Luki 18 - U TIENU MAAMA TILI 2013

Li kpepuoli leni o bujialo kpanjama

¹ Jesu den pua ba mi kpanjama ki baa waani, ke li pundi ban yaa jaandi yogunu kuli, ki da cedi bi gbani n wudi.

² O den yedi: «O bujialo den ye u dogu nni kaa jie U Tienu, kaa fangi niloba mo.

³ Li kpepuoli moko den ye u dogu yeni niinni, ki yen kpendi ki miadi o ki tua: ‹Ŋan tuu n po n koanginka n panli.›

⁴ O bujialo den waagi ki yiedi. Li yaa puoli, o den tia o yama nni, ki yedi: ‹Ba ke mii jie U Tienu, kaa fangi niloba mo,

⁵ li kpepuoli na n coagini nni maama na, n baa tuu o po o panli, yeni yaa ka, o li baa yaa kpendi ki coagini nne.› »

⁶ O Diedo den pugini ki yedi: «Yi gbadi o bujiabiado yeni n yedi yaala.

⁷ N buali yi, naani U Tienu kan tuu wan gandi yaaba po bi panli, bani yaaba n kpaani ki miadi o u yensiinu leni ku ñiagu kuli? Naani o baa waagi ki kan todi ba?

⁸ N kadi ki waani yi, o baa jaligi ki tuu bi po bi panli. Ama, naani o Joa Bijua yaa guani ki cua ŋanduna nni, o baa le li dandanli?»

Farisieni leni o lubigaalo kpanjama

⁹ Jesu go den pua mi naa kpanjama nitianba yaaba n jigini bi yula ke bi tiegi, ki fali yaaba n sieni po.

¹⁰ O den yedi: «Nibilie den gedi U Tienu diegu nni ki baa jaandi. O yendo den tie Farisieni, o lielo mo lubigaalo.

¹¹ Farisieni yeni den sedi ki jaandi o pali nni, ki yedi: ‹U Tienu, n tuondi a kelima mii ta leni yaa niba n sieni ki tie suuda, nibiadiba leni mi conconma danba. N tuondi a ke mii taa leni yaa lubigaalo n tie ne moko.

¹² Danalele kuli siiga, n luo bu ñoabu taalimilie. N ñandi n diim n bonbaakaala nni kuli.›

¹³ O lubigaalo yeni mo den poadi ki sedi foagima, kaa tuo ki baa yaadi ki noanli tanpoli. O den pua o benli ki yedi: ‹U Tienu, gbadi n po mi ninñima, mini yua n tie ti tuonbiadi daano.› »

¹⁴ Jesu den pugini ki yedi: «N waani yi i moamoani, ke wani n den kuni o denpo ke U Tienu saa o po i moamoani ke o tiegi. Ama Farisieni yeni wani ki den baa. Yua n fiini o yuli kuli, U Tienu baa jiini o, yua n jiini o yuli mo, U Tienu baa fiini o.»

Jesu gaali a bila

¹⁵ Bi niba den kpendinni a canpanda Jesu kani ke wan sii ba. O ŋoadikaaba n den laa lani, bi den fu leni yaaba n kpendinni ba.

¹⁶ Ama Jesu den teni ke bi cuani ba ki yedi: «Cedi mani a bila n cua n kani ki da deli ba, kelima U Tienu diema tie yaaba n tie nani a bila yeni po yo.

¹⁷ N waani yi i moamoani ke yua n kaa tuo U Tienu diema nani ki biga yeni, kan kua lienni.»

O jawaapiado

¹⁸ Jufinba yudaano yendo den buali Jesu ki yedi o: «O canbaanŋamo, n baa tieni be ki baa yaa miali n kan gbeni?»

¹⁹ Jesu den guani ki yedi o: «Be yaa po ke a yini nni niŋamo? U Tienu bebe yaa ka, oba kuli ki ŋani.

²⁰ A bani li bali maama n bili yaala: ‹Ŋan da conbi, ŋan da kpa nilo, ŋan da su, ŋan da tieni mi siedifaama, ki jigini a baa leni a naa.› »

²¹ O joa yeni den guani ki yedi: «N kubi lani kuli hali n biwaama nni.»

²² Jesu n den gbadi lani, o den yedi o: «Bonyenla n da go poadi a po. Ŋan kuadi ŋan pia yaala kuli, ki boagidi a luoda li ligi, lane a baa yaa pia ŋalimani tanpoli po. Lani, ŋan cua ki ŋoadi nni.»

²³ O joa n den gbadi laa maama, o pali den biidi, kelima o piama yabi boncianla.

²⁴ Jesu n laa ke o pali biidi, o den ki yedi: «Li pa hali boncianla a piada n baa ki kua U Tienu diema nni.

²⁵ Ku yuoyuogu n tagini mi kpalipienbonma nni, dingi ki cie o piado n kua U Tienu diema nni.»

²⁶ Yaaba n cengi o maama yeni den yedi: «Li yaa tie yeni, ŋme nan baa fidi ki ciadi?»

²⁷ O den guani ki yedi: «Bi nisaaliba n kan fidi yaala, U Tienu wani baa fidi la.»

²⁸ Lani, Pieli den yedi o: «Diidi ki le, tinba ti den fii ki ŋaa tin pia yaala kuli ki ŋua ŋa.»

²⁹ Jesu den yedi ba: «N waani yi i moamoani, ke laa pia yaa nilo n fii ki ŋaa o diegu, o pua, o kpiiba, o danba, yaa ka o bila, kelima U Tienu diema po,

³⁰ ki kan baa moala ne boncianla ki cie wan den ŋaa yaala kuli. Yaa yogunu n kpendi mo, o baa baa yaa miali n kan gbeni.»

Jesu waani mi taataama ke o baa kpe ki go fii

³¹ Jesu den taa bi piiga n niliediba ki piadi leni ba ki yedi: «Cengi mani, ti do ki caa Jerusalemi ke bi saawalipuaba n den diani yaala ke li maadi o Joa Bijua maama kuli, baa n tieni ki dudi.

³² Bi baa cuo o ki teni bi nilanba. Bi baa ñuadi o ki faligi o, ki sii o po ti ñinsandi,

³³ ki pua o i baliji, ki yuandi ki kpa o. Ama li dataali daali, o baa fii bi tinkpiba siiga.»

³⁴ Bi ŋoadikaaba ki den gaa liba kuli laa maama nni. O maama yeni den boani ba. Baa den gaa Jesu n maadi yaala n bua ki yedi yaala.

Jesu noadi o juamo

³⁵ Jesu n den nagidi Jeriko, li sua ke o juamo kaa u sankunu ki miadi.

³⁶ O den gbadi ke ku niligu pendi ke o buali lani n tie yaala.

³⁷ Bi den waani o ke Jesu, Nasareti yua n tagini ki baa pendi.

³⁸ O den kpaani: «Jesu, Davidi Bijua, gbadi n po mi ninñima.»

³⁹ Yaaba n den cuoni Jesu liiga den funi leni o ke wan suoni, ama o go den kpaani ki pugidi ki tua: «Davidi Bijua, gbadi n po mi ninñima.»

⁴⁰ Jesu den sedi ki yedi ban cuani o o kani. O juamo n den nagini, Jesu den buali o ki yedi:

⁴¹ «A bua min tieni a po be?» O den guani ki yedi: «N Daano, n bua ŋan teni min go yaa nua.»

⁴² Jesu den yedi o: «A nuni n go yaa nua, a dandanli paagi a.»

⁴³ Lanyogunu, o nuni go den noadi, ke o ŋoadi Jesu ki kpiagidi U Tienu. Bi niba kuli den laa lani, ki pagi U Tienu.