Levi 25 - U TIENU MAAMA TILI 2013

Ki tinga fuodima binli

¹ O Diedo den maadi leni Musa Sinayi juali po ki yedi:

² «Yedi Isidayeli yaaba: Yi yaa kua ki kali min baa pa yi yaa diema nni, ki tinga baa baadi mi fuodima. Li baa yaa tie fuodima o Diedo kpiagidi po.

³ Binaluoba yi baa ko yi kuani, yi baa cuadi yi duventiidi beni ke yi luoni, yi baa taagi yi kuani kuli bonluonkaala.

⁴ Ama li binleleeli baa yaa tie ki tinga fuodima binli. Li baa yaa tie fuodima o Diedo kpiagidi po. Laa binli, yi kan coagi yi kuani, yi kan cuadi yi duventiidi beni mo.

⁵ Yi kan yendi yaa ŋalikama n baa ki pudi o yuli po. Yi kan cie yaa duven tiidi n ki den cuadi n loni yaa bonluonkaala. Li baa yaa tie ki tinga po mi fuodima binli.

⁶ Ki tinga n loni yaala mi fuodima binli yeni baa yaa tie mi jiema yinba leni yi niba, yi yonbi leni yi puotuada, yi tuonsoanba leni yaa canba n kaa yi siiga kuli po.

⁷ Laa bonla kuli go baa yaa tie mi jiema yi yandi leni yaa fuayandi n ye yi diema nni po.

Mi faabima binli

⁸ A baa coadi mi fuodima bina, binalele hali taalimilele. Laa fuodima binleleeli yeni, baa taani ki yaa tie piinaa n binayia.

⁹ Cilele dapiiga, yi baa teni ban piebi li naatuntunli, ti tuonbiadi sugili miabu dacianli yeni po. Yi baa piebi li naatuntunli yi diema nni kuli.

¹⁰ Yi baa gagidi i binpiimuudi binli yeni, ki kpaani ki waani mi faabima maama mi diema nni, yaaba n den ye ti yonbidi kuli nni po. Li baa tua yi po faabima binli. Nilo kuli baa guani ki kuni o tinga po, ki ban taani leni o buolu.

¹¹ I binpiimuudi baa yaa tie yi po faabima binli. Yi kan ko, yi kan yendi ki bili a ŋalikamaliana. Yi kan cie yaa duven tiidi n ki den cuadi n loni yaa bonluonkaal,

¹² kelima li baa yaa tie mi faabima binli, ki tie yi po yaa bonla n gagidi ki ŋani. Yi baa di yaala n pudi yi kuani nni yaa bonluonkaala laa binli.

¹³ Mi faabima binli yeni niinni, nilo kuli baa guani wan die yaa tinga nni.

¹⁴ O nilo yaa kuadi o lielo po bi o yaa daa o kani bonliba, oba kuli n da janbi o lielo.

¹⁵ A yaa baa daa u kuanu a lielo kani, a baa coadi hali mi faabima binli n pendi, lan pundi yaa bina banlu, omo n kuadi a po, ki coadi ŋan baa ko, ki pedi yaa bina banlu.

¹⁶ Yaa bina n sieni yaa yabi, a baa pugini ki dunga. A bina yàá yabi, a baa wadi ki dunga, kelima o baa kuadi a po ki ŋoadi wan koni ki pedi yaa bina banlu.

¹⁷ Oba kuli n da janbi oyua. Ŋan fangi a Tienu, kelima n tie Li Miali Diedo a Tienu.

¹⁸ Yin yaa tiendi mani n mabilikaama bonŋanla, ki yaa kubi n ñoamabonbilikaana, lani yi baa ye leni mi yanduanma mi diema nni.

¹⁹ Ki tinga baa luoni ki bonluonkaala, yikuli baa di ki guodi, ki yaa ye leni mi yanduanma.

²⁰ Yi yaa yedi: ‹Ti baa je be li binleleeli, kelima ti kan ko, ti kan yendi yaala n pudi li baa yaa bonluonkaala?›

²¹ N baa wuli yi po n seli li binluobili, ki tinga baa luoni yaala n baa dagidi binataa yaa jiema po.

²² Li binniili, yi baa ko ki go di li bonkpelila, hali li binyiali. Yi baa di li bonkpelila hali li bonpanla n baa n be.

Mu tinmu daama bali maama

²³ Mi diema tinga kan kuadi cain cain, kelima mini n die mi diema, yimo cua ki kali n diema nni, nani bi canba leni bi nilanba yeni.

²⁴ Yin baa die yaa diema kuli yaa niinni, yi baa bili li bali maama mu tinmu goadaama po.

²⁵ A kpiilo yaa luo cain, hali yaala ke li pundi ke o kuadi o tinga boagidima, o danba siiga, yua n pia mi goadaama bali, baa cua ki guani ki daa o nilo n kuadi yaala.

²⁶ O nilo yeni yàá pia o nilo, yua n pia mi goadaama bali, ama ke o ti yuandi ki baa yaala n dagidi ki guani ki daa o tinga,

²⁷ o baa coadi ban den daa ki koni yaa bina yeni, ki guani ki pa yua n den daa yeni yaa ligi n dagidi leni wan den pani ki maani yaala, hali mi faabima cuama.

²⁸ O nilo yeni yàá fidi ki guani ki daa o tinga o yuli po, yua n daa yeni, baa kubi ki tinga yeni, hali mi faabima binli. Mi faabima binli yaa cua, o nilo yeni baa guani ki kua o tinga nni, yua n den daa ka yeni mo n ña.

²⁹ O nilo yaa kuadi yaa dieli n se yaa dociamu n pia u bilinu niinni, o pia li bali ki guani ki daa li binyenli banlu po bebe. Mi goadaama bali sedi binyenli po bebe.

³⁰ Ama yaa dieli n se yaa dociamu n pia u bilinu niinni yeni, bi yàá goa ki daa li dieli, ki cedi hali ke li binli pendi, yua n den daa li dieli yeni baa die li hali yaa yogunu kuli, hali o puoliŋuani po. Mi faabima binli, yua n den kpa die li kan go gaa li.

³¹ Ama yaa diena n ye a dobila nni, ya n ki pia bilini yeni, a diena yeni baa yaa tie yenma leni u kuanu tinga daama. Yaaba n kuadi fidi ki guani ki daa, mi faabima binli yua n den daa yeni baa ña lienni.

³² Levi buolu dogi leni bi diena maama yaa po, Levi buolu n pia mi goadaama yaa bali hali yaa yogunu kuli.

³³ Ba li yaa tie Levi buolu nilo n guani ki daa li dieli yeni Levi yua kani, mi faabima binli, o baa ña wan daa yaa dieli nni, ki go ña o dogu nni, kelima Levi yaaba dogi leni bi diena yeni n tie bi biinu Isidayeli yaaba siiga.

³⁴ Yaa tinmu n ye Levi yaaba dogi lindima, kan tuo ki kuadi. Levi yaaba bebe n baa yaa die mu hali yaa yogunu kuli.

A luoda panli dinma

³⁵ A kpiilo yaa tua luodo, ki kuu leni a, ki naa pia yaala n baa kubi o, ŋan kubi o, wan yaa ye leni a, ba o yaa tie caano bi nilamo.

³⁶ Ŋan da lingi o kani ñuadi, ama ŋan yaa jie a Tienu ki cedi a kpiilo n yaa ye leni a.

³⁷ Ŋan da ledi o ligi ki lingi o kani ñuadi. Ŋan da ledi o jiema mo, ki go lingi o kani ñuadi.

³⁸ N tie Li Miali Diedo yi Tienu yua n den ñani yi Ejipiti diema nni, ki puni yi Kanana diema, kelima n bua tua yi Tienu.

Bi niba daafaabima sanbili

³⁹ A kpiilo yaa tua luodo ki kuu leni a, ki nan kuadi o yuli a po, ŋan daa o leni a ligi, ŋan da puogi o yonbituonli ki yaa nua o nani o yonbo yeni.

⁴⁰ O baa ye a kani nani o tuonsoanlo, bi nani o caano yeni. O baa tuuni a po hali mi faabima binli.

⁴¹ Lanyogunu, o baa ña a diegu nni, wani leni o bila kuli ki guani o buolu nni, ki guani ki kuni o baanba tinmu po.

⁴² Bi tie n yaa naacenba, min den ñani yaa niba Ejipiti diema nni. Bi kan kuadi ba nani ban kuadi i yonbi maama.

⁴³ Ŋan da diedi o leni u paalu, ŋan yaa fangi a Tienu.

⁴⁴ Yi baa baa yi yonbi leni yi puotuada yaa nibuoli n lindi yi yaa kani. Yi baa daa yi yonbi leni yi puotuada bi yaa kani.

⁴⁵ Yi go baa fidi ki daa yaa nilanba n kaa yi diema nni yeni yaa bila, bi buolu siiga ban mali yaa bila yi diema nni yeni. Yi baa fidi ki diedi bani, ban tua yi piama.

⁴⁶ Yi baa fidi ki ŋaa laa yonbi ban tua faali yi bila po, nani ŋalimani yeni. Yi baa fidi ki kubi ba ban yaa tie yi yonbi yaa yogunu kuli. Ama yi kpiiba Isidayeli yaaba wani, oba kuli kan diedi o kpiilo leni u paalu.

⁴⁷ Li yaa tie ke yaa nilamo n kaa yi siiga tua piado, ke a kpiilo Isidayeli nni yua tua luodo, ke a kpiilo kuadi o yuli o nilamo po, bi o caano po, bi o nilamo yeni buolu yua po,

⁴⁸ wani yua n kuadi o yuli yeni pia mi goadaama bali. O kpiiba siiga yendo baa fidi ki guani ki daa o ki faabi o.

⁴⁹ O baa kpelo bi o waalo, bi o baa kpelo bi o waalo bijua, bi wani leni yua n kpi bonŋanla siiga baa fidi ki guani ki daa ki faabi o. Lani yaa ka, o nilo yeni yaa yuandi ki baa yaala n dagidi, o baa fidi ki guani ki daa ki faabi o yuli.

⁵⁰ Wani leni yua n den daa o yeni baa coadi a bina, ki cili wan den daa o yaa binli, ki ban pundi hali mi faabima binli. Wan baa pa yaa dunga baa ŋua a bina n da maama. Bi baa coadi nani o tuonsoanlo yaa tuonli bina n da maama.

⁵¹ Yaa bina n sieni yàá go yabi, o baa pa yaa dunga n dagidi leni a bina yeni, ban den daa o yaa bina yaa po.

⁵² Li yaa sieni bina waamu mi faabima binli n pundi, bi baa coadi ki guani ki pa yaa dunga n dagidi laa bina banlu po.

⁵³ O baa yaa tie nani ban taa yaa tuonsoanlo binmunli tuona po, o canbaa n kan diedi yua leni u paalu a nunbu nni.

⁵⁴ Bi yàá fidi ki guani ki daa ki faabi o, o baa faabi mi faabima binli, wani leni o bila kuli.

N tie Li Miali Diedo yi Tienu

⁵⁵ Isidayeli yaaba tie mini o Diedo yaa naacenba, min den ñani yaaba Ejipiti diema nni. N tie Li Miali Diedo yi Tienu.