Levi 8 - U TIENU MAAMA TILI 2013

O kopadiciamo badinli 8—10 Musa gagidi Alono leni o bijaba a pada tuonli po

¹ O Diedo go den yedi Musa:

² «Yini Alono leni o bijaba, ki taa ti tiayiekaadi leni mi gagidima kpama leni yaa naatonli n baa tua ti candandi padili, ki go taa petonalie leni yaa baabuogu n gbie leni yaa dupen n ki pia dabinli.

³ Ŋan yini bi niba kuli, ban taani u Kadikaanu Gbandieli buliñoabu kani.»

⁴ Musa den tieni o Diedo n den puogi o yaala. Bi niba kuli den taani ki se u Kadikaanu Gbandieli buliñoabu kani.

⁵ Musa den waani li nitaanli o Diedo n puogi o wan tieni yaala.

⁶ O den teni ke Alono leni o bijaba nagini. O den wali ba.

⁷ O den lani Alono ki liadibiga, ki ñagini o ciaga ku gbanñagidigu, ki lani o li liadicianli. Li yaa puoli, o den lani o li cabilakaali ki loli li leni li ñagidu.

⁸ O den lani bi kopadicianba bado li bencabili, ki ŋuuni lienni Urim leni Tumim.

⁹ Lani, o den yilini o ku yufinfinjuagu, ki cibini o yaa fogiliga n tie wula mi gagidima maalima, nani o Diedo n den puogi musa maama.

¹⁰ Li yaa puoli, Musa den taa yaa kpama n tie mi gagidima po, ki wuli u Kadikaanu Gbandieli leni yaala n ye lienni kuli po, ki gagidi likuli.

¹¹ O den mii mi kpama li padibinbinli po hali taalimilele. O den wuli li padibinbinli leni li tuonsoantiadi kuli po. O go den wuli ku ñinniditiagu leni ku sedikaanu po, ki gagidi likuli.

¹² Musa go den wuli mi kpama Alono yuli po, ki wuli o po ki gagidi o.

¹³ Musa go den teni ke Alono bijaba nagini. O den lani ba a liada, ki ñagini bi ciamu a cabiñaginkaana, ki cibini ba mu fogilimu nani o Diedo n den puogi Musa maama.

¹⁴ O den teni ke bi cuani li naatonli i candanbaani padili po. Alono leni o bijaba den maani bi nii li naatonli yeni yuli po.

¹⁵ Musa den kodi li, ki gaa mi soama ki tuu ma leni o nubili, ki duuni li padibinbinli yina leni li lindima kuli, ki ŋanbi li padibinbinli yeni, ke li ŋani cain. O den wuli mi soama li padibinbinli tiipo, ki gagidi li ti tuonbiadi sugili miabu tuonli po.

¹⁶ O den taa yaa kpakaagu n ŋuagi ti nuadi, li puali, a cayaanlieda leni a kpama, ki juu likuli li padibinbinli po.

¹⁷ Ama o den teni ke bi ñani li naatonli yeni gbangu, li nandi leni li nuadi kuli li nagili niini po, ki juu ke li buodi cain nani o Diedo n den pugi Musa maama.

¹⁸ Li yaa puoli, o den teni ke bi cuani li padijuukaali petonli, Alono leni o bijaba den maani bi nii li petonli yeni yuli po.

¹⁹ Musa den kodi li ki wuli li soama li padibinbinli kaani kuli.

²⁰ O den paadi paadi li petonli yeni nandi. O den juu li yuli, a nanjena leni mi kpama.

²¹ Ama o den taa mi ñima ki ŋuudi ti nuadi leni a biana, ki juu ki buoni li petonli yeni kuli cain li padibinbinli po. Li den tie yaa padili n juu ki buodi cain, yaali yaa nuulu n mani o Diedo po, nani wani o Diedo n den puogi Musa maama.

²² Musa go den teni ke bi cuani li petonlieli, yaali n tie bi kopadicianba bali dinma po yeni. Alono leni o bijaba den maani bi nii li petonli yeni yuli po.

²³ Musa den kodi li petonli yeni ki gaa mi soama, ki tuuni o nubili mi niinni ki duuni Alono jientubili tiipo, o jiennubijali po leni o jientajenbijali po.

²⁴ O den teni ke Alono bijaba mo nagini o kani. O go den duuni mi soama yuakuli jientubili tiipo, o jiennubijali leni o jientajenbijali, ki yuandi ki wuli mi soama li padibinbinli kaani kuli.

²⁵ Lanwani, Musa den paadi ki ñani yaa nankpama n tie ne: li juoli, yaa kpakaagu n ŋuagi ti nuadi, mi pualanma, a cayaanlieda, a kpama leni li jienpanli.

²⁶ O den tuuni ki taa dupenyendo, yaa maadili n pua leni mi kpama bonyenli leni yoncangiyenli, yaa baabuogu n pia yaa dupen n ki pia dabinli ki se o Diedo nintuali yeni niinni. O den taa la ki maani mi kpama leni li panli po.

²⁷ O den taa laa bonla kuli ki teni ke Alono leni o bijaba tebini la bi nii nni, ki tieni yaa bogidili n doagidi ke o teni la U Tienu.

²⁸ Li yaa puoli, o den gaa ki juu likuli li padibinbinli po, li padijuukaali tanpoli. Lini n tie li kopadiciantuonli kuama padili, yaa padili n juu ki buodi cain, yaali yaa nuulu n mani o Diedo po.

²⁹ Musa den taa li padipetonli yeni bengunli, ki tieni yaa bogidili n doagidi ke o teni li U Tienu. Laa biinu tie o yaa biinu yo, nani o Diedo n den bili maama.

³⁰ Musa den taa mi gagidima sogima kpama leni yaa soama n den ye li padibinbinli po, ki mii Alono leni o tiadi po, ki go mii o bijaba leni bi yaa tiadi mo yaa po. O den tieni yeni ki gagidi Alono, o tiadi leni Alono bijaba leni bi mo yaa tiadi.

³¹ Musa den yedi Alono leni o bijaba: «Ŋaani mani ti nandi u Kadikaanu Gbandieli buliñoatuogili kani. Yi baa ŋmani ti lankane. Yi baa ŋmani ti leni yaa dupen n ye li kopadiciantuonli kuama baabuogu nni yeni, nani min den puogi yi maama, ki yedi ke Alono leni o bijaba n baa ŋmani ti.

³² Dupen bi nandi yaa sieni, yi baa taa ki juu.

³³ Yi kan ña u Kadikaanu Gbandieli buliñoabu kani hali danalele, hali yi tuonkuama badu dana n pendi. Yi kopadiciantuonli kuama badu yeni baa yaa tie hali danalele.

³⁴ Yaala n tieni dinla ne, o Diedo n bili la, ke yin baa yi tuonbiadi sugili.

³⁵ Lanwani, yi baa yaa ye u Kadikaanu Gbandieli buliñoabu kani, hali danalele, u yensiinu leni ku ñiagu kuli. Yin yaa kubi mani o Diedo bali maama kuli. Yeni, yi kan kpe. Lani n tie U Tienu n teni yaa ñoamabona.»

³⁶ Alono leni o bijaba den tieni o Diedo n den teni Musa yaa ñoamabona kuli.