Levi 4 - U TIENU MAAMA TILI 2013

I candanbaani pada

¹ O Diedo den yedi Musa: «Waani Isidayeli yaaba yaa maama n tie ne:

² O nilo yaa tieni tuonbiadi ki miidi o Diedo bali maama maamiba kaa faami, bi o yaa tieni yaa bonla n kua, yin baa tieni maama nne:

³ Li yaa tie ban den wuli ki gagidi yaa kopadiciamo a pada tuonli po n tieni ti tuonbiadi kaa faami, ki cedi ke bi niba kuli baa i tagili, kelima o tudima yeni po. O baa baa yaa naatonli n ki pia poadi, ki padi o Diedo po, lan tua i candanbaani padili.

⁴ O baa cuani li naatonli yeni u kaangagidiŋanmoanu nintuali, u Kadikaanu Gbandieli buliñoatuogili kani. O baa maani o nuu li naatonli yeni yuli po, ki kodi li lankani, o Diedo nintuali.

⁵ O kopadiciamo, ban den gagidi yua a pada tuonli po yeni baa taa li naatonli yeni soama, ki kuani u Kadikaanu Gbandieli nni.

⁶ O Diedo nintuali, o baa tuuni o nubili mi soama nni, ki mii taalimilele u kaangagidiŋanmoanu kpalidoaginkaabu po.

⁷ O Diedo nintuali, o baa duuni mi soama ban juugi tulale yaa padibinbinli yina, lini yaali n se u kaangagidiŋanmoanu nni. O baa taa yaa soama n sieni, ki wuli a padijuukaana binbinli yaali n se u Kadikaanu Gbandieli buliñoabu kani yeni tiipo.

⁸ O baa ñani i candanbaani padili yaa naatonli yeni kpama kuli, lani n tie: yaa kpakaagu n ŋuagi ti nuadi kuli,

⁹ a cayaanlieda, a kpama, yaa kpama n ye a loga nni, mi pualanma, wan baa taani ki tabidi ki ñani yaama leni a cayaana.

¹⁰ O kopadiciamo baa ñani laa bonla kuli, nani ban tiendi maama mi taanyenma padili yaa naatonli po. O baa juu likuli li padijuukaali padibinbinli po.

¹¹ Yaala n sieni, lani n tie ku gbangu, ti nandi, li yuli, a biana, tugu nni yaala leni yaala n ye lienni kuli,

¹² o baa ñani likuli li nagili niini ki bili ban gagidi ki lu ti baadi naankani. O baa maani likuli, yaa daadi n maa ban lu ti baadi leni mi fantanpienma yaa tinbengu po, ki juu ki buoni likuli. Lankane ke likuli baa juu ki buodi.

Isidayeli yaaba taataanpadili

¹³ Li yaa tie ke Isidayeli yaaba nitaanli kuli n tieni ti tuonbiadi kaa faami, bi ki tieni yaala n kua, ki miidi o Diedo bali maama, ba ke baa bani, bi kua i tagili nni.

¹⁴ Ban tieni yaa tuonbiadi yeni yaa doagidi, bi baa cuani naatonli ki padi i candanbaani padili. Bi baa cuani li u Kadikaanu Gbandieli buliñoabu kani.

¹⁵ U Tienu nintuali, Isidayeli yaaba nikpela baa maani bi nii li naatonli yuli po, bi siiga yendo n kodi li.

¹⁶ O kopadiciamo, ban den gagidi yua a pada tuonli po yeni, baa taa li naatonli yeni soama ki kuani u Kadikaanu Gbandieli nni.

¹⁷ O Diedo nintuali, o baa tuu o nubili mi soama, ki mii taalimilele u kaangagidiŋanmoanu kpalidoaginkaabu po.

¹⁸ O Diedo nintuali, o baa duuni mi soama yaa padibinbinli n se u Kadikaanu Gbandieli nni yeni yina po. O baa taa yaa soama n sieni ki wuli ma a padijuukaana binbinli yaali n se u Kadikaanu Gbandieli buliñoabu kani yeni tiipo.

¹⁹ O baa ñani li naatonli yeni kpama kuli, ki juu ma li padibinbinli po.

²⁰ O baa tieni laa naatonli moko nani ban tiendi i candanbaani padili yaa naatonli maama. O baa tieni lini moko yene. O kopadiciamo baa padi li nitaanli po, ki mia li po sugili yene. Li baa baa sugili mo.

²¹ Yaala n sieni li naatonli yeni nni, o baa ñani likuli li nagili niini, ki juu nani wan den tieni li naatonkpiali maama. Li tie li nitaanli kuli candanbaani padile.

O yudaano padili

²² Li yaa tie ke yudaano n tieni tuonbiadi kaa faami, bi ki tieni yaala n kua, ki miidi o Diedo o Tienu bali maama, o kua i tagili nni.

²³ O yaa ti bandi wan tieni yaa tuonbiadi yeni, o baa cuani yaa ŋuabuali n ki pia poadi, ki padi i candanbaani padili.

²⁴ O Diedo nintuali, o baa maani o nuu li ŋuabuali yeni yuli po, ki kodi li, ban kodi a padijuukaana yaa yandi naankani. Li tie i candanbaani padili.

²⁵ O kopadiciamo baa tuu o nubili ki padiyanga yeni soama, ki duuni ma a padijuukaana binbinli yina po. Li yaa puoli, o baa wuli yaa soama n sieni li padibinbinli yeni tiipo.

²⁶ O baa juu mi kpama kuli li padibinbinli po, nani ban tiendi maama mi taanyenma pada po. O baa padi o yudaano yeni po, ki mia o po sugili yene. Yeni, o baa baa sugili.

Taliga padili

²⁷ Li yaa tie ke taliga n tieni tuonbiadi kaa faami, bi ki tieni yaala n kua, ki miidi o Diedo bali maama, o kua i tagili nni.

²⁸ O yaa ti bandi wan tieni yaa tuonbiadi yeni, o baa cuani yaa ŋuasalo n ki pia poadi, ki padi i candanbaani padili.

²⁹ O baa maani o nuu o ŋuasalo yeni yuli po, ki kodi o ban kodi a padijuukaana yaa yandi naankani.

³⁰ O kopadiciamo baa tuu o nubili ki padiyanga yeni soama, ki duuni ma a padijuukaana binbinli yina po. Li yaa puoli, o baa wuli yaa soama n sieni li padibinbinli yeni tiipo.

³¹ O kopadiciamo baa ñani mi kpama kuli, nani ban tiendi mi taanyenma padiyanga maama yeni, ki juu ma li padibinbinli po, lan tua o Diedo po nuulumanu. O baa padi o nilo yeni po, ki mia o po sugili yene. Yeni, o baa baa sugili.

³² Li yaa tie ke o nilo yeni baa cuani o candandi po pia, o baa cuani pesalo, yua n ki pia poadi.

³³ O baa maani o nuu o pesalo yeni yuli po, ki kodi o ban kodi a padijuukaana yaa yandi naankani.

³⁴ O kopadiciamo baa tuu o nubili ki padiyanga yeni soama, ki duuni ma a padijuukaana padibinbinli yina po. Li yaa puoli, o baa wuli yaa soama n sieni li padibinbinli yeni tiipo.

³⁵ O kopadiciamo baa ñani mi kpama kuli, nani ban tiendi mi taanyenma padipia maama yeni, ki taani leni yaala n baa juu kuli, ki juu li padibinbinli po, ki taani leni u mu n buoni yaala o Diedo po. O baa padi o nilo yeni po, ki mia o po sugili yene. Yeni, o baa baa sugili.