Levi 3 - U TIENU MAAMA TILI 2013

Mi taanyenma padili

¹ Nilo yaa bua ki padi mi yanduanma padili, o yaa baa padi nua, li yaa tie naatonli bi naasalo, o baa cuani yua n ki pia poadi, ki padi o Diedo po.

² O baa maani o nuu ki padiyanga yuli po, ki kodi ka u Kadikaanu Gbandieli buliñoatuogili kani. Alono bijaba bi kopadicianba mo, baa mii mii mi soama li padibinbinli kaani kuli.

³ Mi taanyenma padili yeni niinni, o baa taa yaala n tie ne ki cuani, lan tua padijuukaali o Diedo po: Yaa kpakaagu n ŋuagi ti nuadi leni yaa kpama n taabi ti kuli,

⁴ a cayaanlieda, a kpama, yaa kpama n ye a loga nni leni mi pualanma, wan baa taani ki tabidi ki ñani yaama leni a cayaana.

⁵ Alono bijaba baa juu lani li padibinbinli po. O baa maani la, yaa padijuukaali n maa yaa daadi n co yeni tanpoli, likuli n buodi. Li tie u mu n buoni yaa padili, ke li nuulu mani o Diedo po.

⁶ O yaa baa padi yanbiga mi taanyenma padili, ki yanga yeni yaa tie bontonga bi bonsiaga, o baa taa yua n ki pia poadi.

⁷ O yaa baa padi pia, o baa cuani o u kaangagidiŋanmoanu kani.

⁸ O baa maani o nuu ki padiyanga yeni yuli po, ki kodi ka u Kadikaanu Gbandieli buliñoatuogili kani. Alono bijaba baa mii mii mi soama li padibinbinli kaani kuli.

⁹ Laa taanyenma padili yaa niinni, o baa taa yaa nankpama n tie ne, ki cuani lan tua padijuukaali o Diedo po: li juoli ban baa jia yaali hali ku kpiegu kani, li kpama, yaa kpakaagu n ŋuagi ti nuadi,

¹⁰ a cayaanlieda leni a kpama, yaa kpama n ye a loga nni leni mi pualanma, wan baa taani ki tabidi ki ñani yaama leni a cayaana.

¹¹ O kopadiciamo baa juu lane li padibinbinli po. Li tie u mu n buoni yaa padijiema o Diedo po.

¹² Li yaa tie ŋuabo, o baa cuani o u kaangagidiŋanmoanu kani.

¹³ O baa maani o nuu ki padiyanga yeni yuli po, ki kodi ka u Kadikaanu Gbandieli buliñoatuogili kani. Alono bijaba baa wuli o soama li padibinbinli kaani kuli.

¹⁴ Laa padili nni, o baa taa yaala n tie ne, ki cuani lan tua padijuukaali o Diedo po: yaa kpakaagu n ŋuagi ti nuadi kuli,

¹⁵ a cayaanlieda, a kpama, yaa kpama n ye a loga nni, mi pualanma, wan baa taani ki tabidi ki ñani yaama leni a cayaana.

¹⁶ O kopadiciamo baa juu lani li padibinbinli po. Likuli tie u mu n buoni yaa padijiema, ke mi nuulu mani o Diedo po. Mi nankpama kuli tie o Diedo n die yaala.

¹⁷ Li tie yaa bali maama n kan miidi yinba leni yi puoliŋuani po, hali yaa yogu n tuu yaa yogu. Yin ban ye naankani kuli, yin da ŋmani nankpama bi soama.»