Luki 19 - U TIENU MAAMA TILI 2013

Sake maama

¹ Lani n pendi, Jesu den kua Jeriko dogu nni ki cuoni ki poandi u niinni.

² O joa den ye likani ki tie piado, ke bi yi o Sake, ki tie bi lubigaaba yudanba siiga nni yendo.

³ O den moandi ki baa bandi yua n tie Jesu, ama wan koabi maama, ke ku niligu mo nan yabi yeni, waa den fidi ki laa Jesu.

⁴ Lani, o den sani ki gaa liiga ki doni yaa tibu n yi sikomori, ke o baa le Jesu, kelima o den baa tagi ki pendi lankane.

⁵ Jesu n den pundi likani, o den yaadi ki diidi o ki yedi: «Sake, jiidi tontoni kelima li tie tiladi min tundi a denpo dinla.»

⁶ O den jaligi ki jiidi ki gaa o cangu leni li pamanli.

⁷ Bi niba kuli den laa lani, ki yenbidi ki tua: «O joa na gedi ki ban cani u tagibiadu daano.»

⁸ Sake den sedi o Diedo nintuali ki yedi o: «Canbaa, diidi, n baa pa a luoda n piama boagidima. N yaa den janbi yua ki gaa o kani bonliba mo, n baa guani o la taaliminaa.»

⁹ Jesu den yedi o: «Mi tindima kua ku naa diegu nni dinla, kelima one moko tie Abalahama puoliŋuanu yo.

¹⁰ O Joa Bijua cua ki baa lingi ki go faabi yaaba n yaadi.»

Naacenbitaa kpanjama

¹¹ Bi niba n den cengi laa maama, Jesu go den pua mi kpanjama, kelima o den nagi leni Jerusalemi ke bi niba tama ke U Tienu diema baa doagidi lanyogunu lige.

¹² Lani yaa po, Jesu den yedi: «O badijoa den gedi yaa dogu n foagi, ki baa n je li bali ki guani ki kpeni.

¹³ Hali ke o daa gedi, o den yini o naacenba siiga bonba piiga, ki teni ba wula kujapiena piiga, ki yedi ba: ‹Yaa tiendi mani u kpendu, hali min baa guani ki kpeni ne.›

¹⁴ Ama o dogu nni yaaba den nani o ki yuandi ki soani o puoli bi tondiba ke ban ban yedi o: ‹Tii bua yaa joa n tie ne n yaa die ti.›

¹⁵ To, bi den dini o badijoa yeni li bali, ke o guani ki kpeni o dogu nni. O den yini bi naacenba yaaba ke o den teni i ligi yeni, ki baa bandi ban den kpendi ki baa yaala.

¹⁶ O nikpialo den cua ki yedi: ‹N daano, a wula kujapienli cuani ti ñuadi wula kujapiena piiga.›

¹⁷ O bado yeni den yedi o: ‹Li ŋani, n naacenŋamo, a teni ke n fidi dugi a po li bonwaala nni, lanwani, n dini a li bali ŋan yaa die dociami piiga.›

¹⁸ O naacenlielo den cua ki yedi: ‹N daano, a wula kujapienli cuani ti ñuadi wula kujapienamuu.›

¹⁹ O canbaa den yedi o: ‹N dini amoko li bali, ŋan yaa die dociamimuu.›

²⁰ Naacentoa moko den cua ki yedi: ‹N daano, gaa a wula kujapienli, n den gbini li li cabili nni ki bili.

²¹ N den jie ŋa, kelima a pia ki mabinga, ki taani ŋan kaa bili yaala, ki yendi ŋan kaa buli yaala.›

²² O bado den yedi o: ‹O naacenbiado na, n cuo ŋa a maceli nni. A den bani ke n tie yaa nilo n pia ki mabinga, ki taani min kaa bili yaala, ki go yendi min kaa buli yaala.

²³ Be nan teni ke ŋaa den bili n ligi ku ligidiegu nni, ke n yaa guani ki kpeni, min bi gaa yi leni ti ñuadi?›

²⁴ Lani, o den yedi yaaba n ye likani: ‹Gaa mani o kani li wula kujapienli yeni, ki teni yua n pia wula kujapiena piiga yeni.›

²⁵ Bi den guani ki yedi o: ‹Ti daano, o peli ki pia wula kujapiena piiga.›

²⁶ O den guani ki yedi: ‹N waani yi i moamoani ke bi baa pa ki pugini yua n pia kuli, ama yua n ki pia, bi baa gaa o kani ba wan pia yaala.

²⁷ N yibalinba mo, bani yaaba n kaa den bua nni leni li bali yeni, cuani ba mani ki kpa ba n nintuali.› »

Jesu tuonli Jerusalemi dogu nni 19.28—21.38 Jesu kua Jerusalemi

²⁸ Jesu n den maadi laa maama, o den gaa liiga ki do ki caa Jerusalemi.

²⁹ Wan den nagidi Betifase leni Betani yaa dobila, ki kuu Olivie Tiidi juali, o den soani o ŋoadikaaba siiga nibilie ki yedi ba:

³⁰ «Suagi mani ki gedi yaa dobiga n ye liiga na. Yi yaa baa kua lienni yaa yogunu, yi baa le yaa ŋunbisaagili ke oba daa jagini li, ke li luo. Yin lodi li ki cuani na.

³¹ Nilo yaa buali yi: ‹Be n teni ke yi lodi o?› Yin yedi o: ‹Ti Daano n bua o.› »

³² Bi tondiba yeni den gedi ki ban sua ke likuli tie nani Jesu n bi yedi ba maama.

³³ Ban den lodi li ŋunbisaagili yaa yogunu, li danba den yedi ba: «Be n teni ke yi lodi li ŋunbisaagili na?»

³⁴ Bi den guani ki yedi: «Ti Daano n bua o.»

³⁵ Lani, bi den cuani o Jesu kani, ki maani bi kpaliti o po, ki teni ke Jesu jagini.

³⁶ Jesu n den jagi ki cuoni ki suagi liiga, bi niba ladi bi tiadi u sanu nni.

³⁷ Wan den nagidi Jerusalemi ki ji Olivie Tiidi juali, o ŋoadikaaba yaaba n yabi den ye leni li pamanli ki kpaani ki pagi U Tienu, kelima ban laa yaa bancianma kuli po.

³⁸ Bi den tua: U Tienu n seligi o bado Yua n kpendi wani o Diedo yeli nni. Mi yanduanma n yaa ye tanpoli po. U Tienu yua n ye hali tanpolijoma n baa ti kpiagidi.

³⁹ Ama Farisieninba bi tianba yaaba n den ye ku niligu siiga den yedi Jesu: «Canbaa, fu leni a ŋoadikaaba ban suoni.»

⁴⁰ Jesu den guani ki yedi ba: «N waani yi, bi yaa suoni, a tana baa kpaani.»

Jesu buudi Jerusalemi po

⁴¹ Jesu n go den nagidi Jerusalemi ki laa u, o den buudi upo,

⁴² ki yedi: «Ŋain, amoko yaa bi bani dinla ŋan baa tieni maama ki baa mi yanduanme...! Ama moala li nan duagi a nuni po.

⁴³ Fala dana baa cua a po, a yibalinba baa kpaa li toanagili ki lindi ki cebini a, ki baa ŋa,

⁴⁴ ki bolini a, fini u dogu yeni leni a niba kuli, ki mudi a diena, ki kan ŋaa ba tanyenli n yaa maa liyali po. Lani kuli baa tieni, kelima ŋaa den bandi U Tienu n cua ki baa faabi a yaa yogunu.»

Jesu kua U Tienu diegu nni

⁴⁵ Jesu den kua U Tienu diegu nni, ki deli ki ñani yaaba n kuadi,

⁴⁶ ki tua ba: «Li diani ki yedi: ‹N diegu baa yaa tie li jaandieli, ama yinba wani teni ke li tua a suuda wuonkaanu.› »

⁴⁷ Daali kuli Jesu den bangi bi niba U Tienu diegu nni. Bi kopadicianba yudanba, li bali maama banda leni bi yudanba den lingi ki baa kpa o.

⁴⁸ Ama baa den bani ban baa gaa maama ki kpa o, kelima bi niba kuli den cengi o maama leni li fangili boncianla.