Luki 17 - U TIENU MAAMA TILI 2013

Ti tuonbiadi leni mi sugili miama

¹ Jesu den yedi o ŋoadikaaba: «Laa pia ke yaala n baa teni bi niba ban yaa tiendi ti tuonbiadi kan yaa kpendi, ama fala baa ye leni yaa nilo n cuani la.

² Bi yaa lani o li naacianli ki luni o mi ñincianma nni ke o bodi, lani n cie wan teni yaa bonwaamu n tie ne siiga, ba yendo n tieni ti tuonbiadi.

³ Fangi mani yi yula. A kpiilo yaa tieni ti tuonbiadi, ŋan tundi o. O yaa lebidi o yama, ŋan pa o sugili.

⁴ O yaa tudi a po taalimilele dayenli, ke taalimilele yeni kuli, o cua a kani ki yedi: ‹N lebidi n yama› ŋan pa o sugili.»

⁵ Jesu tondiba den yedi o: «Ti Daano, pugini ti dandanli.»

⁶ O Diedo den guani ki yedi: «Yin pia yaa dandanli yaa pundi baa mutardi bonbibu n wa ki da maama, yi baa fidi ki yedi sikomori tibu ne: ‹Ŋabi aba ki ban ŋuu mi ñincianma nni,› bu baa tuo.

⁷ Yi siiga ŋme n baa yaa pia o naacemo ke o ko, yaa ka ke o kpaa i pe, o yaa ñani u kuanu po ki kpeni, naani o canbaa baa yedi o: ‹Cua moala ki je?›

⁸ Ama o baa yedi o: ‹Ŋanbi n po mi jiema, ki bogidi aba ki yaa tendi nni ma hali min je ki go ño ki gbeni no. N yaa gbeni, amo baa je ki go ño.›

⁹ Naani o baa pagi o naacemo yeni kelima o tieni wan puogi o yaala?

¹⁰ Li tie yene yinba moko yaa po, yi yaa tieni ban puogi yi yaala kuli, yin yedi mani: ‹Ti tie naacenba bebe, ki soani lan pundi tin tieni yaala.› »

Jesu paagi gbaada piiga

¹¹ Jesu n den kubi o sancenli ki caa Jerusalemi, o den poandi Samari leni Galile diema siiga.

¹² O den baa kua doyendu nni ke gbaada piiga togidi o. Bi den sedi foagima ki kpaani:

¹³ «Canbaa Jesu, gbadi ti po mi ninñima.»

¹⁴ Wan den laa ba, o den yedi: «Gedi mani ki ban waani yi yula bi kopadicianba.» Ban den caa yaa yogunu, bi den paagi ki ŋanbi.

¹⁵ Bi siiga yendo n den laa ke o paagi, o den lebidi ki guani ki kpaani ki pagi U Tienu.

¹⁶ O den labini Jesu taana kani, ki tuondi o. O den tie Samari yua.

¹⁷ Jesu den yedi o: «Niba piiga yeni kuli ka paagi? Bi niyiadiba ye le?

¹⁸ Be yaa po ke oba ki lebidi ki cua ki baa pagi U Tienu, kali o nilamo na bebe?»

¹⁹ Lani, o den yedi o joa yeni: «Fii ki gedi. A dandanli faabi a.»

U Tienu diema

²⁰ Farisieninba den buali Jesu U Tienu diema n baa cua yaa yogunu. O den guani ki yedi ba: «U Tienu diema naa tie maama ke bi niba baa fidi ki le ma ka.

²¹ Bi kan yedi: ‹Mi ye ne,› yaa ka: ‹Mi ye napo.› U Tienu diema ye yi siiga ba moala.»

²² Lani, Jesu den yedi o ŋoadikaaba: «A dana kpendi ke yi baa bua hali boncianla ki le o Joa Bijua dana siiga ba dayenli, ki nan kan le.

²³ Bi baa ti yedi yi: ‹O ye ne,› yaa ka: ‹O ye napo,› yin da gedi mani, yin da sani ki ŋoadi ba mani.

²⁴ Nani mi tañigima n yen ñuliti ki pelini napo tinbianu, ki poandi ki yaa caa hali une maama yeni, li baa tua yene o Joa Bijua daali yaa pundi.

²⁵ Hali ke li daa pundi, li tie tiladi wan le fala boncianla, moala ne niba mo n yie o.

²⁶ Lan den tie maama Nowe yogunu, li go baa yaa tie yeni o Joa Bijua yaa dana nni.

²⁷ Bi nisaaliba den di ki go ñu, ki taani bi puoba ki puuni bi bisiaba bi jaba, hali Nowe n den ti kua ku ñinbiaciangu nni yaa daali. Ki tabolinkaaga den cua ki bolini bikuli.

²⁸ Lan den tie maama Loti yogunu, li go baa ti tua yene. Bi niba den di ki go ñu, ki da ki kuadi, ki coagi ti jaadi, ki maa a diena.

²⁹ Ama Loti n den ñani Sodomi nni yaa daali, u mu leni li cidibili den ñani tanpoli ki mini nani ki taaga yeni, ki bolini bikuli.

³⁰ Li go baa tua yene o Joa Bijua n baa doagidi o yuli yaa daali.

³¹ Landaali, yua n jagi ku doangu yuli po, ke o tiadi ye deeni, wan da jiidi ki kua ki baa taa ti. Yua n ye u kuanu po mo n da lebidi ki guani o denpo.

³² Tiadi mani Loti pua po.

³³ Yua n bua ki gaa o miali baa biani li, ama yua n baa biani li baa gaa li.

³⁴ N yedi yi, landaali ñiagu nibilie baa yaa dua duanyendu, ban taa yendo ki ŋaa oyua.

³⁵ Puobilie baa yaa taa ki naani, ban taa yendo ki ŋaa o lielo.

³⁶ Jabilie baa yaa taa ki ye u kuanu nni, ban taa yendo ki ŋaa oyua.»

³⁷ Bi ŋoadikaaba den yedi o: «Ti Daano, line baa tieni hali le?» O den guani ki yedi: «Li bonkpienla n ye naani, i kaabi baa taani lankane.»