LOMA YAABA 4 - U TIENU MAAMA TILI 2013

Abalahama dandanli maama fuuli

¹ Ti baa yedi lede Abalahama po, wani yua n tie ti yaaja ti gbanandi nni? O den baa be ti gbanandi po?

² Li yaa tie ke o den baa li moamoansaali kelima o tuona po, o den baa fidi ki kpiagi o yuli. Ama o kan kpiagi o yuli U Tienu kani.

³ Lani yaa po, i Diani mo yedi lede? Li yedi: «Abalahama den daani U Tienu ke U Tienu den coadi o po la ke li tie teginma.»

⁴ Yua n soani li tuonli kuli baa baa o panpaani. O kan yaa nua ke o panpaani yeni tie paabu, yi tie pani yo.

⁵ Ama, yua n ki soani tuona, ki nan daani U Tienu yua n saagi i moamoani ti tuonbiadi daano po, U Tienu baa coadi o po o dandanli yeni, ke li tie teginme.

⁶ Yeni moko, Davidi doagidi yaa pamanli n ye leni U Tienu n coadi yaaba yaa teginma, ke laa ŋoadi a tuona po, ki yedi:

⁷ Li pamanli ye leni yaaba N baa sugili bi biadima po, Leni U Tienu n piini yaaba yaa tuonbiadi.

⁸ Li pamanli ye leni o Diedo n kan go tiadi Yaa nilo tuonbiadi po.

⁹ Naani laa pamanli baa yaa ye yaaba n kua ku koanciagu bebe yaa po, bi li baa yaa ye yaaba n ki kua moko yaa po yo? Ti yedi moala ne: «Abalahama den daani U Tienu, ke wani U Tienu den coadi o po la ke li tie teginma.»

¹⁰ Abalahama den tie lede, U Tienu n den coadi o po la yaa yogunu? O den kua ku koanciagu, bi o daa den kua? O daa den kua.

¹¹ O den baa ku koanciagu ke lan tua mi maalima ke o baa li moamoansaali, kelima o dandanli yaa po. Li yogunu sua ke o da tie jifolo yo. Lanwani, Abalahama tie yaaba n daani kuli yaa baa, ba ke bi tie jifola, ke U Tienu n coadi bani moko yaa po bi teginma.

¹² O go tie a junga moko yaa baa, bani yaaba n ki sedi leni ku koanciagu bebe ka, ama bimoko ŋua Abalahama dandanli fuuli, hali ke o daa kua koanciagu.

Abalahama den baa u ñoanianu kelima li dandanli po

¹³ Li naa tie kelima li bali maama kubima po ka ke U Tienu den niani Abalahama leni o buolu kuli, ke o baa teni ban diedi ŋanduna. Ama li tie wan den baa yaa moamoansaali, kelima li dandanli yaa po.

¹⁴ Li yaa tie li bali maama kubili yaa po yo ke bi tua bi faajieba, lanwani li dandanli tie fanma, U Tienu ñoanianu mo naa pia mayuli.

¹⁵ U Tienu bali maama baa cuani U Tienu pabienli cuonu. Li bali maama yàá ye, li bali maama miidima moko ki ye.

¹⁶ Lanwani, yaaba n baa baa U Tienu n den niani yaa ñoanianu baa baa u, kelima li dandanli yaa po. U Tienu bua ban baa u ñoanianu kelima o ŋanbili paabu po bebe. O bili ke o ñoanianu baa yaa ye Abalahama puoliŋuani kuli po. Laa tie yaaba n pia li bali maama bebe yaa po ka, ama yaaba n daani U Tienu nani Abalahama n den daani maama. Wani Abalahama tie tikuli yaaja. Nani lan diani maama:

¹⁷ «N teni ke a tua nibuoli boncianla baa.» U Tienu, Abalahama n den daani yua yeni, nua wani Abalahama yua n tie tikuli baa, wani U Tienu yua n teni ke bi tinkpiba go ye ki fo, ki go teni ke yaa bonla n ki ye n tua yaala n ye.

¹⁸ Abalahama den daani U Tienu ki pia mi suginma, ba ke o dugidi naa go den pia tin baa fidi ki sedi naani. Lani yaa po, o den tua i nibuoli boncianla baa, nani U Tienu n den maadi o maama ki yedi: «A puoliŋuani baa yaa yabi yene.»

¹⁹ Abalahama den bua ki pundi bina kobiga, ama o dandanli ki den tadigi, ba ke o laa ke o gbanandi tie nani ti kpe yeni, ke Sala mo pendi ti madi.

²⁰ Ba yeni, o yama ki den lengidi ke o luo li dandanli U Tienu po, ki nua ke o kan kuani wan den niani yaa ñoanianu. Ama o dandanli den paagi o, ke o kpiagi U Tienu.

²¹ O den daani ki go bani cain ke U Tienu n niani yaala, o go pia li fidu ki baa kuani o ñoanianu.

²² Lani yaa po, U Tienu den coadi la o po ke li tie teginma.

²³ Laa tie Abalahama bebe yaa po ka ke li diani: «U Tienu den coadi o po la.»

²⁴ Ama li diani tinba yaa po moko, U Tienu n baa coadi yaaba yaa po ke li tie teginma, tinba yaaba n daani U Tienu, wani yua n den fiini ti Diedo Jesu bi tinkpiba siiga.

²⁵ Bi den cuo o kelima ti yaa tagili po, ke o go fii bi tinkpiba siiga ke tin baa li moamoansaali.