Levi 9 - U TIENU MAAMA TILI 2013

Alono leni o bijaba n cili ki padi yaa pada

¹ Dananii n den pendi, Musa den yini Alono leni o bijaba, ki go yini Isidayeli yaaba nikpela.

² O den yedi Alono: «Ŋan baa naatonbili i candanbaani padili po, ki go baa petonli li padijuukaali po, bikuli n yaa ŋani cain ki da pia poadi. A baa cuani ba o Diedo nintuali.

³ Ŋan go yedi Isidayeli yaaba n baa li ŋuabuali i candanbaani padili po, ki go baa li padijuukaali mo yaa po, naabiga leni pebiga, ban pundi binyenli yenli. Ban yaa tie yaaba n ki pia poadi.

⁴ Ban go baa mi taanyenma padili naatonli, li petonli, yaa padili n tie jiema ki kali leni mi kpama, ki padi ba o Diedo nintuali, kelima dinla o Diedo baa doagidi o yuli yi po.»

⁵ Bi den taa Musa n den waani ba yaala yeni kuli, ki cuani u Kadikaanu Gbandieli buliñoabu kani. Li nitaanli kuli den cua ki sedi o Diedo nintuali.

⁶ Musa den yedi: «Tieni mani o Diedo n puogi yi yaala, lani, wani o Diedo kpiagidi baa doagidi yi po.»

⁷ O den yedi Alono: «Nagini li padibinbinli kani, ki padi a candanbaani padili leni a padijuukaali. Tieni yeni ki mia sugili fini a ba po leni bi niba kuli po. Lani, ŋan padi bi niba po, ki mia bi po sugili nani o Diedo n bili maama.»

⁸ Lanwani, Alono den nagini li padibinbinli kani, ki kodi o tuonbiadi sugili miabu naatonbili yeni.

⁹ O bijaba den gaa mi soama ki teni o, o den tuuni o nubili mi soama nni, ki duuni ma li padibinbinli yina po, ki wuli yaama n sieni li padibinbinli tiipo.

¹⁰ O den juu ti tuonbiadi sugili miabu padiyanga yeni kpama, ki cayaana leni ki pualanma li padibinbinli po, nani o Diedo n den puogi Musa maama.

¹¹ Ama o den taa ki ñani ti nandi leni ku gbangu hali li nagili niini po, ki juu ki buoni likuli.

¹² Li yaa puoli, o den kodi li padijuukaali padiyanga, o bijaba den gaa mi soama ki teni o, ke o wuli ma li padibinbinli kaani kuli.

¹³ Bi go den teni o ki padiyanga yeni ke ki jia jia bonjena jena leni li yuli, ke o juu li padibinbinli po.

¹⁴ O den ŋuudi a biana leni ti nuadi, ki maani li padijuukaali po, ki juu likuli li padibinbinli po.

¹⁵ Li yaa puoli, o den padi bi niba po bi yaa padili. O den taa ti candandi yaa ŋuabuali ki kodi li, ki padi ki mia bi po sugili bi tuonbiadi po, nani wan bi kodi ki padiyankpiaga maama.

¹⁶ O den padi bi niba po li padijuukaali yanliediti yeni, ki ŋoadi lan bili maama.

¹⁷ O go den padi yaa padili n tie jiema. O den yidi mi yoma nukuli ki juu ma li padibinbinli po, ke laa taa leni tiŋaagu kuli yaa padijuukaali.

¹⁸ Lani, o den kodi li naatonli leni li petonli ke li tua bi niba po taanyenma padili. Wani Alono bijaba den gaa mi soama ki teni o ke o wuli ma li padibinbinli kaani kuli.

¹⁹ Bi den teni o li naatonli yeni kpama, li petonli yeni juoli, yaa kpakaagu n ŋuagi ti nuadi, a cayaana leni mi pualanma.

²⁰ Bi den maani mi kpama yeni a benguna po. Alono den juu mi kpama yeni li padibinbinli po.

²¹ Lani, Alono den yua ti padiyandi yeni benguna leni li jienpanli ki tieni yaa bogidili n doagidi ke o teni la o Diedo.

²² Alono n den padi ti candandi pada, a padijuukaana leni mi taanyenma pada yeni ki gbeni, o den yugidi o nii ki gaali bi niba. Li yaa puoli, o den jiidi ki ñani li padibinbinli kani.

²³ Musa leni Alono den kua u Kadikaanu Gbandieli nni. Ban den guani ki ñani, bi den gaali bi niba. O Diedo kpiagidi den doagidi Isidayeli yaaba kuli po.

²⁴ U mu den ñani o Diedo nintuali ki juu a padijuukaana leni yaa pada n sieni kpama kuli, li padibinbinli po. Bi niba kuli n den laa lani, bi den kpaani leni li pamanli, ki baa ki labini.