LOMA YAABA 6 - U TIENU MAAMA TILI 2013

Tii go ye ti tuonbiadi yonbidi nni

¹ Lanwani, ti baa yedi be? Naani tin suagi ki yaa tiendi ti tuonbiadi ke U Tienu ŋanbili n yaa dua ti po?

² Kalam! Tinba yaaba n den kpe ki paadi cain leni ti tuonbiadi, ti baa gaa lede ki go yaa ye ti tuonbiadi nni?

³ Yii bani ke tinba yaaba n den batisi Jesu Kilisiti nni kuli, li tie o kuuma nni ke ti den batisi?

⁴ Lanwani, tin den batisi yeni, bi den taani ki piini ti leni o o kuuma nni. Nani ti Baa U Tienu kpiagidi paalu n den teni ke Kilisiti fii bi tinkpiba siiga maama, o baa teni timoko n yaa ye leni li miapanli yene.

⁵ Moamoani, ti yaa taani leni o o kuuma nni, ti go baa taani leni o o fiima bi tinkpiba siiga nni moko.

⁶ Ti bani ke bi den joani ti tagikpelu leni Kilisiti li dapoanpoanli po ke u kpe. Ti gbanankpiadi, ti tuonbiadi n die yaadi, kan go fidi liba. Lani n tie tin da go ye ti tuonbiadi yonbidi nni.

⁷ Yua n kpe kuli faabi leni ti tuonbiadi.

⁸ Li yaa tie ke ti den kpe leni Kilisiti, ti daani ke ti baa yaa ye, ki fo leni o.

⁹ Ti bani ke Kilisiti n den fii bi tinkpiba siiga yeni, o kan go kpe. Mi kuuma naa go pia bali o po.

¹⁰ Wan den kpe yaa kuuma, o den kpe yenma ki paadi leni ti tuonbiadi hali yaa yogunu kuli po. Ama moala wan go ye ki fo yeni, o ye ki fo U Tienu po yo.

¹¹ Yimoko n yaa nua mani yi yula ke yi kpe, ki paadi leni ti tuonbiadi, ki nan ye ki fo U Tienu po Jesu Kilisiti nni.

¹² Lani yaa po, yin da go tuo mani ti tuonbiadi n yaa die yi gbanandi yaadi n baa kpe. Yin da go tuo ki yaa tiendi yi gbanandi bonbuaka-biadila.

¹³ Yin da go teni ti tuonbiadi n diedi yi gbananbuoli, ki teni tin tua mi biadima jatiadi. Ama yin teni yi yula U Tienu, nani yaaba n fii bi tinkpiba siiga, ki go ye ki fo yeni. Yin yaa puuni yi gbanandi U Tienu ki teni tin tua mi teginma jatiadi.

¹⁴ Ti tuonbiadi kan go yaa die yi, kelima U Tienu bali maama ki go die yi, ama o ŋanbili n ji die yi.

Moala ti tie mi teginma yonbi

¹⁵ Lanwani, ti baa yedi be? Moala ke U Tienu bali maama ki go die ti, ama o ŋanbili n ji die ti, ti go baa yaa tiendi ti tuonbiadi bi? Kalam!

¹⁶ Yii bani ke yi yaa taa yi yula ki teni yua, ki tua o yonbi, ki ŋua o maama kuli, se yin tuo ki tua o yonbi cain? Li tie tiladi, yin ŋoadi ti tuonbiadi yaadi n kpendinni mi kuuma, bi U Tienu tuoma yaama n baa cuani yi po li moamoansaali.

¹⁷ Tin yaa tuondi U Tienu, kelima ba ke yi den kpa tie ti tuonbiadi yonbi, yi den tuo ki ŋoadi ban den bangi yi yaa bangima leni payenli.

¹⁸ Lanwani, yi den faabi leni ti tuonbiadi yonbidi, ki tua mi teginma yaa yonbi.

¹⁹ N maadi nani bi nisaaliba n maadi maama, kelima yi yantiana tadingu po, ke yin fidi ki gbadi. Nani yin den kpa puni yi gbanandi ke ti tua ti cagindi leni mi biadima yonbi, ki baa yaa tiendi ti tuonbiadi maama, moala yin yaa puuni yi gbanandi tin yaa tie mi teginma yonbi, ke yin fidi ki pundi mi gagidiŋanma U Tienu po.

²⁰ Yin den tie ti tuonbiadi yonbi yaa yogunu, mi teginma ki den die yi.

²¹ Moala yi jie i fe leni yin den tiendi yaala lanyogunu. Yi den baa be ñuadi laa bonla po? Laa bonla baa juodi mi kuuma.

²² Ama moala ke yi faabi leni ti tuonbiadi yonbidi, ki tua U Tienu yonbi, yin baadi yaala lienni tie mi gagidiŋanma, ke likuli baa cuani yaa miali n kan gbeni.

²³ Kelima ti tuonbiadi panpaani tie mi kuuma, ama U Tienu ŋanbili paabu tie yaa miali n kan gbeni ti Diedo Jesu Kilisiti nni.