Luki 12 - U TIENU MAAMA TILI 2013

Fangi mani yi yula leni palalie yantiali

¹ Lanyogunu ku niligu den taani tuda tuda hali ki ŋmaadi biyaba. Jesu den cili ki maadi leni o ŋoadikaaba ki yedi: «Fangi mani yi yula bonŋanla ki da kubi Farisieninba dabinli, ki da tie palalie danba.

² Liba kuli ki ye ki wuo ki kan wuodi. Liba kuli ki ye ki duagi ke bi kan bandi la.

³ Lani yaa po, yin baa yedi yaala li biigili nni kuli, bi baa gbadi la u yensiinu. Yin baa soabidi yaala a diena nni, bi baa kpaani la bi niba kuli n gbadi.

Yin baa yaa jie yua

⁴ Yinba n danlinba, n yedi yi, yin da jie mani yaaba n baa kpa yi gbanandi ki nan kan go fidi ki tieni bontoala.

⁵ N baa waani yi yin baa yaa jie yua. Yaa jie mani yua n baa fidi ki kpa yi, ki go yuandi ki lu yi ku fantanbuogu nni. Yeni de! N yedi yi ke wani n tie yin baa yaa jie yua.

⁶ Baa kuadi nuanimuu muu ka kuumulie? Ama ba yeni, U Tienu kan sundi bi siiga nni ba yendo po.

⁷ Yinba wani, baa yi yudi, U Tienu bani ti coali n da maama. Da jie mani puu kuli, yi pia mayuli ki cie i nuani boncianla.

Ki tuo bi ki yie Jesu

⁸ N yedi yi ke yua n tuo bi niba nintuali ke o tie n yua kuli, o Joa Bijua moko baa tuo U Tienu malekinba nintuali ke o tie o yua.

⁹ Ama yua n nia bi niba nintuali ke waa tie n yua, nmoko baa nia U Tienu malekinba nintuali ke waa tie n yua.

¹⁰ Yua n maadi o Joa Bijua po yaala n bia baa baa sugili, ama yua n sugi U Tienu Fuoma Yua, wani kan baa sugili.

¹¹ Bi yaa gedini yi li bali maama bangima diena nni, yaa ka bi bujiaba kani, yaa ka paatietoaba kani, ki baa jia yi buudi, yin da yagi mani yi yama leni yin baa maadi maama ki baa gaa yi yula leni yin baa yedi yaala kuli po,

¹² kelima lanyogunu lige U Tienu Fuoma Yua baa bangi yi yin baa yedi yaala.»

O piadi-yanluodaano kpanjama

¹³ Ku niligu siiga niyendo den yedi Jesu: «Canbaa, waani n kpelo wan boagidi ti baa n ŋaa yaa faali ki teni nni n yaa biinu.»

¹⁴ Jesu den guani ki yedi o: «N danli, ŋme n dini nni li bali ke min jia yi po yi maama, bi ki boagidi yi faali?»

¹⁵ O go den yedi bi niba kuli: «Fangi mani yi yula bonŋanla leni mi ŋalimanbuama, kelima o nilo miali ki ŋua o ŋalimano n yabi maama ka.»

¹⁶ Lani, Jesu den pua ba mi naa kpanjama ki yedi: «O piado den ye ke o kuanu loni boncianla.

¹⁷ O den kpaagi ki yedi o pali nni: ‹N baa tieni lede? Mii pia min baa bili n kpaandi kuli naani.›

¹⁸ O den guani ki yedi: ‹N bani min baa tieni maama. N baa mudi n buabuana kuli, ki guani ki maa ya n yabi ki cie, ki taani n kpaandi leni n piama kuli ki kuodi lienni.

¹⁹ Lani, n baa yedi n yuli: A pia mi piama ke li kandi yaa bina n yabi po, yaa fuo ki di ki go ñu ki mangidi a pali.›

²⁰ Ama U Tienu den yedi o: ‹O yanluodaano na, dinla yaa ñiagu liga, n baa taa a miali. Ŋan bili yaala kuli baa tua ŋme yaa yaale?› »

²¹ Jesu go den yedi: «Li tie yeni leni yua n taagi mi piama o yuceli po, ke o cima ki tie U Tienu po.»

Dugi U Tienu po

²² Li yaa puoli, Jesu den yedi o ŋoadikaaba: «Li tie lani yaa po ke n yedi yi, da yagi mani yi yama yi miana yema po, yin baa yaa di yaala po leni yi gbanandi po yin baa yie yaala.

²³ Li miali cie mi jiema, ti gbanandi mo cie ti tiayiekaadi.

²⁴ Diidi mani a kankala, baa coagi, baa yendi, baa pia bilikaanu, baa pia buabuana. Ba leni lani kuli, U Tienu dindi ba. Ama yinba, yi pia mayuli boncianla ki cie ti bonyugiditi.

²⁵ Yi siiga ŋme yaa yanyagidi n baa teni wan fidi ki foagidi o miali dana ba waamu?

²⁶ Yi yaa kan fidi ki tieni yaa bonla n wa yeni, be yaa po ke yi bangi yaala n sieni kuli po.

²⁷ Diidi mani mi moapuuma n ye maama. Maa tuuni, maa pia gaali. Ba yeni, n yedi yi ke o bado Salomon leni o kpiagiciandi kuli, waa den pundi mi siiga nni ba yenma n bobi maama.

²⁸ U Tienu yaa bobindi yaa muadi n ye ku muagu nni dinla, ke bi baa faa ki taa ti ki cuoni u mu u fanu nni, laa pia tama ke o baa yieni yi mo, yinba yaaba yaa dandanli n ki fuu.

²⁹ Da yagini mani yi yama leni yin baa yaa di yaala lingima leni yin baa yaa ñu yaala yaa lingima.

³⁰ Yaa nibuoli n ki ŋua U Tienu, n kuandi bi yama laa bonla nni. Yi Baa bani ke laa bonla tie yi po tiladi.

³¹ Ama yin kpa lingi mani U Tienu diema, lani, laa bonla kuli baa pugini yi po.

³² Da jie liba, fini yaa yankulu n ki yabi, kelima yi Baa sua ke li dagidi o po, wan pa yi mi diema.

Tanpoli ŋalimani

³³ Kuadi mani yin pia yaala, ki pa a luoda yin baa yaa ligi. Ŋanbi mani yi yula po tanpoli po yaa ligiboaga n kan biidi leni yaa ŋalimani n ki pia gbenma, a suuda n kan nagini naankani, ti lulugidi mo n kan lugi ki bolini naankani.

³⁴ Yi ŋalimani n ye naankani, yi yantiana mo baa yaa ye lankane.

Bogini mani ki yaa guu o Joa Bijua cuama

³⁵ Ñagini mani yi ciamu ku gbanñagidigu, ki teni yi fidisanmu n yaa co.

³⁶ Yeni de! Yaa tie mani nani yaa naacenba n guu ke bi canba n ña mi puocaanjiema po ki kpeni, ke o yaa pundi ki yedi: ‹Luodi n po mani,› ban luodi o po tontoni.

³⁷ Li pamanli ye leni yaa naacenba ke bi canbaa kpeni ki sua ke bi nua ki guu o. N yedi yi i moamoani ke o baa ñagini o ciaga, ki teni ban kali u saajekaanu kani, wan teni ba mi jiema.

³⁸ O yaa kpeni o kooton-muakpialo, yaa ka o kooton-muayuamo, ki sua ke bi nua ki guu o, li pamanli baa yaa ye leni ba.

³⁹ Yin bandi bonŋanla ke o diedaano yaa bi bani o suudo n baa cua yaa yogunu, o bi baa yaa guu ki kan cedi o suudo n lugidi o dieli ki kua.

⁴⁰ Yimoko n bogini ki yaa guu, kelima o Joa Bijua baa cua yin ki daani yaa yogunu.»

O naacendugika leni o naacenbiado

⁴¹ Pieli den yedi o: «N Daano, a pua mi naa kpanjama tinba bebe yaa po, bi bi niba kuli po?»

⁴² O Diedo den yedi: «Ŋme n tie yaa tuonsoan-jiididugika n pia mi yanfuoma, ke o canbaa guuni o o niba ke wan yaa tendi ba, mi jiema li yogunu yaa pundi?

⁴³ Li pamanli baa yaa ye leni laa naacemo, o canbaa yaa kpeni ki sua ke o tiendi yeni.

⁴⁴ N waani yi i moamoani, o canbaa baa guuni o o piama kuli.

⁴⁵ Ama laa naacemo yaa yedi o pali nni: ‹N canbaa waagi mi kpenma,› ki ji pua bi tuonsoanba, bi jaba leni bi puoba kuli, ki di ki go ñu hali ki gaadi,

⁴⁶ laa naacemo canbaa baa kpeni wan ki daani o yaa daali leni wan ki faami yaa yogunu. O baa teni ban waani o fala hali boncianla, ki gedini o ki ban taani leni yaaba n ki ŋua U Tienu.

⁴⁷ Yaa naacemo n bani o canbaa n bua wan yaa tiendi yaala ki naa bogini liba, kaa tieni nani o canbaa n waani o maama, bi baa pua o yaa puadi n yabi.

⁴⁸ Die yua n kaa bani o canbaa n bua wan yaa tiendi yaala, ki tieni yaa bonla n pundi ti puadi, o yaa puadi kan yaa yabi. Ban teni yua boncianla, bi baa buali o boncianla. Ban piani yua ke li yabi, bi baa bili ke wan guani yaala n yabi ki cie.

Jesu cuama cuani mi paadima

⁴⁹ N cua ki baa lu u mu ŋanduna nni. N bi bua hali bonŋanla ke laa mu bi peli ki cuo no.

⁵⁰ Ama bi baa kpa batisi nni leni fala. N yama yagini boncianla hali lan baa tieni ki gbeni.

⁵¹ Naani yi tama ke n cua ki baa tieni mi yanduanma ŋanduna nni? Aa-a, n cuani mi paadime.

⁵² Moala liiga, nibimuu yaa ye dieyengu nni, bi baa paadi leni biyaba. Nibitaa baa koani leni nibilie, nibilie n koani leni nibitaa.

⁵³ Bibaa baa koani leni o bijua, ki bonjaga mo n yaa koani leni o baa. Binaa baa koani leni o bisalo, ki bonpuoga mo n yaa koani leni o naa. Yaanaa baa koani leni o biyuaga, ki biyuaga mo n yaa koani leni o yaanaa.»

Jesu maadi i yogini sinankeeninba maama

⁵⁴ Jesu go den yedi ku niligu: «Yi yaa laa ke ku tawaligu fii nintuali po, yi yen yedi tontoni ke ki taaga baa mi. Li yen tua yeni mo.

⁵⁵ Yi yaa laa ke u faalu ñani nuganu po, yi yen yedi ke ku wulugu baa tieni. Limoko yen tua yeni.

⁵⁶ Yinba palalie danba na, yi bani ki bundi tanpoli leni ki tinga sinankeeninba, be yaa po ke yi naa bani ki bundi yaa yogunu n tie na yaa sinankeeninba wani?

Ŋan dagidi leni a koanginka

⁵⁷ Be n teni ke yii kpaagi ki bandi yin baa tieni yaala lan yaa tiegi?

⁵⁸ Ŋan yegi leni a koanginka ke yi caa li bujiali po yaa yogunu, ŋan moandi ki dagidi leni o u sanu nni, wan da gedini a o bujialo kani. O bujialo mo n da teni sandalima, sandalima mo n da luoni a li kpaadidieli nni.

⁵⁹ N yedi a, a kan ña lienni kali a ban pani ki gbeni, kaa sieni ba tanga.»