Levi 24 - U TIENU MAAMA TILI 2013

U kaangagidiŋamu fidisantuankaanu

¹ O Diedo den maadi leni Musa, ki yedi:

² «Puogi Isidayeli yaaba ban cuani a po mu fidisanmu po olivie kpama yaama n ŋani hali bonŋanla, mun yaa co yogunu kuli.

³ U fidisantuankaanu yeni se u Kadikaanu Gbandieli tugu nni, bu kpalidoaginkaabu nintuali. Alono baa ŋanbi ki sieni yeni, ke mu fidisanmu yeni baa dua ki co o Diedo kani. Li tie yaa bali maama n kan pendi abada yi puoliŋuani po.

⁴ Alono baa sieni mu fidisanmu yeni yaa fidisantuankaanu n tie wula yeni po, mun yaa co o Diedo kani yaa yogunu kuli.

Ban puuni yaa dupen U Tienu

⁵ Ŋan taa mi yoma ki pua piiga n dupenbilie. Dupen kuli yoma baa yaa tie kilo bonbiluoba.

⁶ Yin taa dupen yeni ki bili kpamilie, bonbiluoba luoba, yaa tabili n tie wulamoano ki se o Diedo nintuali yeni po.

⁷ Yin taa yaa dugibila n ŋani bonŋanla ki sieni dupen kpamu kuli kani, a dugibila yeni baa yaa tie mi tiadima bonla ki maa dupen yeni po, ki juu leni u mu o Diedo nintuali.

⁸ Fuodima daali kuli, bi kopadicianba baa biliti laa dupen o Diedo nintuali yogunu kuli. Li tie Isidayeli yaaba po yaa ŋantaado n kan pendi abada.

⁹ Dupen yeni tie Alono leni o bijaba yaa po. Bi baa ŋmani o yaa kaanu n gagidi ki ŋani niinni, kelima li tie bi po yaa paabu n gagidi ki ŋani hali boncianla, ban juugi o Diedo nintuali yaa paabuoli siiga yenbu. Li tie yaa bali maama n kan pendi hali abada.»

Yaa nilo n soli U Tienu buudi

¹⁰ Dayenli, li koanli den tieni li nagili nni, Isidayeli nilo leni Ejipiti nilo, yua yaa naa n tie Isidayeli yua siiga.

¹¹ Ki yiadiga yeni den soli ki go sugi U Tienu yeli. Bi den gedini o Musa kani. O nilo yeni naa den yi Selomiti, ki tie Dan buolu yua, Dibili bisalo.

¹² Bi den luoni o nilo yeni li kpaadidieli nni, ki guudi hali Musa n baa waani ba o Diedo n yedi yaala.

¹³ O Diedo den maadi leni Musa, ki yedi:

¹⁴ «Teni ban ñani yaa nilo n soli n yeli yeni, li nagili niinpo. Yaa niba n den gbadi o maama kuli baa maani bi nii o yuli po. Li yaa puoli, li nitaanli kuli baa lugidi o a tana ki kpa o.

¹⁵ Ŋan go yedi Isidayeli yaaba kuli mine: Yaa nilo n soli o Tienu kuli baa tugi o tuonbiadi panpaani.

¹⁶ Yaa nilo n soli Li Miali Diedo yeli kuli, bi baa kpa o. Li nitaanli niba kuli baa lugidi o a tana ki kpa o. Wan tie caano leni wan tie dotielo kuli, kelima o sugi U Tienu yeli.

¹⁷ Yaa nilo n pua ki kpa o lielo, bi baa kpa omoko.

¹⁸ Yaa nilo n pua ki kpa nitoa yanga, o baa pa li daano o yanga. Li miali n baa pa li miali panli.

¹⁹ O nilo yaa pua ki poagili o lielo, bi baa tieni o nani wan tieni o lielo maama.

²⁰ O yaa kua li kpabili, bi baa kua o yaa kpabili. Bu nunbu n baa pa nunbu panli, li ñinli mo n baa pa ñinli panli. Wan poagili o lielo maama, bi baa poagili omo yeni.

²¹ Yua n pua ki kpa o lielo yanga, baa guani ki pa yantoaga. Ama yua n kpa o nilo, bi baa kpa wani o ba.

²² Yi baa yaa pia bali mayenma o caano leni Isidayeli buolu yua kuli po. N tie Li Miali Diedo yi Tienu.»

²³ Musa den waani Isidayeli yaaba laa maama kuli. Bi den ñani o nilo yeni li nagili nni, ki lugidi o a tana ke o kpe. Isidayeli yaaba den tieni o Diedo n den waani Musa yaa ñoamabonli yeni.