Levi 21 - U TIENU MAAMA TILI 2013

Yaa bali maama n ye bi kopadicianba po a. Bi kopadicianba yema n baa yaa tie maama

¹ O Diedo den yedi Musa: «Waani bi kopadicianba, Alono bijaba yaa maama n tie ne: kopadiciamoba kan joagini o baa, kelima o buolu tinkpilo po.

² Li yàá tie yaaba n kuu leni o ki cie yaa ka, nani o naa, o baa, o bijua bi o bisalo,

³ yaa ka o naataanpuoga yua n tie puowandiali. O kuu leni o, kelima o daa kuni joa. O baa fidi ki joagini o baa kelima o po.

⁴ O tie o niba siiga yudaano, lan yaa po, o kan joagini o baa, kelima o baa cagini o yuli.

⁵ Bi kopadicianba mo kan kuo bi yudi, bi kan koagidi ki dagini bi langbiadi mo, bi kan badi bi gbanu po be.

⁶ Bi baa kubi bi yula ki gagidi ki yaa ŋani bi Tienu po. Bi kan fali bi Tienu yeli, kelima bi padi o Diedo po a padijuukaana, yaala n tie bi Tienu jiema yeni. Bi baa yaa gagidi ki ŋanbidi bi yula.

⁷ Bi kan taa yaa pua n tie puoconconli, bi yaa pua n joagini kuli. Bi kan taa puoñaka, kelima o kopadiciamo baa yaa gagidi ki ŋanbidi o baa o Tienu po.

⁸ A baa nua o kopadiciamo ke o tie nigagidiŋamo, kelima o padi yaa pada n tie a Tienu jiema. O baa yaa tie a po nigagidiŋamo, kelima n gagidi ki ŋani, mini Li Miali Diedo yua n gagidi ki ŋanbidi yi yeni.

⁹ O kopadiciamo bisalo yaa cagini ki tiendi mi conconma, o fiagi o baa yo. Bi baa juu o u mu wan kpe.

¹⁰ Yaa kopadiciamo n tie bi kopadicianba bado, ban den wuli mi sogima kpama yua yaa yuli po yeni, ki lani o yaa tiadi n gagidi ki gagidi o yeni, kan ŋaa o yudi tin yaa coa. O kan padi o tiadi mo.

¹¹ O kan nagini tinkpilo kuli. O kan joagini o baa, ba o baa bi o naa po.

¹² O kan ña u kaangagidiŋamu kani ki joagini o Tienu kaangagidiŋamu, kelima o den baa o Tienu gagidima kpama sogima. N tie Li Miali Diedo.

¹³ Bi kopadicianba bado yeni baa taa li puowandiali yo wan tua o pua.

¹⁴ O kan taa kpepuoli, puoñaka, yaa pua n cagini bi li puoconconli. O baa taa yaa puowandiali n ñani o yaa buolu nne, wan tua o pua.

¹⁵ Yeni, o kan kpiabi, ki cagini o puoliŋuani o buolu siiga, kelima n tie Li Miali Diedo yua n gagidi ki ŋanbi o.»

b. Yaa nilo n kan kua li kopadiciantuonli nni

¹⁶ O Diedo den maadi leni Musa, ki yedi:

¹⁷ «Yedi Alono: A puoliŋuani kuli siiga, yaa joa n pia poadi o gbanandi nni kuli, o kan nagini ki padi yaa pada n tie o Tienu jiema yeni, ba yaa yogu n tuu yaa yogu.

¹⁸ Yaa joa n pia poadoba kuli kan nagini. Lan tie juamo, diamo, miafadimi, bi yua yaa buadi bi o taana siiga bonyenla fuagi ki cie liyali,

¹⁹ bi yua yaa buagu bi o taali kua ki gbini,

²⁰ bi yaa joa n pia ki goliga, bi ki wodinga, bi yua yaa nunbu n biidi, bi li ŋmaali n cuo yua, bi mu calimu n cuo yua, bi yua yaa koncanbila n fadi. Laa jabuoli kuli kan tua kopadiciamo.

²¹ O kopadiciamo Alono puoliŋuani kuli siiga, yua n pia poadi o gbanandi nni, kan fidi ki padi yaa pada n buodi u mu nni, o Diedo po. O pia poadi o gbanandi nni, lani yaa po o kan nagini ki teni o Tienu o jiema.

²² Laa nibuolu fidi ki taani ki je o Tienu jiema, yaala n gagidi ki ŋani cain leni yaala n gagidi ki ŋani.

²³ Ama o kan nagini bu kpalidoaginkaabu, o kan nagini li padibinbinli kelima o pia poadi o gbanandi nni. O kan nagini ki joagini n kaangagidiŋamu. N tie Li Miali Diedo yua n gagidi ki ŋanbidi yi.»

²⁴ Musa den waani Alono leni o bijaba leni Isidayeli yaaba kuli laa maama.