LOMA YAABA 8 - U TIENU MAAMA TILI 2013

U Tienu Fuoma n puni yaa faabima

¹ Lanwani, moala buudi cuonuba ki go ye yaaba n ye Jesu Kilisiti nni po.

² U Tienu Fuoma yaama n puuni li miali Jesu Kilisiti nni, yaa bali faabi nni leni ti tuonbiadi leni mi kuuma bali.

³ Li bali maama n kaa den fidi ki tieni yaala kelima ti gbanandi tadingu po, U Tienu tieni la. O den soani o Bijacele kelima ti tuonbiadi po, ke o taa yaa gbanandi n naani leni ti tuonbiadi n diedi yaa gbanandi. Wan den tieni yeni, o den buni ki cuo ti tuonbiadi ti gbanandi nni.

⁴ U Tienu den tieni lani kuli ke li bali maama n bili yaa teginma n tieni ti niinni, tinba yaaba n tiendi U Tienu Fuoma n bua yaala, ki naa tiendi ti gbandi n bua yaala.

⁵ Moamoani yaaba n tiendi ti gbanandi n bua yaala, kuandi bi yama ti gbanandi n bua yaala niinni. Ama yaaba n tiendi U Tienu Fuoma n bua yaala kuandi bi yama U Tienu Fuoma bua yaala yaa niinni.

⁶ Yua kuandi o yama ti gbanandi n bua yaala yaa niinni, li baa gedini o mi kuuma po. Ama yua n kuandi o yama U Tienu Fuoma n bua yaala yaa niinni, li baa gobidi ki gedini o li miali leni mi yanduanma po.

⁷ Ti gbanandi n bua yaala tie U Tienu yibali, kelima laa tuo ki tiendi U Tienu bali maama n bili yaala. Li kan go fidi ki tieni la mo.

⁸ Ti gbanandi bonbuakaala n die yaaba kan fidi ki mangi U Tienu pali.

⁹ Ama yinba wani, ti gbanandi bonbuakaala ka die yi, mi Fuoma n die yi kelima U Tienu Fuoma ye yi niinni. Yua n ki pia Kilisiti Fuoma, waa tie Kilisiti yua.

¹⁰ Li yaa tie ke Kilisiti ye yi niinni, li tie moamoani ke yi gbanandi kpe, kelima ti tuonbiadi po. Ama mi Fuoma tie li miali yi niinni, kelima li moamoansaali po.

¹¹ Lanwani, U Tienu yua n den fiini Jesu bi tinkpiba siiga yaa Fuoma yaa ye yi pala nni, wani yua n den fiini Jesu Kilisiti bi tinkpiba siiga yeni, go baa pa yi gbanandi, yaadi n baa kpe, li miali, kelima o Fuoma yaama n ye yi niinni yaa po.

¹² Lani yaa po, n kpiiba, ba ke ti pia li panli, tii pia li ti gbanandi bonbuakaala po ka. Lanwani, ti kan fidi ki go yaa tiendi ti gbanandi n bua yaala.

¹³ Yi yaa tiendi ti gbanandi n bua yaala, yi baa kpe. Ama yi yaa teni ke mi Fuoma paalu kpa yi gbanandi bontienkaala, yi baa yaa ye.

¹⁴ Mi Fuoma n gobidi yaaba kuli, bani n tie U Tienu bila.

¹⁵ U Tienu naa puni yi yaa Fuoma n teni ke yi tie yonbi, ki go baa ye i jeje nni ka. Ama yi baa U Tienu Fuoma yaama n puni yi mu bimoanmu yaa bali, ke ti kpaani ki tua U Tienu: «Ti Baa, ti Baa!»

¹⁶ U Tienu Fuoma mani miba n tiendi siedi ti yantiana nni, ke ti tie U Tienu bila.

¹⁷ Ti yaa tie U Tienu bila, ti go tie bi faajieba moko. Ti tie U Tienu faajieba, ki baa taani leni Kilisiti ki je li faali. Ti yaa taani leni Kilisiti o fala nni, ti go baa taani leni o o kpiagidi nni moko.

Li dandanli yua n pia yaa dugidi

¹⁸ Lani yaa po, n bani ke tin laadi yaa fala yaa yogunu n tie ne, kan fidi ki boagini leni U Tienu n baa doagidi yaa kpiagidi, yaadi n baa yaa ye.

¹⁹ Mi tagima kuli guu leni mi sugincianma U Tienu n baa doagidi o bila yaa yogunu.

²⁰ Mi tagima n den tua fanma bonla yeni, laa den tie ke mani n bua ki tua yeni, ama U Tienu n den bua yeni. Ama mi tagima yeni pia mi suginma,

²¹ ke dayenli U Tienu baa faabi ma leni mi bedima, ki teni man taani leni U Tienu bila, ki baa mi faabima, yaama n pia ti kpiagidi.

²² Ti bani ke hali moala mi tagima kuli ye leni fala, ki duni nani u maditugukoanu n cuo yaa pua yeni.

²³ Laa tie mi tagima bebe ka ye leni fala. Tinba yaaba n pia U Tienu paakpiabu, lani n tie o Fuoma, timoko duni ti pala nni, ki guu U Tienu n baa ti teni tin tua o bimoanmu cain yaa yogunu, ki faabi ti gbanandi.

²⁴ U Tienu den faabi ti. Die li da tie suginme. Ama o nilo yaa laa wan sugini yaala, laa go tie suginma, kelima o nilo yaa baa wan sugini yaala, be yaa po ke o go baa yaa pia li suginma?

²⁵ Ama ti yaa sugini tin daa laa yaala, ti baa yaa guu la leni li juunli.

²⁶ Li tie yeni, mi Fuoma moko todi ti ti tadingu nni, kelima tii bani lan pundi tin mia U Tienu yaa miabu ti jaandi nni. Ama mi Fuoma mani miba miadi U Tienu ti po, ki duni yaa dunli n ki pia maama.

²⁷ U Tienu yua n biigidi bi niba pala, bani yaala n ye o Fuoma yantiali nni. U Tienu n teni ke o Fuoma miadi o, o nigagidiŋanba po, nani wani U Tienu n bua maama.

²⁸ Ti bani ke U Tienu tuuni li bonla kuli nni, yaaba n bua o ŋamu po, bani, wan yini yaaba o yanjagili po.

²⁹ U Tienu n den tuodi ki bani yaaba, o go den tuodi ki gandi ba, ki baa teni ban tua nani o Bijua yeni. Wani o Bijua yeni mo n tua o bijakpelo o waamu yaaba n yabi boncianla siiga.

³⁰ Lanwani, U Tienu den yini wan den tuodi ki gandi yaaba. Wan den yini yaaba, o go den saa bi po i moamoani. Wan den saa yaaba yaa po i moamoani, o den teni ke bi baa ti kpiagidi moko.

U Tienu buama n yabi ti po maama

³¹ Lan tie maama yeni, ti baa yedi be? U Tienu yaa taa ti po, ŋme n baa fidi ki sedi ti po?

³² Wani U Tienu, yua n kaa den yie ke o Bijua n le fala, den teni ke bi kpani o tikuli po. Lani, o Bijua yeni po, li baa gaa lede ke o kan pa ti li bonla kuli leni ti bulicindi?

³³ Ŋme n baa kuli U Tienu n gandi yaaba? Oba kuli, kelima U Tienu wani o ba n tie o moamoansaalo.

³⁴ Ŋme n baa jia leni ba ti buudi ki cuo ba? Oba kuli, kelima Jesu Kilisiti kpe, li cie yeni. O go den fii bi tinkpiba siiga. O ye U Tienu jienu po, ki miadi o ti po.

³⁵ Ŋme n baa paadi ti leni Kilisiti yaa buama? Fala bi? Ti yanyagidi bi? O falabiado bi? Mi koma bi? Mi luoma bi? Yaa fala n baa fidi ki cuani mi kuuma bi? Bi ki jugisiega n baa paadi ti leni o buama?

³⁶ Nani lan diani maama: «A yaa po n teni ke bi kpaani ti daali kuli, Ki nua ti nani ban baa kodi yaa pe yeni.»

³⁷ Ama laa bonla kuli siiga, yua n den bua ti yeni, teni ke ti paadi likuli cain.

³⁸ Moala, n bani cain ke bonliba kuli kan fidi ki paadi ti leni U Tienu buama. Ba mi kuuma, ba li miali, ba malekinba, ba mi fawaama paaciami danba, ba yaala n ye moala ne, ba yaala n baa ti cua,

³⁹ ba i paaciami, ba yaaba n ye tanpoli, ba yaaba n ye tiipo, mi tagima kuli nni, liba kuli kan fidi ki paadi ti leni U Tienu n pia ti po yaa buama. O den doagidi laa buama, ti Diedo Jesu Kilisiti nni.