LOMA YAABA 10 - U TIENU MAAMA TILI 2013

¹ N kpiiba, n pali buama leni n miabu U Tienu kani Isidayeli buolu po tie ke ban tindi.

² N tieni bi po siedi ke bi pia li yankuali U Tienu sanŋoadima po, ama baa pia mi bandima.

³ Ban ki bani U Tienu n puuni yaa moamoansaali yeni, li teni ke bi lingi bi yula po li moamoansaali ki naa lingi li U Tienu kani.

⁴ Kelima Kilisiti n teni ke li bali maama kua, ke yaaba n daani kuli n baa li moamoansaali.

Yua n daani Jesu kuli baa tindi

⁵ Musa diani yaa teginma n baadi kelima li bali maama kubima po ki yedi: «Yaa nilo n tiendi man bili yaala kuli baa yaa ye kelima mi yaa po.»

⁶ Ama yaa moamoansaali n baadi kelima li dandanli yaa po, bi yedi mine: «Ŋan da yedi a pali nni: ‹Ŋme n baa do tanpoli?› » Lani n tie ki ban teni Kilisiti n ña lipo ki jiidi.

⁷ Ŋan da go yedi mo: «Ŋme n baa jiidi ki gedi u kulu nni?» Lani n tie ki ban teni Kilisiti n ña likani ki fii bi tinkpiba siiga.

⁸ Lanwani, bi yedi lede? Bi yedi yaala n tie ne: «U Tienu maama ye ki kuu leni yi bonŋanla, ki ye yi ñoana nni leni yi pala nni. Mani n tie li dandanli yaa maama, tin wangi yi yaama.»

⁹ A yaa tuo leni a ñoabu bi niba nintuali ke Jesu tie o Diedo, ki daani a pali nni ke U Tienu den fiini o bi tinkpiba siiga, a baa tindi.

¹⁰ Kelima li tie li dandanli a pali nni n baa teni ŋan baa li moamoansaali. A ñoabu tuoma bi niba nintuali mo n baa teni ŋan baa mi tindima.

¹¹ Nani i Diani n yedi maama: «Yua n daani o kan le fe.»

¹² Lanwani, mi gagidima ki ye Jufi leni yua n kaa tie Jufi siiga, bikuli taa Diediyendo, wani yua n seligidi yaaba n jaandi ki miadi o kuli boncianla.

¹³ Li diani: «Ama yua n jaandi ki mia o Diedo yaa yeli nni kuli, baa faabi.»

¹⁴ Bi baa mia ban kaa daani yua lede? Bi baa tuo ki daani ban daa gbadi yua yaa maama lede? Bi baa gbadi o maama mo lede, oba buli yàá wangi ba?

¹⁵ Oba kuli yaa soani U Tienu mawangikaaba mo, bi baa gaa lede ki yaa wangi o maama? Nani lan diani maama: «Diidi mani bi cenli n ŋani maama, Bani yaaba n cua ki wangi o Laabaaliŋamo.»

¹⁶ Ama bikuli naa den tuo ki ŋoadi o Laabaaliŋamo. Esayi den doagidi la ki yedi: «O Diedo, ŋme daani ti maama?»

¹⁷ O nilo baa baa li dandanli kelima wan gbadi yaala po, wan gbadi yaala mo tie Kilisiti maama.

¹⁸ To, n buali line, naani baa gbadi u tondu bi? Bi gbadi saa. Li diani: «Bi niali yadi yadi ki tinga nni kuli, Bi maama mo yadi yadi hali ŋanduna banlu kuli.»

¹⁹ N go buali, naani Isidayeli buolu naa den bani yo? Musa n den kpa maadi li maguankaama ki yedi: «N baa teni ke yaaba N kaa tie nibuomoanu N yaa ñundi yi buolu li mutuoli. Yeni de! N baa teni yaa nibuolu N kaa pia mi yanfuoma N fiini yi pala.»

²⁰ Esayi den pia li papaali ki cie ki yedi: «Yaaba n kaa lingi nni, bani n laa nni, N den doagidi n yuli Bani yaaba n kaa lingi nni po.»

²¹ Ama Isidayeli buolu po o yedi: «Daali kuli n tiani n nii Ki bua ki mangi Leni yaaba n tie niyiekaaba Leni tupaalu danba.»