Luki 11 - U TIENU MAAMA TILI 2013

Jesu bangi o ŋoadikaaba i jaandi

¹ Dayenli, Jesu den gedi kaanuba ki ban jaandi. Wan den jaandi ki gbeni, o ŋoadikaaba siiga yendo den yedi o: «N Daano, bangi ti tin baa jaandi maama, nani Jan n bangi o yaa ŋoadikaaba maama.»

² Jesu den yedi ba: «Yi yaa yen baa jaandi, yin yedi: ‹Ti Baa, a yeli n baa mi gagidiŋanma. Ŋan teni a diema n cua.

³ Pa ti yaa jiema n baa dagidi ti daali kuli.

⁴ Pa ti sugili ti tuonbiadi po, Kelima timoko puuni sugili yaaba n tudi ti po kuli. Da tuo tin baa mi tulinma nni.› »

⁵ Jesu go den yedi ba: «Yi siiga yendo yaa pia o danli ki gedi o kani ku yoagisiigu, ki yedi o: ‹N danli, ledi nni dupen bonbitaa,

⁶ kelima n danli yendo fii li sancenli, ki cua ki cani nni, ke n naa pia liba ki baa candi o.›

⁷ O danli yua n ye o dieli tugu nni yeni yaa guani ki yedi o: ‹Da yagini n yama! N luoni bu buliñoabu no. Mini leni n bila kuli duani, n kan go fidi ki fii ki teni a.›

⁸ N yedi yi, ba o yaa kan fii ki teni o, kelima o tie o danli, o baa fii kelima o tigini po, ki teni o wan luo yaala yeni kuli.

⁹ Lani yaa po, n yedi yi, mia mani, bi baa pa yi, lingi mani, yi baa le. Pua mani bu buliñoabu kani, bi baa luodi yi po.

¹⁰ Yua n mia kuli baa baa, yua mo n lingi kuli baa le, bi baa luodi yua n pua bu buliñoabu kani kuli po mo.

¹¹ Yinba bibaanba siiga, ŋme yaa biga n baa mia o dupen, wan teni o li tanli, bi o yaa mia o o jamo, wan teni o o wa?

¹² Bi o baa mia li jenli, wan teni o o namo?

¹³ Yinba yaaba n bia yaa bani ki pa yi bila li bonŋanla, lanwani laa pia kuli tama ke ti Baa yua n ye tanpoli baa pa yaaba n mia o o Fuoma Yua.»

Jesu n deli mu cicibiadimu yaa paalu po

¹⁴ Jesu den deli ki baa ñani o nilo niinni yaa cicibiadiga n teni ke o tie muulo. Ki cicibiadiga yeni n ñani yaa yogunu, o muulo den maadi ke li pakili cuo ku niligu.

¹⁵ Ama bi tianba den yedi: «Mu cicibiadimu bado Belisebuli n puni o u paalu ke o fidi ki deli mu cicibiadimu bi niba niinni.»

¹⁶ Bi tianba mo den bua ki dia Jesu ku madiagu, ki mia o ke wan tieni yaa bancianma n baa doagidi ke o paalu ñani U Tienu kani.

¹⁷ Jesu den bani ban maliti yaala, ki yedi ba: «Yaa diema n boagidi ki tuogi leni mi yuli kuli baa bodi, mi diena kuli mo baa yaa baali aya po.

¹⁸ Sutaani yaaba mo yaa deli ki ñani Sutaani yaaba, o diema baa tieni lede ki yaa ye? N yedi yeni kelima yi yedi ke mu cicibiadimu bado Belisebuli puni nni u paalu ke n deli mu cicibiadimu.

¹⁹ Belisebuli n yaa puni nni u paalu ke n deli mu cicibiadimu, yi yaa ŋoadikaaba mo deli mu ŋme yaa yeli nne? Lani yaa po, bi baa jia yi buudi.

²⁰ Ama li yaa tie U Tienu n puni nni u paalu ke n deli mu cicibiadimu, lanwani U Tienu diema pundi yi kani.

²¹ O gbanmandaano yaa kubi o jatiadi ki guu o diegu, wan pia yaala kuli, waa bangi li po.

²² Ama yua n pa ki cie o yaa cua ki baa o ki paadi o, o baa fie o jatiadi wan bi dugi yaadi yaa po kuli, ki taa o fagidi ki boagidi boagidi.

²³ Yua n ki taa n po kuli tie n yieka. Yua n ki todi nni ke n taandi, nan yadi wani.

Ki cicibiadiga guanma

²⁴ Ki cicibiadiga yaa ñani o nilo niinni, ki yen gedi ki ban yaa gaandi yaa fuali n ki pia ñima nni, ki lingi mi fuodima. Ki yàá laa, ki baa yedi: ‹N baa lebidi ki guani n dieli po min den ñani naani.›

²⁵ Ki yaa pundi, ki baa sua ke li pidi ki ŋanbi.

²⁶ Lanwani, ki baa gedi ki ban taa cicibiadimulele yaamu n bia ki cie kani kiba, mun yegi ki ban kua li niinni ki yaa ye. Laa nilo yeyuankaama baa yaa bia ki cie mi kpiama.»

Mi yemanmoanma maama fuuli

²⁷ Jesu n den maadi yeni yaa yogunu, o pua den kpaani ku niligu siiga ki yedi o: «Li pamanli ye leni yaa pua n mali a leni yaa biina n ŋaani a kuli.»

²⁸ Jesu den guani ki yedi o: «Li pamanli n ye leni yaaba ki cie tie yaaba n cengi U Tienu maama, ki kubi ma.»

Bi mia Jesu wan tieni mi bancianma

²⁹ Bi niba boncianla n den taani ki ŋabi ki mabindi Jesu, o den yedi: «Moala ne niba tie nibiadiba. Bi miadi yaa bancianma n tie sinankeene, ama bi kan tieni bi po sinankeentoa, li yàá tie Jonasi yua yaa ka.

³⁰ Nani Jonasi n den tie sinankeene Ninivi dogu yaaba po maama, o Joa Bijua moko baa tua sinankeene moala niba po yene.

³¹ Yaa diema n ye nuganu po puobado baa taani ki sedi leni moala ne niba ti buudi daali, ki bu ki cuo ba, kelima o den ñani hali foagima, ki cua ki cengi Salomon yanfuoma maama. Ama moamoani, yua n cie Salomon ye ne.

³² Ninivi dogu yaaba moko baa taani ki fii ki sedi leni moala ne niba ti buudi daali ki bu ki cuo ba, kelima Jonasi n den waani ba U Tienu maama, bi den lebidi bi pala. Ama moamoani, yua n cie Jonasi ye ne.

Ti gbanandi yenma

³³ Niloba kan cuoni fidisanga ki kuani ga yaa kaanu n wuo, yaa ka ki taa li sancianli ki ŋoagini ga. Ama o baa taa ki tuani ga u fidisantuankaanu, ke yaaba n kua li dieli nni kuli n yaa nua mi yenma.

³⁴ A nunbu n tie a gbanandi fidisanga. A nunbu yaa ŋani, a gbanandi kuli baa yaa yieni bonŋanla. Ama a nunbu yàá ŋani, a gbanandi kuli baa yaa ye li biigili nni.

³⁵ Lani yaa po, ŋan fangi a yuli ki da teni ke yaa yenma n ye a niinni n tua biigili.

³⁶ A gbanandi kuli yaa yieni bonŋanla, ke li biigili ki ye kaanuba kuli, tikuli baa yaa yieni nani ki fidisanga n yen yendi a po maama.»

Jesu jaligi mi jaanma yudanba

³⁷ Jesu n den maadi yaa yogunu, Farisieni yendo den yini o ke wan kua ki je o deni. O den kua ki kali u saajekaanu kani.

³⁸ Farisieni yeni n den laa ke waa nidi ki baa je, li den paki o.

³⁹ O Diedo den yedi o: «Yinba Farisieninba, yi yen ŋuudi ki ŋanbi ki tadiñokaaga leni ku saajetadigu kuli puoli po, ama yi tugu nni nan gbie leni yin fenli yaala leni yin tiendi yaa biadima.

⁴⁰ Yinba, bi yanpiidanba yeni, yua n tagi puoli po, wan ka tagi tugu nni mo?

⁴¹ Pa mani a luoda yaala n ye yi pala tugu nni, lani, yaala n sieni kuli baa ŋanbi yi po.

⁴² Fala baa yaa ye leni yinba Farisieninba, kelima yi coadi yaa kpinfaadi n yi menti leni ru leni kpinfatoadi kuli, ki ñandi diim. Ama yi ŋaa mi teginma leni U Tienu yaa buama. Li pundi yin yaa bi tiendi lani, ki nan da cedi yin maani ki tiendi yaala yeni mo.

⁴³ Fala baa yaa ye leni yi, yinba Farisieninba, kelima yi bua ki yaa kaa i nician-kalikaani li bali maama bangima diena nni, ki go bua bi niba n yaa fuondi ki kpiagidi yi mu daamu nni.

⁴⁴ Fala baa yaa ye leni yi kelima yi tie nani yaa takula n ki ñii, ke bi niba cuoni a po kaa faami.»

⁴⁵ Li bali maama bangikacianba siiga yendo den guani ki yedi o: «Canbaa, ŋan maadi maama na, a sugidi timoko.»

⁴⁶ Jesu den guani ki yedi: «Fala baa yaa ye leni yimoko, yinba li bali maama bangikacianba, kelima yi tungi bi niba a tugikpiaga, yinba yi ba n kan tuo ki sii ya leni yi nubili.

⁴⁷ Fala baa yaa ye leni yi, kelima yi guani ki maa ki ŋanbidi yi yaajanba n den kpa yaa saawalipuaba yaa takula.

⁴⁸ Yeni, yi tiendi siedi ke yi yama dagidi leni yi yaajanba tuona, kelima bani, bi den kpa bi saawalipuaba, ke yimo maa bi takula po li bontiadikaala.

⁴⁹ Li tie lani yaa po ke U Tienu yanfuoma mani miba yedi: ‹N baa soani bi kani o saawalipuaba leni a tonda. Bi baa kpa bine ki faligi bine.›

⁵⁰ Lani yaa po, U Tienu baa tuu moala ne niba bi yaajanba n den kpa yaa saawalipuaba ki wuli bi soama panli, ki cili leni Abeli soama hali ŋanduna tagima yogunu,

⁵¹ ki pundi hali Sakari yaa soama, ban den kpa yua U Tienu diegu nni, li padibinbinli leni u kaangagidiŋamu siiga. Yeni de! N yedi yi ke U Tienu baa tuu moala ne niba laa kuuma kuli panli.

⁵² Fala baa yaa ye leni yi, yinba li bali maama bangikacianba, kelima yi tuudi ki ñani mi bancianma buliñoabu sendabiga. Yii kua yiba, yi go yie yaaba n bua ki kua mo yaa po.»

⁵³ Jesu n den ñani lankani, li bali maama banda leni Farisieninba den tigini o leni mi mapaama. Bi den buali o yaa bonla n yabi.

⁵⁴ Bi den dia o ku madiagu, ki bua ki baa o ñoabu nni maama, ban baa fidi ki gedini yaama li bali danba kani.