LOMA YAABA 16 - U TIENU MAAMA TILI 2013

I fuondi

¹ N bua ki waani yi ke ti kpiilo Febe, Kilisiti Nitaanli Sankile dogu nni todika, tie yin baa fidi ki dugi yua yaa po.

² Yin gaa o cangu o Diedo nni, nani lan pundi bi nigagidiŋanba n yaa tiendi maama, ki todi o, wan bua yi todima yaala kuli nni. Wani o ba todi niba boncianla, ba leni mini moko.

³ Yin fuondi Prisili leni Akilasi, yaaba n tie n tuonsoanlieba Jesu Kilisiti tuonli nni.

⁴ Bi den luni bi yula ki gaa n miali. Laa tie mini bebe n tuondi ba li po. Kilisiti Nitaana bi nilanba siiga kuli tuondi ba li po.

⁵ Yin fuondi Kilisiti Nitaanli yaali n taagi bi diegu nni. Yin fuondi n buado Epayineti, yua n den kpa daani Jesu Asi diema nni, ki tie wani Kilisiti bonluonkakpiala likani.

⁶ Yin fuondi Mariyama, yua n den soani ki todi yi boncianla.

⁷ Yin fuondi n kpiiba Andronikusi leni Juniasi, mini leni yaaba n den taani ki ye li kpaadidieli nni. Jesu tondiba siiga, bi tie ban jigindi yaaba boncianla. Bi den daani Kilisiti hali ke mini daa daani o.

⁸ Yin fuondi Anpiliatusi wani yua n tie n buado o Diedo nni.

⁹ Yin fuondi Uriben, ti tuonsoanlielo Kilisiti nni leni n buado Sitakisi.

¹⁰ Yin fuondi Apelesi, wani yua n doagidi ki se Kilisiti nni ke li pa. Yin fuondi Arisitobuli deni yaaba.

¹¹ Yin fuondi n kpiilo Herodion. Yin fuondi Narsisi deni yaaba, yaaba n tie o Diedo yaaba.

¹² Yin fuondi Tirifeni leni Tirifosi, yaa puoba n tuuni o Diedo tuonli boncianla. Yin fuondi Persidi n danlimoano, yua n soani o Diedo tuonli hali boncianla.

¹³ Yin fuondi Rufusi o Diedo n gandi yua leni o naa yua n tie nmoko yaa naa.

¹⁴ Yin fuondi Asinkiliti, Filegon, Hermesi, Patilobasi, Hermasi leni ti kpiiba yaaba n ye leni ba.

¹⁵ Yin fuondi Filologi, Julia, Nere leni o naataanpuoga Olinpa leni yaa nigagidiŋanba n ye leni ba kuli.

¹⁶ Yin fuondi yiyaba ki gobini yiyaba leni mi buamoanma. Kilisiti Nitaana kuli fuondi yi.

I tundijuodike

¹⁷ N kpiiba, n tundi yi, ke yin fangi yi yula leni yaaba n fiindi mi paadima, ki go tie tingbali bonla yi siiga, ki naa ŋua yin den baa yaa bangima. Yin foagidi leni ba.

¹⁸ Laa nibuolu naa tuuni ti Diedo Kilisiti po ka, bi tuuni bi tugidi po yo. Bi maadi mi madingima leni mi mamanma, ki boandi yaaba n ki fani.

¹⁹ Ama yinba wani, bi niba kuli bandi yi tuoma. Lani yaa po, n mangi n pali yi po. N bua yin yaa fani yaala n ŋani tienma po, ki da pia tagiliba kuli yaala n bia yaa tienma nni.

²⁰ Li kan waagi ke mi yanduanma Tienu baa paadi Sutaani, ki midi o yi taana tiipo. Ti Diedo Jesu yaa ŋanbili n yaa ye leni yi.

²¹ N tuonsoanlielo Timote fuondi yi. N kpiiba Lusiwusi, Jason leni Sosipateeri moko fuondi yi.

²² Mini Tertiyusi yua n diani li naa tili o Diedo nni, nmo fuondi yi.

²³ Min cani yua, Gayusi, Kilisiti Nitaanli n taagi yua yaa diegu nni, fuondi yi. Erasiti, yua n tie u naa dogu ligikubilo fuondi yi, wani leni ti kpiilo Kalitusi kuli. [

²⁴ Ti Diedo Jesu Kilisiti ŋanbili n yaa ye leni yikuli. Amina!]

Ti pagijuodikaadi

²⁵ Tin yaa kpiagidi U Tienu, wani yua n baa fidi ki teni yin yaa se ke li pa o sanŋoadima nni, nani min wangi yaa Laabaaliŋamo, ki doagidi Jesu Kilisiti, n yedi maama. N wangi o nani U Tienu bondoaginkaala, yaala n den duagi ŋasiili nni hali yogu. Laa bondoaginkaala doagidi moala.

²⁶ U Tienu yua n ye yogunu kuli ñani o ñoamabonli, ki yedi ke o bondoaginkaala n doagidi i nibuoli kuli po, kelima o saawalipuaba n diani yaa tila po. U Tienu tieni yeni ki bua ke i nibuoli kuli n tuo li dandanli.

²⁷ Jesu Kilisiti po, tin yaa kpiagidi U Tienu, kelima wani bebe n pia mi yanfuoma kuli. Tin yaa kpiagidi o hali yaa yogu n tuu yaa yogu. Amina!