Luki 15 - U TIENU MAAMA TILI 2013

Yaa pia n yaadi ke bi go laa o kpanjama

¹ Bi lubigaaba leni i tagibiadi danba den kpendi Jesu kani ki bua ki gbadi o maama.

² Farisieninba leni li bali maama banda den yenbidi ki tua: «O joa na gaani i tagibiadi danba cangu, ki go di leni ba.»

³ Lani, Jesu den pua ba mi naa kpanjama:

⁴ «Yi siiga yua n pia pekobiga ke yendo bia, naani waa baa ŋaa yaa piiyia n peyiadi n sieni bi kpaakaanu li fuali nni, ki ŋoadi yua n yaadi yeni hali ki ban le o?

⁵ O yaa laa o, o baa taa ki bugi o leni li pamanli.

⁶ O yaa ban pundi o denpo, o baa yini o danlinba leni o yieninlieba, ki yedi ba: ‹Taani mani leni nni tin mangi ti pala, kelima n laa n pia, yua n den bodi yeni.›

⁷ N yedi yi ke ti tuonbiadi daano yaa lebidi o yama, li pamanli baa yaa ye tanpoli po ki cie, niteginkaaba piiyia n nibiyia yaaba n kaa nua ke mi lebidima yeni tie tiladi.

Yaa kujapienli n bia ke bi go laa li kpanjama

⁸ Bi o pua yaa pia kujapiena piiga ke yenli bia, naani waa baa cuoni ki fidisanga, ki pidi li dieli ki yaa lingi li dindini hali ki ban le o cili?

⁹ O yaa laa li, o baa yini o danlinba leni o yieninlieba ki yedi ba: ‹Taani mani leni nni tin mangi ti pala, kelima n laa n kujapienli yaali n den bia yeni.›

¹⁰ N yedi yi ke li baa yaa tie yeni tanpoli po. U Tienu malekinba baa mangi bi pala kelima ti tuonbiadi daano yendo yua n lebidi o yama.»

Yaa biyaadikaaga n guani o baa po

¹¹ O go den yedi: «O joa den ye ki pia bonjalalie.

¹² O bonwaalo den yedi o baa: ‹N baa, boagidi ŋan bi bili n po yaa faali a piama nni, ki teni nni.› O joa yeni den boagidi ba o piama.

¹³ Lan tieni dana waamu, o bonwaalo den taa o yaa biinu kuli ki gedi yaa diema n foagi. O den biani o yaa faali kuli, kelima o bibiadima po.

¹⁴ Wan den biani likuli, mi konbiadima den baa mi diema yeni, ke o cili ki luo yaala n tie tiladi o yema po kuli.

¹⁵ Lani, o den gedi ki mia li tuonli dotieyendo kani, ke o gedini o o kuanu po ke wan ban yaa kpaa i duoli.

¹⁶ Mi koma po, o den bua ki yaa di i duoli n di yaa jiema, ama oba kuli ki puni o.

¹⁷ Lani, o den kpaagi ki laa o yama nni, ki yedi o pali nni: ‹N baa tuonsoanba pia li bonjekaala ke li kandi, ke n ti ye ne ki baa kpe mi koma.

¹⁸ N baa fii ki guani n baa po, ki ban yedi o: N baa, n tudi U Tienu po leni a yaa po kuli.

¹⁹ Mii go pundi ban yini nni a bijua. Yaa tuuni nni nani ŋan baa soani a tuonsoanlo maama.›

²⁰ Lani, o den fii ki guani o baa po. Wan da den ye hali foagima, o baa den laa o ke mi ninñima cuo o, ke o sani ki ban bibi o ki gobini o leni mi buama.

²¹ O bijua den yedi o: ‹N baa, n tudi U Tienu po leni a yaa po kuli. Mii go pundi ban yini nni a bijua.›

²² Ama o baa den yedi o naacenba: ‹Jaligi mani ki cuani yaa liadicianli n ŋani ki cie ki lani o, ki pilini o mi ñoagima, ki go pilini o ti cacaadi.

²³ Taa mani li naatonbiwubidili ki kodi li, tin je ki mangi ti pala.

²⁴ N bijua na den kpe ki guani ki faadi, o den yaadi ke n guani ki laa o.› Bi den cili ki mangidi bi pala.

²⁵ Li den sua ke o bijakpelo ye u kuanu po. Wan den kpendi ki nagini ku diegu, o den gbadi ti baantiadi ke bi pua ki ciaga.

²⁶ O den yini naacenyendo ki buali o lan tie yaala.

²⁷ O naacemo den yedi o: ‹A waalo n guani ki kpeni. A baa n laa o leni laafia yene, ke o kodi tin wubi yaa naatonbili.›

²⁸ Lani, o bijakpelo yeni pali den beni, ke o yie ke o kan kua. O baa den ñani ki mia mia ke wan kua.

²⁹ O den guani ki yedi o baa: ‹Diidi ki le, n tuuni a po hali yaa bina n yabi, mii yie a ñoamabonli liba kuli, ama ŋaa puni nni ba ŋuabiga ke mini leni n danlinba n taani ki je ki mangi ti pala.

³⁰ Ama a bijua yua n ban dini a ŋalimano leni a puoconcona yeni n guani ki kpeni, wani yaa po yo ke a kodi tin wubi yaa naatonbili.›

³¹ O baa den guani ki yedi o: ‹N bijua, a ye leni nni yogunu kuli, min pia yaala kuli tie a yaala.

³² Li pundi tin je ki go mangi ti pala, kelima a waalo na den kpe ki go faadi, o den yaadi ke ti guani ki laa o.› »