Luki 2 - U TIENU MAAMA TILI 2013

Jesu Kilisiti madi

¹ Lanyogunu, Sesari Ogusiti den ñani li ñoamabonli ki yadi i kaani kuli, ki yedi ke ban coadi Loma diema yaaba kuli.

² Laa coadikpiali den tieni Kilinusi n den tie Siiri diema guveneeri yaa yogunu.

³ Yuakuli den caa ke ban coadi o o dandogu nni.

⁴ Josefi moko den fii Nasareti dogu yuu n ye Galile diema nni, ki gedi Jude diema Davidi maadogu Betelemi nni, kelima o den tie Davidi puoliŋuanu leni o diegu nni yua.

⁵ O den gedi ke ban ban coadi wani leni o toginaa Mariyama, yua n punbi.

⁶ Ban den ye Betelemi, o maayogunu den pundi.

⁷ O den mali o posabiga, bonjaga. O den bobini o ti canpanditiadi ki duani o ku yankpaku nni, kelima kaanu ki den ye bi po ku candiegu nni.

Bi yankpaaba leni malekinba

⁸ Laa tinkunu nni bi yankpaaba den ye ku muagu nni ki kpa bi yandi ku ñiagu.

⁹ O Diedo maleki den doagidi o yuli bi kani. O Diedo kpiagidi mo den yendi ki lindi ba, ke ti jawaandi cuo ba boncianla.

¹⁰ Maleki den yedi ba: «Da jie mani, kelima n cuani yi po o laabaaliŋamo, yua n baa tua bi niba kuli po pamancianli.

¹¹ Dinla, Davidi dogu nni, bi mali yi po o Candaano, yua n tie Kilisiti, o Diedo.

¹² Line n baa yaa tie yaa maalima n baa teni yin bandi o. Yi baa le ki canpandiga ke bi bobini o ti canpanditiadi, ki duani o ku yankpaku nni.»

¹³ Lanyogunu, malekinba boncianla den doagidi bi kani ki taani leni maleki yeni ki pagi U Tienu ki tua:

¹⁴ «U Tienu n baa ti kpiagidi hali tanpolijoma, Yaa niba n mangi o pali ki tinga nni N yaa pia mi yanduanma.»

Bi yankpaaba gedi Betelemi

¹⁵ Malekinba n den ñani bi kani ki guani tanpoli po, bi yankpaaba den yedi biyaba: «Tin gedi mani tonma hali Betelemi ki ban le yaala n tieni, o Diedo n waani ti yaala.»

¹⁶ Bi den jaligi ki gedi ki lingi ki laa Mariyama leni Josefi, ki go laa ki canpandiga ke o dua ku yankpaku nni.

¹⁷ Ban den laa likuli, bi den togidi maleki n den waani ba yaala ki canpandiga po.

¹⁸ Bi yankpaaba n den togidi yaala, den paki yaaba n gbadi kuli.

¹⁹ Mariyama den kubi laa togida kuli o pali nni, ki kpaagi li po.

²⁰ Bi yankpaaba den lebidi ki guani ki kpiagidi U Tienu, ki go pagi o ban gbadi ki go laa yaala kuli po, ke likuli den tie nani maleki n waani ba maama.

Bi kuani Jesu ku koanciagu

²¹ Ki canpandiga yeni madi daniili n den pundi, bi den kuani o ku koanciagu, ki cili o yeli Jesu, maleki n den waani ba yaa yeli hali ke o naa daa punbi o.

Jesu danba cuani o U Tienu diegu nni

²² Mi wali-ŋanbima dana n den pundi, nani Musa bali maama n bili maama, bi den gedini ki canpandiga Jerusalemi, ki baa gagidi o o Diedo po,

²³ nani lan diani maama o Diedo bali maama nni: «Bonjakpiaga kuli, bi baa gagidi o o Diedo po.»

²⁴ Bi go den cuani nani o Diedo bali maama n bili ban baa padi U Tienu po yaala, lani n tie kpaajefanmulie, yaa ka kpaajenawuundilie.

²⁵ Li yogunu o joa den ye Jerusalemi ke bi yi o Simeon. O den tie niteginka ki go fangi U Tienu, ki guu yua n baa baagi Isidayeli buolu. U Tienu Fuoma Yua den ye leni o.

²⁶ Li den sua ke U Tienu Fuoma Yua tuodi ki doagidi ki waani o ke o kan kpe kaa laa o Diedo n Gandi Yua.

²⁷ U Tienu Fuoma Yua den fiini o ke o cua U Tienu diegu nni. Ki canpandiga Jesu danba n den cuani o ki baa tieni o po U Tienu bali maama n bili yaala,

²⁸ Simeon den gaa o ki ŋmabi, ki pagi U Tienu ki yedi:

²⁹ «Moala n Diedo, Ŋan pa mini a naacemo N kuni leni mi yanduanma, Kelima a kuani a ñoanianu.

³⁰ N nuni laa ŋan soani ti po yaa faabima,

³¹ Ŋan bogini yaama Ke ŋanduna nibuoli kuli baa le,

³² Yaama n tie yenma ki baa yendi I nibuoli kuli ki teni ban bandi a, Ki go tie ti kpiagidi A niba Isidayeli buolu po.»

Simeon n pua yaa saawalo

³³ Li den paki Jesu baa leni o naa leni Simeon n maadi yaa maama o po.

³⁴ Simeon den gaali ba ki yedi o naa Mariyama: «Diidi ki le, U Tienu bili ke ki naa biga baa teni ke Isidayeli buolu siiga, niba boncianla n baa, niba boncianla mo n fii. O go baa yaa tie U Tienu sinankeene bi nitianba n baa yie yua,

³⁵ kelima o baa teni bi niba boncianla n jagi yaala bi pala nni n doagidi. Fini mo, yaa paboanli n tie nani ki jugisiega yeni, n baa muu a pali.»

O saawalipualo Anni maama

³⁶ O saawalipualo den ye ki yi Anni ki tie Fanueli bisalo Aseri buolu yua, ki den kpeligi boncianla. O den tieni binalele leni o calo hali o jafandi nni.

³⁷ O ji den tie kpepuoli ki pia piinii n binanaa. Waa den ña U Tienu diegu nni. O den tuuni U Tienu po, u yensiinu leni ku ñiagu kuli, mi ñoalolima leni mi jaandi nni.

³⁸ Lanyogunu liga, o den nagini bi kani ki pagi U Tienu ki maadi yaaba n gu Jerusalemi daafaabima kuli Jesu maama.

Josefi leni o niba lebidi ki guani Nasareti

³⁹ Josefi leni Mariyama n den tieni o Diedo bali maama n bili yaala kuli ki gbeni, bi den lebidi ki kuni bi dogu Nasareti po, Galile diema nni.

⁴⁰ Ki biga den fandi ke o gbanmanu pugidi. O den pia mi yanfuoma boncianla, U Tienu ŋanbili mo den ye leni o.

Jesu makpiama U Tienu diegu nni

⁴¹ Jesu danba den maani ki caa Jerusalemi binli kuli mi Pendima jaanma yogunu.

⁴² Jesu n den pundi piiga n binalie, bi den gedi Jerusalemi laa jaanma po, nani ban maani ki tiendi maama.

⁴³ Mi jaanma dana n den pendi ke bi guani ki kuni, ki biga Jesu den sedi Jerusalemi. O danba ki den faami.

⁴⁴ Nani ban den tama ke o ye leni bi santagilieba yeni, bi den cuoni damunli ki lingi o bi kpiiba leni bi bankaaba kuli kani.

⁴⁵ Ban ki den laa o, bi den lebidi ki guani Jerusalemi ki baa n lingi o.

⁴⁶ Li dataali, bi den laa o U Tienu diegu nni, ke o kaa U Tienu bali maama bangikacianba siiga, ki cengi bi maama ki go buali ba i buali.

⁴⁷ Li den paki yaaba n gba o maama kuli kelima o yanfuoma leni o maguankaama po.

⁴⁸ O danba n den laa o, li den paki ba boncianla, ke o naa yedi o: «N biga, be n teni ke a tieni ti line? Diidi, a baa leni mini kuli den ye leni ti yanyagiciandi ki lingi a.»

⁴⁹ O den yedi ba: «Be n teni ke yi lingi nni? Yii bani ke li tie tiladi min yaa ye n Baa diegu nni?»

⁵⁰ Ama baa den gaa wan yedi ba yaala.

⁵¹ O den yegi leni ba ki kuni Nasareti, ki tuo ki ŋua bi maama. O naa den kubi laa bonla kuli o pali nni.

⁵² Jesu den fandi ki go kpedi ke o yanfuoma pugidi. U Tienu pali leni bi niba yaa pala kuli den mani o po.