LOMA YAABA 12 - U TIENU MAAMA TILI 2013

Li dandanli yua n baa yaa ye maama 12.1—15.13 Li miapanli yema

¹ Lani yaa po, n kpiiba, n mia yi ki go tundi yi, kelima U Tienu ninñingbadima po, ke yin pa U Tienu yi yula nani yaa padili n fo, yaali n gagidi ki ŋani ki mani o po. Lani n tie lan pundi, yin yaa kpiagidi o maama.

² Da taani mani leni ŋanduna na niinni yaaba. Ama yi yantiana pandima n teni yin lebidi, ke yin fidi ki gagidi ki bandi U Tienu yanbuama. Lani n tie yaala n ŋani, ki mani o po, ki go dagidi cain.

³ Min baa yaa ŋanbili paabu po, n yedi yikuli yendo yendo, yin da nua yi yula ke yi cie yin tie maama. Yin yaa pia li yumiinli, ki cuo ki dagini nani U Tienu n biigi ki puni yuakuli li dandanli yaa banlu.

⁴ Nani tin pia i gbananbuoli ke i yabi gbananyendi nni maama, ke i gbananbuoli yeni ki taataa tuona,

⁵ li go tie yeni leni tinba yaaba n ye Kilisiti nni. Ba ke ti yabi, tikuli tie gbananyendi ki tuugi leni tiyaba, nani i gbananbuoli n tuugi leni iyii maama.

⁶ Ama tin pia yaa paabu ki taataa, nani U Tienu n puni yuakuli li ŋanbili maama. Lanwani, yua n pia saawali puama paabu, wan yaa wangi ma ke li ŋua leni li dandanli.

⁷ Yua n pia o lieba todima paabu mo, wan yaa todi leni yantiayenli. Yua n pia mi bangima yaa paabu mo, wan yaa bangi ma.

⁸ Yua mo n pia ki yaa paagidi o lieba pala yaa paabu, wan yaa paagidi bi pala. Yua n pia ki yaa puuni yaaba n luo bu paabu mo, wan yaa puuni ba leni ti bulicindi. Yua n baa mi gobidima yaa paabu mo, wan yaa gobidi leni li yankuali. Yua mo n baa mi ninñingbadima yaa paabu, wan yaa pia li pamanli li po.

⁹ Yin da bua yi lieba mo leni palalie. Yin yaa nani yaala n bia, ki yaa kubi yaala n ŋani ke li pa.

¹⁰ Yin yaa bua yiyaba nani yaaba n kpi yeni, ki yaa jigindi yiyaba.

¹¹ Yaa tuuni mani leni li yankuali, ki da pia kpadije, yi pala n yaa tuoni yi tuonli po, kelima yi tuuni o Diedo po.

¹² Yin yaa mangidi yi pala yin pia yaa suginma nni. Yin yaa pia li juunli fala nni. Yin yaa jaandi ki da cedi.

¹³ Yin yaa todi mani bi nigagidiŋanba leni ban luo yaala, ki gaani bi canba cangu bonŋanla.

¹⁴ Yaa gaaliti mani yaaba n wangi yi fala. Yeni de! Gaali ba mani, ki da soli ba.

¹⁵ Yin mangi yi pala leni yaaba n pia li pamanli, ki buudi leni yaaba n buudi.

¹⁶ Yin yaa pia yantiayenli leni yiyaba. Yin da bua ki yaa tie niciama. Yin da fiini yi yula, ama yin cedi li yumiinli n diedi yi. Da nua mani yi yula ke yi tie yanfuodanba.

¹⁷ Yin da guani oba mi biadima, kelima wan tieni yi yaa biadima po. Yaa lingi mani yaala n ŋani bi niba kuli nintuali.

¹⁸ Yin moandi mani yin fidi maama kuli, ke li yaa ŋua yinba, yin yaa ye leni mi yanduanma leni bi niba kuli.

¹⁹ N buakaaba, da tuu mani mi biadima panpaani yi yula po. Ama yin cedi mani U Tienu pabienli daali n cua, kelima li diani: «Mini n tie o pantuulo, mini n baa tuu mi biadima panpaani,»

²⁰ ki go yedi: «Mi koma yaa gbadi a yibali, Ŋan pa o wan je. U ñuñuunu yaa gbadi o, Ŋan pa o wan ño. A yaa tieni yeni, A dogini o yuli po a mukuanmoana.»

²¹ Ŋan da tuo mi biadima n paadi a, ama ŋan paadi mi biadima, kelima mi ŋanma tienma po.