Levi 6 - U TIENU MAAMA TILI 2013

A pada bali maama a. A padijuukaana

¹ O Diedo den maadi leni Musa, ki yedi o:

² «Teni Alono leni o bijaba yaa bali maama n tie ne: A padijuukaana bali maama nne: Li padijuukaali baa yaa maa li padibinbinli po, ki yaa dua ki co hali lan ban faa. U mu baa yaa co li padibinbinli po ki kan gbindi.

³ Li yaa fii ki faa, o kopadiciamo baa la yaa liadicianli n luni leni len gaali, ki go yie yaa kpataali n luni leni len gaali, ki wodi yaa fantanpienma n ye li padibinbinli po, u mu n den juu ki buoni li padijuukaali yeni ki ŋaa yaala. Wan wodi ki bili ki balini li padibinbinli.

⁴ Li yaa puoli, wan landi o tiadi yeni ki la tiatoadi, ki taa mi fantanpienma yeni ki ñani li nagili niini, ki ban lu ma yaa kaanu n gagidi.

⁵ U mu baa yaa co li padibinbinli po yogunu kuli, ki kan gbindi. Tiŋaagu kuli, o kopadiciamo baa pugini ti daadi, ki maani li padijuukaali po. O baa juu mi taanyenma padili kpama li po.

⁶ U mu baa yaa co li padibinbinli po yaa yogunu kuli, ki kan gbindi abada.

b. Yaa padili n tie jiema

⁷ Line n tie yaa padili n tie jiema bali maama. O Diedo nintuali, Alono bijaba n baa cua ki padi laa padili li padibinbinli kani.

⁸ Bi siiga yendo baa yidi o nukuli nni yaa yonŋanma n kali leni mi kpama leni a dugibila. O baa juu laa yoma li padibinbinli po, man tua mi tiadima bonla, yaala yaa nuulu n mani o Diedo po.

⁹ Alono leni o bijaba baa je yaala n sieni laa padili nni, u Kadikaanu Gbandieli luolu, yuu n gagidi yaa niinni. Bi baa je ma ke dabinli ki ye lienni.

¹⁰ Ban da tieni dabinli lienni. Lani n tie min teni ba yaa biinu, n padijuukaana siiga. Li tie yaa bonla n gagidi ki ŋani cain, nani ti tuonbiadi leni mi tudima candanbaani pada yeni.

¹¹ Alono bila siiga, a bonjala kuli baa je laa jiema, kelima ban kpendinni o Diedo po yaa pada siiga, laa bonla tie ban die yaala hali yaa yogunu kuli. Nitoa yaa sii la kuli, yaala n bia baa le o.

¹² O Diedo den yedi Musa:

¹³ Line n tie Alono leni o bijaba n baa cuani yaa paabu ki pa o Diedo, ki cili ban wuli bi po mi kpama ki gagidi ba a pada tuonli po yaa daali. Daali kuli, bi baa cuani mi yonŋanma kilo bonbitaa ki boagidi kaanilie, ku tiŋaagu leni ku yenjuagu po.

¹⁴ A baa sagi ma leni mi kpama ki sanga nni, ki cabidi boncaba caba ki cuani, man tua yaa paabu yaa nuulu n mani o Diedo po.

¹⁵ Alono bijaba siiga, bi yaa ti faa ki gagidi yua ke o tua bi kopadicianba bado ki lebidi Alono, n baa yaa puuni laa paabu. Li tie yaa padili n baa yaa tiendi o Diedo nintuali yaa yogunu kuli. Laa paabu kuli baa juu ki buodi cain.

¹⁶ Kopadiciamo n puni yaa paabu kuli baa juu ki buodi cain. Bi kan je liba kuli lienni.»

c. Yaa pada n tie ti candandi po

¹⁷ O Diedo den yedi Musa:

¹⁸ «Yedi Alono leni o bijaba mine: I candanbaani pada bali maama n tie ne: Ban kodi a padijuukaana yandi naankani yeni, bi baa kodi i candanbaani padiyandi lankane, o Diedo nintuali. Li tie yaa bonla n gagidi ki ŋani cain.

¹⁹ Yaa kopadiciamo n kodi ki padiyanga yeni baa ŋmani ka. O baa ŋmani ka u Kadikaanu Gbandieli logagidiko yeni yaa niinni.

²⁰ Yua n sii laa nandi kuli, yaala n bia baa le o. Ki padiyanga soama yaa yadi o kopadiciamo liadili po, yin ŋuudi man yadi o liadili po naani yeni u kaangagidiŋamu nni.

²¹ Yin ŋaani ti nandi yaa tiagu nni yeni, li yaa tie ban maa yaa tiagu leni ku yoagu, yin mudi laa tiagu. Ku tiagu yaa tie kumoandi mo, yin duuni bonŋanla, ki ŋuudi, ki candi bonŋanla leni mi ñima.

²² Bi kopadicianba niba siiga, a bonjala bebe n baa ŋmani laa nandi, kelima li tie yaa bonla n gagidi ki ŋani cain.

²³ Ama i candanbaani pada yaa yandi wani, ban gedini yaadi yaa soama u Kadikaanu Gbandieli tugu nni, ki mia ti tuonbiadi sugili u kaangagidiŋamu nni, oba kuli kan ŋmani ti. Bi baa juu ki buoni tikuli cain.