LOMA YAABA 5 - U TIENU MAAMA TILI 2013

Li miapanli Kilisiti nni 5.1—8.39 Ti pia mi yanduanma leni U Tienu

¹ Lanwani, U Tienu n saa ti po i moamoani ke ti tiegi, kelima li dandanli yaa po yeni, ti pia mi yanduanma leni U Tienu kelima ti Diedo Jesu Kilisiti po.

² Jesu yaa po yo ke ti baa li dandanli, yaali n teni ke ti baa U Tienu ŋanbili, tin se yaali yaa niinni bonŋanla. Ti go pia li pamancianli, kelima ti daani ke ti baa taani leni U Tienu, o kpiagidi nni.

³ Lani bebe ka, ti pia li pamancianli tin ye yaa fala nni moko, kelima ti bani ke fala baa teni tin bangi li juunli.

⁴ Li juunli baa teni tin yaa se ke li pa mi biigima siiga. Ti yaa se ke li pa mi biigima siiga, li baa teni tin yaa pia mi suginma.

⁵ Mi suginma yeni kan boandi ti, kelima U Tienu buama gbieni ti pala, kelima U Tienu Fuoma Yua, wan puni ti yua yaa po.

⁶ U Tienu n den bili yaa yogunu n pundi, tin kaa den pia fidu yaa yogunu, Kilisiti den kpe ti tuonbiadi danba po.

⁷ Laa yabi o nilo n tuo ki kpe ba o niteginka po. Daalinba niloba baa yaa pia li papaali ki tuo ki kpe o niŋamo po.

⁸ Ama U Tienu n tieni yaala ki doagidi o buama ti po, tie ke tin da den tie ti tuonbiadi danba yaa yogunu, Kilisiti den kpe ti po.

⁹ Tin baa ke U Tienu saa ti po i moamoani, kelima Kilisiti soama po yeni, laa pia kuli tama, ke ti baa faabi leni U Tienu pabienli, kelima wani Kilisiti po.

¹⁰ Tin den tie U Tienu yibalinba yaa yogunu, o den teni ke ti mangi leni o, kelima o Bijua kuuma po. Lanwani, moala ke ti mangi leni o, laa pia kuli tama, ke ti baa faabi kelima o yaa miali po.

¹¹ Laa tie lani bebe ka, ama ti pia li pamancianli U Tienu nintuali, kelima ti Diedo Jesu Kilisiti po, wani yua n teni ke ti mangi leni U Tienu.

Adama leni Kilisiti

¹² Ti tuonbiadi den kua ŋanduna nni kelima niyendo yaa po, ti tuonbiadi yeni mo den teni ke mi kuuma kua. Li tie yeni ke mi kuuma den pundi bi nisaaliba kuli, kelima bikuli tieni ti tuonbiadi.

¹³ Hali ke U Tienu daa den bili o bali maama, ti tuonbiadi den ye ŋanduna nni. Ama ti tuonbiadi naa pia buudi li bali maama yàá ye.

¹⁴ Ba yeni, ki cili Adama yogunu ki yaa caa hali Musa yaa yogunu, mi kuuma den die bi niba kuli, ba yaa niba n kaa den tieni ti tuonbiadi nani Adama yeni. Adama tie yua n den baa ti cua yaa nannanli.

¹⁵ Ama laa taa yenma li ŋanbili leni ti tuonbiadi panpaani. Bi niba boncianla kpe, kelima Adama, o nikpialo yeni tuonbiadi po. Lanwani, laa pia kuli tama, ke bi niba boncianla baa U Tienu ŋanbili leni o paabu, yaabu n dua kelima Jesu Kilisiti, o niyuamo yeni yaa ŋanbili po.

¹⁶ U Tienu paabu mo n cuani yaala ki naani leni o nikpialo yeni yaa tuonbiadi n den cuani yaala. Adama yeni yaa tuonbiadi den cuani U Tienu buudi leni o cuonu. Ama ti tuonbiadi n den yabidi, naankani, U Tienu ŋanbili paabu den cuani li moamoansaali.

¹⁷ Li yaa tie Adama yeni n den tieni yaa tuonbiadi po, mi kuuma den diedi bi niba kuli ke bi kpe kelima laa niyendo po. Lanwani laa pia kuli tama, ke yaaba n baa U Tienu ŋanbicianli, ki go baa yaa paabu n tie li moamoansaali, baa yaa pia li miali ki die, kelima Jesu Kilisiti yaa po.

¹⁸ Nani niyendo tuonbiadi n den teni ke U Tienu cuonu cua bi niba kuli po maama, li go tie yeni, ke niyendo tuonteginkaali mo teni li moamoansaali, yaali n puuni li miali mo cua bi niba kuli po.

¹⁹ Nani niyendo yaa yiema n den teni ke bi niba boncianla tua ti tuonbiadi danba maama, li go tie yeni, niyendo yaa tuoma baa teni niba boncianla n baa li moamoansaali.

²⁰ U Tienu bali maama den yuandi ki cua ki teni ke i tagili n yabidi. Ama ti tuonbiadi n den yabidi naankani, U Tienu ŋanbili den yabidi likani ki cie.

²¹ Lanwani, nani ti tuonbiadi n den die bi niba ki teni ke bi ku maama, U Tienu ŋanbili mo diedi bi niba yene, kelima U Tienu saa bi po moamoani ke bi tiegi. Lani yaa po o kuani ba yaa miali n kan gbeni nni, kelima ti Diedo Jesu Kilisiti yaa po.