Levi 23 - U TIENU MAAMA TILI 2013

Isidayeli yaaba jaanma dana

¹ O Diedo den maadi leni Musa, ki yedi:

² «Yedi Isidayeli yaaba: Yin baa kpaani ki waani bi niba yaa jaanma dana yeni, baa yaa tie yaa taanli n gagidi ki ŋani. Diidi mani n jaanma dana nne:

a. Mi fuodima daali

³ Nilo kuli baa tuuni o tuonli danaluoba, ama li daleleeli, yi kan tieni puu kuli landaali, kelima li tie mi fuodima daali. Li baa yaa pia taangagidikaali. Yi kan soani tuonliba kuli. Li tie o Diedo fuodima daali, yin kaa naankani kuli po.

⁴ Diidi mani o Diedo jaanma dana leni yaa taana n gagidi ki ŋani, yin baa kpaani ki wangi ya, a yogunu yaa pundi.

b. Mi Pendima jaanma leni yaa dupen n ki pia dabinli jaanma

⁵ Ciyendo piiga n danaali yaa yenjuagu baa yaa tie mi Pendima jaanma o Diedo po.

⁶ Laa ŋmaalo yaa piiga n damuuli, baa yaa tie yaa dupen n ki pia dabinli jaanma o Diedo kpiagidi po. Yi baa ŋmani yaa dupen n ki pia dabinli hali danalele.

⁷ Li dakpiali, yi baa tieni taangagidikaali. Yi kan soani tuonliba kuli.

⁸ Laa daleleeda nni, yi baa padi o Diedo po a padijuukaana. Li daleleeli baa yaa pia taangagidikaali, yi kan soani tuonpaaliba kuli.»

c. Li dibabikpiali yaa jaanma

⁹ O Diedo den maadi leni Musa, ki yedi:

¹⁰ «Yedi Isidayeli yaaba: Yi yaa kua min baa pa yi yaa diema nni yaa yogunu, ke u jetaagu yogunu ban pundi, yi baa taa li dibabikpiali ki cua ki teni o kopadiciamo, yaala n tie yi kuanu yeni yaa bonluonkakpiala.

¹¹ O baa gaa li dibabili yeni, ki tieni yaa bogidili n doagidi ke o teni o Diedo. Lani, o Diedo baa gaa. Li baa yaa tie U Tienu fuodima daali yaa fiifaama, ke o kopadiciamo baa tieni laa bogidili.

¹² Yin tieni yaa bogidili n doagidi ke yi teni o Diedo yaa daali yene, ke yi go baa padi o Diedo po li padijuukaali, yaa pebiga n ki pia poadi.

¹³ Yi go baa pugini yaa paabu n tie ne: yaa yoma n kali leni mi kpama kilo bonbiluoba, man tua yaa paabu n juu leni u mu, ki pia u nuulumanu o Diedo po. Yi go baa cuani duven litidiyendo leni boagidima, li ñincabili po.

¹⁴ Hali ke yi daa cuani yi Tienu po li bonluonkakpiala yaa paabu, yi kan ŋmani dupen, bi disiansagidi, bi ŋalikamapaano. Li tie yaa bali maama n kan pendi abada, yi puoliŋuani po leni yin baa n yaa ye naankani kuli.

d. U jetaagu jaanma

¹⁵ Mi fuodima daali yeni yaa fiifaama, yi baa coadi danalele taalimilele. Li baa cili yin cuani li dibabikpiali ki teni o Diedo yaa daali yeni.

¹⁶ Yi baa coadi dana piimuu, li dapiimuuli baa tua yaa fuodima daali n biini danalele taalimilele yeni yaa fiifaama. Landaali, yi baa pa o Diedo yi ŋalikama yeni yaa bonluonkapanla.

¹⁷ Yi baa ñani yi diena nni dupen bonbilie, ki tieni yaa maalima n waani ke yi teni la o Diedo. Yi baa taa mi yoma kilo bonbitaa, ki taani leni li dabinli, ki pua dupenyendo. Li tie li bonluonkakpiala paabu o Diedo po.

¹⁸ Yi baa cuani pebilalele, yaaba n pia binli binli, ki naa pia poadi. Yi go baa cuani naatonbili leni petonalie, ki taani leni dupen yeni, ki padi lan tua li padijuukaali o Diedo po. Bu paabu leni li ñincaba yaala n naani leni yaa paabu n juu u mu nni, baa yaa pia yaa nuulu n mani o Diedo po.

¹⁹ Yi go baa padi li ŋuabuali, lin tua ti tuonbiadi sugili padili leni pebilalie yaaba n pundi binyenli, ban tua mi taanyenma padili.

²⁰ O kopadiciamo baa tieni yaa bogidi n doagidi ke o teni la o Diedo nintuali. O baa teni o ŋalikamapaano leni a pebilieda yeni, ki gagidi likuli o Diedo po. Li baa yaa tie o kopadiciamo yaa biinu.

²¹ Landaali, yi baa kpaani ki tieni taangagidikaali. Yi kan soani tuonpaaliba kuli. Li tie yaa bali maama n kan pendi abada, yi puoliŋuani kuli po, yin baa n yaa ye naankani kuli.

²² Yi yaa ye yi diema nni ke u jetaagu yogunu pundi, yi yaa taagi yi kpaandi, yin ŋaa poyendu yi kuanu nni, ki da yendi. Yin da yendi yaala n sieni mi liegima po. Yi baa ŋaa lani o luodo leni o caano po, ban liegi. N tie Li Miali Diedo yi Tienu.»

e. Mi tiadima leni li pamanli daali

²³ O Diedo den maadi leni Musa, ki yedi:

²⁴ «Yedi Isidayeli yaaba: Cilele dakpiali baa yaa tie yi po fuodima daali. Yi baa piebi a naatuntuna, ki kpaani. Yi baa taani bi niba ki tieni taangagidikaali.

²⁵ Yi kan soani tuonpaaliba kuli, yi baa padi o Diedo po a padijuukaana.»

f. Ti tuonbiadi sugili miabu dacianli

²⁶ O Diedo den maadi leni Musa, ki yedi:

²⁷ «Cilele dapiiga daali, baa yaa tie ti tuonbiadi sugili miabu dacianli jaanma. Yi baa yini bi niba, ki tieni taangagidikaali. Yi baa loli yi ñoana, ki biidi yi pala ki padi o Diedo po a padijuukaana.

²⁸ Yi kan soani tuonliba kuli landaali, kelima li tie ti tuonbiadi sugili miabu daali, ban baa tieni yi po sugili o Diedo nintuali yaa daali.

²⁹ Yaa nilo n ki loli o ñoabu ki biidi o pali landaali, bi baa paadi ki ñani o o buolu nni.

³⁰ Yaa nilo n soani tuonliba landaali mo, n baa bolini o ki ñani o o buolu nni.

³¹ Yin da soani tuonliba kuli. Li tie yaa bali maama n kan pendi abada, nifiima n tuu nifiima po, yin baa n yaa ye naankani kuli.

³² Li baa yaa tie yaa fuodima daali n gagidi yi po, yi baa luo yi ñoana ki biidi yi pala. Mi jaanma yeni baa cili o ŋmaalo dayiali yaa yenjuagu, ki yaa caa hali yaa daali n ŋua yaa yenjuagu. Yi baa kubi laa fuodima daali jaanma.»

g. A suga jaanma

³³ O Diedo den maadi leni Musa, ki yedi:

³⁴ «Yedi Isidayeli yaaba: Cilele yeni yaa piiga n damuuli baa yaa tie a suga jaanma daali, o Diedo kpiagidi po, hali ki pundi danalele.

³⁵ Li dakpiali, yi baa taani ki tieni taangagidikaali, yi kan soani tuonpaaliba kuli.

³⁶ Hali danalele banlu, yi baa padi o Diedo po a padijuukaana. Li daniili, yi baa tieni taangagidikaali, ki padi o Diedo po a padijuukaana. Li baa yaa tie u badu juodima daali, yi kan soani tuonpaaliba kuli landaali.

h. Mi majuodikaama

³⁷ Lani n tie o Diedo n bili yi po yaa jaanma dana. Yin kpaani ki waani bi niba laa jaanma dana, ki tieni yaa taanli n gagidi ki ŋani, ki padi o Diedo po yaa pada n juu u mu nni, a padijuukaana, mi yanduanma pada, ti tuonbiadi sugili miabu pada leni a ñincaba buolu kuli. Yin padi padili kuli ban bili li yaa daali.

³⁸ Laa pada baa pugini yin padi o Diedo po ya mi fuodima dana, ke li tie yanbuama paabu bi li nianli padili.

³⁹ Cilele yeni piiga n damuuli, yi yaa taani ki gbeni yi kpaandi, yi baa jaani o Diedo po laa jaanma, hali danalele banlu. Li dakpiali baa yaa tie fuodima daali, li dajuodikaali moko n yaa tie fuodima daali.

⁴⁰ Li dakpiali, yi baa taa i tiŋami bonluonkaala ki yaa muubi leni ti kpakpadi leni yaa tiidi yaa faadi n yabi beni leni i kpentiidi beni. Yi baa mangidi yi pala o Diedo yi Tienu nintuali yeni, hali danalele.

⁴¹ Binli kuli, yi baa jaani laa jaanma ki yaa kpiagidi o Diedo, hali danalele. Li tie yaa bali maama n kan pendi abada yi nifiima kuli po. Yi baa jaani ma cilele yaa niinni.

⁴² Yi baa ña yi diena nni, ki yaa ye a suga nni, hali danalele. Isidayeli diema nni niba kuli baa ye a suga yeni niinni.

⁴³ Lani n tie yi puoliŋuani n bandi ke mini o Diedo n den teni ke Isidayeli yaaba den ye a suga nni, min den ñani yi Ejipiti diema nni yaa yogunu. N tie Li Miali Diedo yi Tienu.»

⁴⁴ Musa n den waani Isidayeli yaaba o Diedo jaanma dana, ke a tie maama n yeni.