Luki 16 - U TIENU MAAMA TILI 2013

Yaa ŋalimankubilo n fani

¹ Jesu go den yedi o ŋoadikaaba: «O piado den ye ki pia o ŋalimankubilo, ke bi ti cua o kani ki kuli o ŋalimankubilo yeni, ke o biandi o piama.

² O den yini o ki yedi: ‹N gba ke bi maadi a po be n yeni? Doagidi ki waani nni a ŋalimankubili tuonli fuuli, kelima a kan go baa ki yaa tie n ŋalimankubilo.›

³ O ŋalimankubilo yeni den tia o pali nni: ‹N canbaa baa ñani nni o ŋalimankubili nni. N baa tieni lede? Ki ko bu kpaabu? N kan fidi. Ki yaa miadi? Bu miabu pia n po i fe.

⁴ N bani min baa tieni maama ke o yaa ti ñani nni li ŋalimankubili tuonli nni, ke n gedi ki cani yaaba kuli, ban gaa n cangu.›

⁵ Lani, o den yini o canbaa pandanba kuli yendo yendo. O den yedi yua n kpa cua: ‹A pia n canbaa po iŋa yo?›

⁶ O den guani ki yedi o: ‹Kpaboba kobiga.› O ŋalimankubilo den yedi o: ‹Gaa a panli tili, ki kali ki diani tontoni kpaboba piimuu.›

⁷ O den yedi toa mo: ‹A pia n canbaa po iŋa?› O den guani ki yedi: ‹Ŋalikama kpalipadi kobiga.› O ŋalimankubilo den yedi o: ‹Gaa a panli tili, ki diani kpalipadi piinii.›

⁸ O canbaa den pagi laa ŋalimankubilo yua n kaa tiegi, kelima o den tieni u fanu.» Jesu den pugini ki yedi: «Ŋanduna yaaba fani leni bi lieba ki cie yaaba n tie mi yenma yaaba.

⁹ N yedi yi ke yin taa mani ŋanduna ŋalimani, yua n joagini yeni, ki baa danlinba, ke yi yàá ti pia yi ŋalimani yaa yogunu, ban gaa yi cangu naani n ki pia juodima nni.

¹⁰ Ban dugi yua yaa po li bonwaala nni, bi go baa yaa dugi o yaa po yo, yaa bonla n yabi nni. Yua n ki tiegi li bonwaala nni, o kan go yaa tiegi yaa bonla n yabi nni.

¹¹ Lanwani, bi yàá fidi ki dugi yi po leni yin kubi ŋanduna ŋalimani yua n pia i boandi maama, ŋme n baa piani yi o ŋalimanmoano?

¹² Bi yàá dugi yi po leni yin kubi nitoa ŋalimano maama, ŋme n baa teni yi yaa ŋalimano n tie yi yua?

¹³ Naacemoba kuli kan fidi ki yaa tuuni canbaanbilie po, kelima o yàá baa nani o canbaankpialo ki bua o canbaanyuamo, o nan baa yaa taabi o yendo, ki fali o lielo wani. Yi kan fidi ki yaa taa ki tuuni U Tienu po leni ŋalimani po.»

Jesu bangima mi tianma

¹⁴ Farisieninba yaaba n den bua i ligi ke li kandi, den gbadi lani kuli ki ñuadi Jesu.

¹⁵ O den yedi ba: «Yinba, yi wangi bi niba nuni po ke yi tiegi, ama U Tienu wani bani yi pala. Bi niba n nua ke yaala n pia ti kpiagidi yeni tie caginde U Tienu po.

¹⁶ Li bali maama leni bi saawalipuaba maama den die ki pundi hali Jan Batisi yogunu. Ki cili lanyogunu, bi wangi U Tienu diema Laabaaliŋamo. Nilo kuli tiendi u paalu ki bua ki kua lienni.

¹⁷ Tanpoli leni ki tinga baa pendi faala po, ama li bali maama nni, ba dianfuudi-biyenga kan bodi.

¹⁸ Yua n ñani o pua ki go taa puotoa kuli conbi. Yua mo n taa ban ñani yaa pua kuli, o conbi.

O piado leni Lasari kpanjama fuuli

¹⁹ O piado den ye ki la ti tiakpiagidi, ki mangidi o pali daali kuli leni o yeŋanma leni mi jemanma.

²⁰ O luodo den ye ke bi yi o Lasari. O yen dua o piado yeni diegu buliñoabu nni ke o gbanandi kuli tie nala.

²¹ Mi koma den kubi o hali ke o den bua ki yaa di yaa jiema n joagidi o piado yeni saajekaanu kani. Ba i sangbanli den kpendi ki liagi o nala.

²² O luodo yeni den kpe, ke malekinba taa o ki gedini Abalahama kani. O piado moko den ti kpe ke bi piini o.

²³ O den laadi fala bi tinkpiba n ye naankani. O den yaadi ki diidi hali foagima, ki ban laa Abalahama, ke Lasari ye o kani.

²⁴ O den tiani ki yedi: ‹N baa Abalahama, gbadi n po mi ninñima ki soani Lasari wan tuu mi ñima leni o nubiyuli, ki cua ki kuugi n po n lanbu, kelima n laadi fala boncianla u mu na niinni.›

²⁵ Abalahama den guani ki yedi o: ‹N biga, tiadi ke a den baa yaala n ŋani boncianla ŋan den fo yaa yogunu, ke Lasari mo den laadi fala boncianla. Moala, o ye ne ke bi baagidi o, ke amo laadi fala.

²⁶ Lani bebe ka, ku buoñuangu ye tinba leni yinba siiga, ki teni ke yaaba n bua ki ña ne ki gedi yi po kan fidi, yaaba n bua ki ña yi yaa po mo ki cua ti yaa kani kan fidi.›

²⁷ O piado den yedi: ‹Lanwani, n nan mia ŋa, ŋan soani Lasari n baa denpo,

²⁸ kelima n pia waamumuu. Wan gedi ki ban tuodi ki waani ba ke bani wani n da cua o naa falabiado nni.›

²⁹ Abalahama den guani ki yedi o: ‹A waamu pia Musa leni bi saawalipuaba kuli, ban cengi ba.›

³⁰ O piado den guani ki yedi: ‹N baa Abalahama, yeni ka! Yua n kpe yaa fii bi tinkpiba siiga ki gedi bi kani, bi baa lebidi bi pala.›

³¹ Abalahama den guani ki yedi o: ‹Bi yaa yie kaa baa cengi Musa leni bi saawalipuaba, ba o nilo yaa fii bi tinkpiba siiga ki gedi bi kani, bi kan cengi o.› »