudiba kpanjama

⁹ Li yaa puoli, Jesu den pua bi niba mi naa kpanjama ki yedi: «O joa den ŋuu duven tiidi kuanu, ki guuni o kuanu bi koaguudiba ki fii ki gedi u dogu ki baa n waagi lipo.

¹⁰ Li yogunu n den pundi, o den soani naacenyendo bi koaguudiba yeni kani, ke ban teni o o biinu, o kuanu bonbaakaala nni. Ama bi koaguudiba den pua o i gbiami, ki yaadi o nukuomu.

¹¹ O go den soani naacentoa, bi den pua omoko i gbiami, ki fiagi o ki yaadi o nukuomu.

¹² O go den soani o naacentaalo mo. Bi den poagili o, ki deli o.

¹³ O koadaano den yedi o yuli: ‹N baa tieni lede? Moala, n ji baa soani n bijabuadige. Daalinba, bi baa fangi wani wani.›

¹⁴ Ama bi koaguudiba n den laa o, bi den yedi biyaba: ‹One n tie o faajielo, tin kpa o, li faali n tua ti yaali.›

¹⁵ Bi den ñani o u kuanu puoli po ki kpa o ki luni. Lanwani, o koadaano baa soani ba lede?

¹⁶ O baa cua ki bolini laa koaguudiba, ki teni o kuanu nitoaba.» Ban den gbadi lani, bi den yedi: «U Tienu n da tuo line n tieni.»

¹⁷ Jesu den diidi ba ki yedi: «Lanwani, yaala n diani na bundi be? Bi tanmaaba n den yie yaa tanli, Lini n tua li tanpuukaali.»

¹⁸ Jesu den juodi ki yedi: «Yua n baa laa tanli po kuli baa kua kua, lin baa yua yaa po mo baa midi midi.»

¹⁹ Lanyogunu liga bi kopadicianba yudanba leni li bali maama banda den moandi ki baa cuo Jesu, kelima bi den bandi ke o pua mi kpanjama yeni ki bagi bane, die bi den jie bi niba.

Loma badiciamo Sesari lubili

²⁰ Bi den kpaagi Jesu, ki soani yaa niba n kpali ke bi tiegi, ke ban dia o ku madiagu ki cuo o leni maamiba, ki teni o bi bujiaba leni guveneeri, wan bu ki cuo o.

²¹ Laa niba den buali o ki yedi: «Canbaa, ti bani ke ŋan maadi ki bangi yaala tiegi, ŋaa gagidi oba bi niba siiga, a bangi bi niba U Tienu sanŋoadima leni i moamoani.

²² Naani li pia u sanu tin pa Loma badiciamo Sesari li lubili, bi laa pia?»

²³ Jesu den bandi bi fanu ki yedi: «Min le li kujapienli.

²⁴ Ŋme yaa nannanli leni ŋme yaa diani n maa li po na?» Bi den guani ki yedi o: «Sesari yaale.»

²⁵ O den yedi ba: «Lanwani, pa mani Sesari, yaala n tie Sesari yaala, ki pa U Tienu mo, yaala n tie U Tienu yaala.»

²⁶ Baa den fidi ki cuo o o maama nni bi niba nintuali. O maguankaama yeni den paki ba, ke bi ŋmini suo.

Sadusieninba buali bi tinkpiba fiima po

²⁷ Sadusieninba yaaba n tua ke bi tinkpiba fiima ki ye, bi tianba den cua Jesu kani ki buali o ki yedi:

²⁸ «Canbaa, Musa den diani ki bili ti po li bali maama nni, ki yedi: ‹O nilo kpelo yaa kpe, ki pia pua kaa pia biga, wan taa o kpelo yeni pua ki baa o kpelo po u buolu.›

²⁹ To, jabilele den ye ki taa baa. O kpelo den taa o pua ki kpe kaa baa biga.

³⁰ O lielo den taa o kpepuoli ki kpe. O taalo mo den taa o.

³¹ Li den tua yeni, ke bani jabilele yeni kuli den kpe kaa baa biga.

³² Li yaa puoli, o pua mo den ti kpe.

³³ Lanwani, bi tinkpiba fiima yogunu, o pua yeni baa tua ŋme yaa yua yo? Bani jabilele yeni kuli, yendo yendo den taa o ke o tua o pua.»

³⁴ Jesu den yedi ba: «Ŋanduna na jaba taani bi puoba, bi puoba mo kuni bi jaba.

³⁵ Ama yaaba n dagidi ki baa fii bi tinkpiba siiga ki kua yaa yogunu n kpendi yaa yema nni, bi jaba kan go taa puoba, bi puoba mo kan go kuni jaba.

³⁶ Ama bi baa yaa tie nani malekinba yeni, ki kan go kpe. Bi tie U Tienu bila, wan fiini yaaba bi tinkpiba siiga.

³⁷ Musa den doagidi ki waani ke bi tinkpiba baa fii, wan den laa yaa fatuugu n den co u mu yaa yogunu. Lankani, o den yini o Diedo: Abalahama, Isaaka leni Jakob Tienu.

³⁸ U Tienu naa tie tinkpiba Tienu, ama o tie yaaba n fo Tienu yo, kelima o yaa po wani, bikuli fo.»

³⁹ Li bali maama banda siiga bi tianba den yedi: «Canbaa, a maadi bonŋanla.»

⁴⁰ Baa go den pia papaali ki go buali o bualiba kuli.

Kilisiti n tie yua

⁴¹ Jesu go den yedi ba: «Li gaa lede ke bi niba tua ke U Tienu n Gandi Yua tie Davidi Bijua?

⁴² Davidi wani o ba maadi Pisomi tili nni ki yedi: ‹O Diedo den yedi n Diedo: Kali n jienu po,

⁴³ Hali min baa teni a yibalinba N tua a taaŋmaakaanu.›

⁴⁴ Davidi oba yini o o Diedo, li nan go gaa lede ke o tie wani Davidi bijua?»

Jesu jaligi li bali maama banda

⁴⁵ Ku niligu kuli n den cengi, Jesu den yedi o ŋoadikaaba:

⁴⁶ «Fangi mani yi yula leni li bali maama banda, bani yaaba n bua ki yaa la a liadiciama, ki go bua ban yaa fuondi ki kpiagidi ba mu daamu nni, ki go bua ki yaa kaa i nician-kalikaani li bali maama bangima diena nni, ki go bua yaa kaani n gagidi mi jecianma kani.

⁴⁷ Bi janbidi a kpepuona ki fenli bi diena, ki go jaandi mi jaandifoagi, ki kpali ke bi tie jajaandimoana. Ti buudi yogunu, bi yaa cuonu baa gagidi ki yaa bia ki cie.»