Levi 5 - U TIENU MAAMA TILI 2013

¹ Nilo yaa tieni siedi, ke nitoa gbadi bi ki laa, ki yie kaa togidi wan gbadi bi wan laa yaala, o tieni ti tuonbiadi, ki pia i tagili.

² Nilo yaa didi sii yaa bonla n joagini kaa faami, nani yankpienga, ki yaa tie denyanga bi fuayanga ki joagini, bi li yaa tie yaa bonbalinkaali n joagini, ba o yàá faami, o baa yaa joagini, ki yaa ye leni i tagili.

³ O nilo yaa sii yua n joagini yaa joagindi n puodi, kaa faami, ki nan ti yuandi ki bandi, o pia i tagili lienni.

⁴ Nilo yaa maadi tontoni kaa kpaagi, ki poli ke o baa tieni bonla, li yaa ŋani bi li yaa bia, o yaa tieni la kaa faami, ama ki ti yuandi ki bandi, o pia i tagili lienni.

⁵ Yaa nilo n baa i tagili kelima o tieni laa bonla, wan tuo o tuonbiadi, ki doagidi ki waani ti.

⁶ Li yaa puoli, o baa cuani o tudima yeni candanbaani po pesalo bi ŋuasalo, o kopadiciamo n padi ki mia o po o Diedo sugili.

A luoda padili

⁷ Nilo yaa luo ki kan fidi ki baa pesalo bi ŋuasalo, wan cuani kpaajefanmulie bi kpaajenawuundilie o tudima padili po, ki padi o Diedo po. Yendo baa yaa tie i candanbaani padili, yendo mo baa yaa tie padijuukaali.

⁸ O baa cua ki teni ba o kopadiciamo. Wani o kopadiciamo baa kpa kodi yua n tie i candanbaani padili po yene. O baa kodi o leni o nubiñiagu, ama ki da jia ki jendi o yuli.

⁹ O baa mii mi soama waamu li padibinbinli kunu, ki wuli yaama n sieni li padibinbinli tiipo. Li tie i candanbaani padile. Li yaa puoli,

¹⁰ o baa padi yaa kpaajiega n sieni, kan tua padijuukaali ki ŋoadi nani lan bili a padijuukaana po maama. Lanwani, o kopadiciamo baa padi o nilo yeni po, ki mia o po sugili. Yeni, o baa baa sugili.

¹¹ Nilo yaa luo kaa fidi ki baa baa kpaajefanmulie, bi kpaajenawuundilie yeni, wan cuani mi yoma kilo bonbitaa ki teni o candandi padili po, kelima li tie tuonbiadi sugili miabu yaa padili.

¹² O baa cuani mi yoma yeni ki teni o kopadiciamo. O kopadiciamo baa yidi nukuli mi tiadima po, ki taani leni yaala n baa juu kuli, ki juu li padibinbinli po. Li tie i candanbaani padile.

¹³ O kopadiciamo baa padi o nilo yeni po, ki mia o po sugili. O baa baa o tuonbiadi sugili mo. O kopadiciamo baa tieni laa padili, nani lan tiendi maama mi jiema padili po yeni.»

Mi tudima candanbaani padili

¹⁴ O Diedo go den maadi leni Musa ki yedi o:

¹⁵ «Nilo yaa miidi kuali, ki tudi yaala n gagidi o Diedo po tudibiadima kaa faami, o baa cuani yaa petonli n ki pia poadi, ki padi o Diedo po, lan tua mi tudima candanbaani padili. O baa cuo li o yanloli nni, ki bandi li dunga n baa pundi maama nani u kaangagidiŋamu yaa kujapiena yeni.

¹⁶ O baa pugini ki dunga yeni po, kujapienamuu siiga kuli kujapienyenli, kelima wan biidi yaala u kaangagidiŋamu yeni po. O baa teni likuli o kopadiciamo. Lanwani, o kopadiciamo yaa padi li petonli yeni, o baa mia o po sugili. Yeni, o baa baa sugili.

¹⁷ O nilo yeni yaa tieni tuonbiadi, ki miidi o Diedo bali maama maamiba, o yaa tieni yaala n kua, ba o yàá faami, o pia i tagili. O baa gaa o tagili panpaani.

¹⁸ O baa cuani o tagili po yaa petonli n ki pia poadi, ki teni o kopadiciamo. O baa cuo li o yanloli nni, ke li ŋua nani ban bili li dunga maama. O kopadiciamo baa padi o nilo yeni po, ki mia sugili wan tieni yaa tudima kaa faami yeni po. Lani, o baa baa sugili.

¹⁹ Li tie mi tudima candanbaani padile, kelima o tudi o Diedo po moamoani lige.»

²⁰ O Diedo den yedi Musa:

²¹ «Nilo yaa tieni yaa tuonbiadi n ye ne, o tudi boncianla mini o Diedo po. O yaa pua mi faama ban piani o yaala po, wan suni yaala po, wan tieni i janbi ki baa yaala po,

²² lani yaa ka o yaa piidi bonla ki nia ke waa laa, bi o yaa poli mi faama po.

²³ O yaa tieni laa bonla kuli siiga bonliba, o tieni ti tuonbiadi ki kua i tagili nni. O baa guani ki teni wan suni, wan fie, wan piidi, ban piani o yaala, bi wan poli li tuofaapoli yaala yaa po yeni.

²⁴ O baa guani la, ki go maani lipo, laa bonla dunga n pundi maama kujapienamuu siiga kuli kujapienyenli. O yaa bandi o tagili yaa daali yeni, o baa guani ki teni o bondaano.

²⁵ Wan tieni yaa tagili o Diedo po yeni, o baa cua ki teni o kopadiciamo yaa petonli n ki pia poadi. O baa cuo li o yanloli nni, ke li ŋua nani ban bili maama mi tudima candanbaani padili po. O baa cuani li, lin tua padili o tagili po.

²⁶ O kopadiciamo baa padi laa nilo po, ki mia sugili o Diedo nintuali. Ba wan tieni yaa tagili kuli, o baa baa o tuonbiadi sugili.»