Levi 7 - U TIENU MAAMA TILI 2013

d. Mi tudima candanbaani padili

¹ Line n tie mi tudima candanbaani padili bali maama. Li tie yaa bonla n gagidi ki ŋani cain.

² Ban kodi a padijuukaana padiyandi naankani yeni, bi baa kodi mi tudima candanbaani padiyandi moko lankane. Bi baa mii mi soama li padibinbinli kaani kuli.

³ Bi baa taa yaa nankpama n tie ne ki cuani o Diedo po: Li juoli, yaa kpakaagu n ŋuagi ti nuadi,

⁴ a cayaanlieda, yaa kpama n ye a loga nni, mi pualanma ban baa taani ki tabidi ki ñani yaama leni a cayaana.

⁵ O kopadiciamo baa juu likuli li padibinbinli po o Diedo nintuali. Li tie mi tudima candanbaani padili.

⁶ Bi kopadicianba siiga, a bonjala bebe n baa fidi ki ŋmani laa padinandi. Bi baa ŋmani ti yaa kaanu n gagidi, kelima li tie yaa bonla n gagidi ki ŋani cain.

⁷ Mi tudima padili leni ti candandi yaa padili bali maama kuli tie yenme. Yaa kopadiciamo n padi laa padili ki mia sugili yeni n die ki padiyanga.

e. O kopadiciamo biinu

⁸ O kopadiciamo yaa padi padijuukaali nilo po, wani n die ki padiyanga gbangu.

⁹ Yaa padili n tie jiema, mi yaa luoni u fanu nni, bi bi yaa luoni ma sanga nni, bi bi yaa sagi ma, yaa kopadiciamo n padi yeni n die laa padili.

¹⁰ Yaa pada n sieni ki tie jiema, ama ki nan tie jekaadi ki kali leni mi kpama, bi kaa pia kpama, Alono bijaba kuli n die ke gagidima ki ye.

f. Mi taanyenma pada

¹¹ Mi taanyenma pada, ban baa padi ya o Diedo po, bali maama nne:

¹² Nilo yaa cua mi taanyenma padili po ke li tie tuondi, o baa padi mi taanyenma padiyanga yeni, ki pugini yaa dupen n kali leni mi kpama kaa pia dabinli leni yaa yoncagidi ke bi wuli yi po mi kpama, ke yii pia dabinli, ki go cuani ban pua yaa lalaadi leni mi yonŋanma leni mi kpama.

¹³ O baa cuani yaa dupen n pia li dabinli, ki taani leni laa jiema kuli, likuli n taani ki tua o tuondi leni o taanyenma padili.

¹⁴ Bi baa ñani ñani wan cuani yaa jebuoli yeni kuli kani waamu waamu, o Diedo po. Yaa kopadiciamo n mii mii mi soama yeni n die lani.

¹⁵ Ban ŋmani mi taanyenma yeni padinandi, ki je i tuondi padijiema yeni ban padi yaa daali, ki da tuo liba n faa.

¹⁶ Nilo yaa padi taanyenma padili kelima o den niani nianli bi li yaa tie yanbuama po, bi baa ŋmani ti padinandi ban padi yaa daali. Yaala n sieni, ban faa ki ŋmani.

¹⁷ Li dataali yaa sua ke ti nandi baa ki ye, ban juu ki buoni ti.

¹⁸ Nilo yaa ŋmani mi taanyenma padinandi li dataali daali, o Diedo kan gaa o padili. Li kaa pia o po todima ba waamu, kelima li tie joagindi yo, yua n ŋmani kuli baa tugi o tagili.

¹⁹ Yaa nandi n tabini yaa bonla n joagini kuli, bi kan ŋmani ti, se ban juu ki buoni ti. Yaa nilo n ki ye leni joagindi kuli baa fidi ki ŋmani mi taanyenma padili nandi yeni.

²⁰ Ama nilo yaa ye leni joagindi ki nan ŋmani mi taanyenma padinandi, o Diedo n die yaadi yeni, bi baa paadi ki ñani laa nilo o buolu nni.

²¹ Yaa nilo n sii yaa bonla n joagini, li yaa tie nisaalo yaa joagindi bi yaa yanga n joagini, bi lan tie yaa joaginbuolu kuli, o yaa ŋmani mi taanyenma padinandi, o Diedo n die yaadi yeni, bi baa paadi ki ñani laa nilo o buolu nni.»

A pada bali maama u buolu po

²² O Diedo go den yedi Musa:

²³ «Yedi Isidayeli yaaba mine: Yi kan ŋmani nua bi pia bi ŋuabo kpama.

²⁴ Yanga yaa kpe, bi fuayanga yaa cuo ka, yi baa fidi ki taa ki kpama ki tieni yin bua ki tieni yaala kuli, ama yi kan je ma.

²⁵ Nilo yaa dini ban padi o Diedo po yaa padijuukaana kpama, bi baa paadi ki ñani laa nilo o buolu nni.

²⁶ Yin baa yaa ye naankani kuli, yin da ŋmani soama. Lan tie ti bonyugiditi, bi lan tie yandi yaa soama.

²⁷ Nilo yaa ŋmani soama, lan tie yaa soabuolu kuli, bi baa paadi ki ñani laa nilo o buolu nni.»

²⁸ O Diedo go den yedi Musa:

²⁹ «Yedi Isidayeli yaaba mine: Nilo yaa padi taanyenma padili, o baa teni o Diedo wan die yaala.

³⁰ Wani o ba, baa ñani yaala n baa juu ki buodi, lani n tie mi kpama leni li bengunli, ki cuani o Diedo nintuali. O baa tieni yaa bogidili n doagidi ke o teni la U Tienu.

³¹ O Diedo nintuali, o kopadiciamo baa juu mi kpama li padibinbinli po, li bengunli mo n tua Alono leni o bijaba yaa biinu.

³² Mi taanyenma padili yeni niinni, yi baa ñani li jienpanli ki teni o kopadiciamo.

³³ Alono bijaba siiga, yua n gaa mi taanyenma padili soama leni mi kpama ki cuani li padibinbinli kani, wani n die li panli yeni. O yaa biinu yo.

³⁴ U Tienu wani o ba bili ke yinba Isidayeli yaaba, yin ñani mi taanyenma padiyandi kani a benguna leni a pana, ki teni Alono leni o bijaba. Laa bali maama baa yaa ye hali yaa yogunu kuli.»

³⁵ Lani n tie Alono leni o bijaba n baa yaa biinu Isidayeli yaaba n puuni yaala siiga. Ban wuli bi po mi kpama ki gagidi o Diedo kopadiciantuonli po yo, ke bi baa laa sanu.

³⁶ Lani n tie o Diedo n bili yaala Isidayeli yaaba po, ban teni Alono leni o bijaba, ki cili ban wuli bi po mi kpama ki gagidi ba yaa daali. Li tie yaa bali maama n baa yaa ye hali yaa yogunu kuli. Isidayeli yaaba leni bi puoliŋuani kuli baa yaa kubi ma.

³⁷ Lani n tie a padijuukaana, yaa pada n tie jiema, ti candandi pada, mi tudima candanbaani yaa pada, o kopadiciamo dinma yaa pada leni mi taanyenma yaa pada kuli mabilikaama.

³⁸ Wan den bili ke ban yaa kpendinni o po a pada yaa daale, ke o Diedo den teni Musa laa bali maama, Sinayi juali yuli po, ban den ye Sinayi fanpienma nni yaa yogunu.