LOMA YAABA 2 - U TIENU MAAMA TILI 2013

U Tienu buudi

¹ Fini, ŋan tie yua kuli, ki ja a lielo buudi, a kan baa ŋan baa tabi yaala ki gaa a yuli. Ŋan ja nitoaba buudi yeni, a cuo a yuli, kelima amoko tiendi nani bani yene.

² Ti bani ke U Tienu buudi tie moamoani, yaaba n tiendi laa bonbuolu kuli po.

³ Naani a tama ke fini yua n ja yaaba n tiendi laa bonbuolu buudi, ki nan tiendi la fini a ba yeni, ke a baa cia U Tienu bujiale?

⁴ Bi a fali o ŋanbicianli, o yansoangima leni o juunli, ki naa faami ke U Tienu tieni a po li ŋanbili, ki bua ki gobidi a, ŋan tuo ki lebidi a yama yo?

⁵ Ama, a juagi a pali, ki naa tuo ki lebidi. Li tie lani yaa po ke U Tienu baa doagidi o pabienli, wan baa jia bi niba buudi leni mi teginma yaa daali. Lani, a baa cuani a yuli po yaa cuonu n bia ki cie.

⁶ Landaali, U Tienu baa pa nilo kuli nani o tuona n den tie maama.

⁷ Yaaba n tiendi yaala n ŋani kaa cedi, ki lingi U Tienu kani ti kpiagidi, ti jigidi leni yaa miali n ki pia kuuma, U Tienu baa pa ba yaa miali n kan gbeni.

⁸ Ama yaaba mo n pia mi niama yantiali ki yie kaa tuo ki ŋua i moamoani, ki ŋua yaala n ki tiegi, ki tiendi yaala n bia, U Tienu baa jia bi buudi leni li pabienli.

⁹ Yaaba n tiendi mi biadima kuli, ki cili Jufinba, ki ŋoadi bi nilanba, baa le fala leni ti yanyagidi.

¹⁰ Ama yua n tiendi yaala n ŋani, ki cili Jufinba, ki ŋoadi bi nilanba, U Tienu baa pa ba ti kpiagidi, ti jigidi leni mi yanduanma.

¹¹ U Tienu naa tiendi gagidima bi niba siiga.

¹² Yaaba n tieni ti tuonbiadi kaa pia U Tienu bali maama kuli, baa bodi kaa pia li bali maama. Ama yaaba n tieni ti tuonbiadi, ki nan pia li bali maama kuli, U Tienu baa jia leni ba ti buudi nani o bali maama n bili maama.

¹³ Laa tie yaaba n cengi li bali maama ka tiegi U Tienu nintuali, ama yaaba n tiendi li bali maama n bili yaala, bani n tie bi niteginkaaba.

¹⁴ Moamoani po, yaaba n tie nilanba kaa pia li bali maama yaa tiendi li bali maama n bili yaala kelima bi yama po, bi bili li bali maama bi yula po, ba ke baa pia li bali maama.

¹⁵ Bi doagidi ke li bali maama n bili yaala diani bi pala nni, bi pala siedi moko yen bu leni ba, bi ki yen saagi bi po i moamoani.

¹⁶ Lani n baa doagidi, U Tienu n baa teni Jesu Kilisiti n jia bi nisaaliba n wuoni yaala kuli buudi yaa daali. Min wangi yaa Laabaaliŋamo moko yedi ke li baa yaa tie yeni.

Li bali maama n yedi yaala Jufinba po

¹⁷ Ama fini yua n yedi ke a tie Jufi, a jigi co U Tienu bali maama nni, ki kpiagidi a yuli, kelima ŋan pia yaa ŋantaado leni U Tienu.

¹⁸ Yeni de! A bani o yanbuama, ki go bani ki gandi yaala n ŋani ki cie, kelima bi den bangi a li bali maama.

¹⁹ A nua a yuli ke a tie gobidika a juama po leni mi yenma, yaaba n ye li biigili nni po.

²⁰ A go nua a yuli ke a tie tundika bi yanpiidanba leni bangika a biwaala po. A nua ke a pia li bali maama nni, yaala n wangi mi bandima leni i moamoani kuli.

²¹ Lanwani, fini yua n bangi nitoaba, Ŋaa bangi a yuli. Fini yua n wangi nitoaba ke ban da su, Amoko nan su.

²² Fini yua n tua nitoaba n da conbi, Amoko nan conbi. Fini yua n sengi i buli, A su yaala n ye a budiena nni.

²³ Fini yua n kpiagi a yuli ke a pia li bali maama, A teni ke bi niba sugidi U Tienu Kelima a miidi li bali maama.

²⁴ Nani lan diani maama: «Yinba yaa po n teni ke bi nilanba sugidi U Tienu yeli.»

²⁵ Yaala n tie ku koanciagu po, moamoani ku pia mayuli, a yaa tiendi li bali maama n bili yaala. Ama a yaa miidi li bali maama, a tua nani o jifolo yeni, ba ke a tie jungili.

²⁶ Yua n tie jifolo yaa tiendi li bali maama n bili yaala, li kan yaa tie nani o kua ku koanciagu yeni ka?

²⁷ Yua n tie jifolo buolu yaa tiendi li bali maama n bili yaala, o baa bu ki cuo ŋa, fini yua n pia li bali maama leni ku koanciagu, ki nan miidi li bali maama.

²⁸ Jufi naa tie yua n pia li nannanli ka, li jungili moko naa tie yua n pia li maalima o gbanandi nni ka.

²⁹ Yua n tie Jufi moamoani, tie yua n tie yeni hali o pali tugu nne. Ku koanciagu moko ŋua U Tienu Fuoma n tieni yaala o nilo pali nni, ke laa ŋua li bali maama. Yua n tie Jufi moamoani naa baadi ti pagidi bi niba kani ka, ama U Tienu kani.