Levi 26 - U TIENU MAAMA TILI 2013

¹ Yin da tagi yi yula po tienfaama, yin da kpiedi ki sieni buloba kuli nannanli, bi butanli. Yin da kpie tanli ki nandi nannanliba yi diema nni, ki gbaani ki baa pugi la kelima mini n tie Li Miali Diedo yi Tienu.

² Yin yaa kubi n fuodima dana, ki yaa fangi n kaangagidiŋamu. N tie Li Miali Diedo.

U Tienu seli

³ Yi yaa ŋua n mabilikaama, ki kubi n bali maama ki tiendi li kuli bonŋanla,

⁴ n baa tuuni yi po ki taaga ki yogunu, ki tinga baa luoni ki bonluonkaala, i kuani tiidi mo n yaa luoni i bonluonkaala.

⁵ Hali yi baa lendi yi kpaandi ki gbeni yeni, li baa sua ke duven tiidi ciema yogunu pundi. Hali yi baa cie ki gbeni duventiidi bonluonkaala yeni, li baa sua ke ti jaadi yogunu pundi. Yi baa di yi jiema ki guodi, ki yaa ye leni mi yanduanma yi diema nni.

⁶ Mini o Diedo n baa teni mi yanduanma n yaa ye mi diema nni. Yi yaa goa, oba kuli kan yagi yi yama. N baa teni ti fuayanbiaditi n bodi mi diema nni kuli. Ki jugisiega mo kan go poandi yi diema nni.

⁷ Yi baa deli yi yibalinba, yi jugisiemu baa je ba.

⁸ Yi siiga nni, nibimuu baa deli niba kobiga, niba kobiga mo n deli niba tuda piiga (10 000). Ki jugisiega n baa bolini yi yibalinba yi nintuali.

⁹ N baa pegidi ki nuali yi po, ki teni yin yaa maa ki pugidi boncianla, ki go yaa kubi min den kuani yaa ŋantaado leni yi.

¹⁰ Yi baa yaa di li bonkpelila, yi baa ñani li bonkpelila, ki lingi li bonpanla po u bilikaanu.

¹¹ N baa tii n diegu yi siiga, n yama kan ña yi niinni mo.

¹² N baa yaa cuoni leni yi, n baa yaa tie yi Tienu, yimo baa yaa tie n niba.

¹³ N tie Li Miali Diedo yi Tienu yua n den ñani yi Ejipiti diema nni, ke yin da go tie yonbi. N den kua kua ban den loli yi leni yaa kpaadi, yaadi n den naani leni i naakpakpaadi daagu yeni. N den teni ke yi yaani yi yula ki cuoni.

Ti solindi

¹⁴ Ama, yi yàá cengi, ki naa tiendi n bali maama ne kuli bonŋanla,

¹⁵ yi yaa ŋaa n mabilikaama leni n ñoamabonbilikaana, ki naa ŋoadi n bali maama, ki miidi n ŋantaado,

¹⁶ diidi min baa tieni yi yaala: N baa teni ti yanyagidi, ku dondongu leni ti ñinwadi n cuo yi, laa yiani baa tadigi yi nuni, ki je yi miana. Yi baa ko fanma fanma, kelima yi yibalinba baa je yi bonbaakaala.

¹⁷ N baa buli yi n nunga, ki sedi yi po. Yi yibalinba baa deli ki paadi yi. Yaa niba n nani yi yeni baa die yi, yi baa sani, ba ke oba kuli naa deli yi.

¹⁸ Lani kuli yaa tieni, ke yi baa ki yie kaa cengi n maama, n baa faligi yi taalimilele yi tuonbiadi po.

¹⁹ N baa pua ki mudi yi fidu japaadi kuli. N baa teni tanpoli n tua yi po nani ti kudi, ki tinga mo baa tua nani ti kumoandi.

²⁰ Yi baa tuuni ki biandi yi fidu fanma fanma. Yi tinga kan luoni yi po ki bonluonkaala, ki tinga tiidi mo kan go luoni yi po bonluonkaala.

²¹ Yi yaa go yie kaa cengi n maama, n baa pua yi taalimilele, nani yi tuonbiadi n tie maama.

²² N baa soani ti fuayandi yi kani, tin fii yi po ki kpa yi bila, ki go bolini yi yandi. Yi niba baa wadi. Yi sani nni mo kan go yaa pia niba.

²³ Ba leni lani kuli, yi yàá cedi ke n tundi yi, ki baa ki yiedi nni,

²⁴ mini moko baa yie yi, ki pua yi taalimilele goga yi tuonbiadi po.

²⁵ N baa teni yaa jugisiega n baa tuu li panli n cua ki tuu yi panpaani n ŋantaado miidima po. Yi yaa taani ki kua yi dociamu nni, n baa soani u yianbiadipuodiko yi siiga, ki go taa yi ki teni yi yibalinba.

²⁶ N baa muni yi mi jiema hali yaala ke puoba piiga baa pua bi dupen dupenpuakaanyendu. Bi baa cabidi cabidi ki boagidi, hali yaala ke yi baa je ki kan go guo.

²⁷ Ba leni lani kuli, yi yàá cengi n maama ki go baa ki yiedi n po,

²⁸ n baa sedi yi po leni li pabienli, ki pua ki faligi yi taalimilele goga yi tuonbiadi po.

²⁹ Yi baa ŋmani yi bijaba leni yi bisiaba nandi.

³⁰ N baa bolini yi buli yii n ye a juana po, ki go bolini yin den fiini ki sieni yaa nannana u yienu jaandi po. N baa teni yi buli tinkpiba n dogini ki taani leni yi bucaba caba yeni. N baa nani yi hali boncianla.

³¹ N go baa bolini yi dogi, yin tua diegbendi. N baa bolini yin padi yi buli naankani yeni. N kan go tuo ki gaa yi tulale pada nuulumanu.

³² Mini n ba, n go baa bolini mi diema, yi yibalinba yaaba n baa cua ki kali mi niinni mo, li pakili n cuo ba.

³³ N baa yadi yikuli ŋanduna nibuoli siiga, ki noadi n jugisiega ki ŋoadi yi puoli. Yi diema yeni baa ye leni li paboanli, yi dogi mo kuli kan go yaa pia niba.

³⁴ Lanyogunu, mi diema baa yaa pia mi fuodima bina. Mi diema yeni n ye leni li paboanli yaa yogunu, ke yimo yadi ki ye yi yibalinba diema nni yaa yogunu banlu yeni, mi diema baa fuo laa bina banlu. Mi baa baa mi fuodima bina.

³⁵ Yaa yogunu ke mi diema ye leni li paboanli yeni, mi baa baa ki fuodi man kaa den baa yaa fuodima bina, yin den ye mi niinni yaa yogunu.

³⁶ N baa teni ti jawaanciandi n cuo yaa niba n sieni yi buolu nni yeni. Ba ku faaligu n figi ki tieni yaa fuugu baa deli ba. Bi baa sani nani bi deli ba leni mu jugisiemu, ki yaa baali ke oba kuli naa deli ba.

³⁷ Bi niba yeni baa tuudi ki baali biyaba po, ki bua ki sani ki cia, nani ki jugisiega n deli ba yeni, ke oba kuli naa deli ba. Yi kan fidi ki sedi yi yibalinba nintuali.

³⁸ Yi baa bodi i nibuoli siiga. Yi yibalinba yeni diema mo n baa je yi.

³⁹ Yi siiga yaa niba n sieni ki ye yi yibalinba diema nni yeni, bi jigi baa cie, ban dondi boncianla, kelima bi tagili po. Bi jigi baa cie, ban dondi boncianla kelima bi baanba tagili po.

U Tienu baa tiadi o ŋantaado po

⁴⁰ Lanyogunu, bi baa tuo bi tagili leni bi baanba mo yaa tagili, ki go tuo ban den miidi n bali maama, ki yiedi nni maama.

⁴¹ Mini moko baa yie bi po, ki kuani ba bi yibalinba diema nni. Lanwani leni bi pajoagima kuli, bi baa miini bi yula ki pa bi tagili panpaani kuli.

⁴² N go baa tiadi ki kubi min den kuani yaa ŋantaado leni Jakob. N baa tiadi ki kubi min den kuani yaa ŋantaado leni Isaaka leni Abalahama kuli. N baa tiadi n diema yeni po.

⁴³ Bi baa ŋaa mi diema, man yaa pia mi fuodima bina, ba ke mi foagi leni ba. Bi baa pa bi tagili panpaani, kelima bi ŋaa n ñoamabonbilikaana, ki nani n mabilikaama mo.

⁴⁴ Ama ba bi yaa ban ye bi yibalinba diema nni, n kan yie ba cain. N kan yaa nani ba hali ki bolini ba, ki ŋaa min den kuani leni ba yaa ŋantaado. N tie Li Miali Diedo bi Tienu.

⁴⁵ N baa tiadi min den kpa kuani yaa ŋantaado leni bi yaajanba, yua yaa po ke n den ñani ba Ejipiti diema nni, i nibuoli nintuali. Li yaa po, n baa yaa tie bi Tienu. N tie Li Miali Diedo.»

⁴⁶ Lani n tie o Diedo n den bili yaa mabilikaama, yaa ñoamabonbilikaana leni yaa bali maama kuli. O den maadi leni Musa Sinayi juali po, ki bili laa maama wani o Diedo leni Isidayeli yaaba siiga.