Levi 20 - U TIENU MAAMA TILI 2013

Yaa pada n kua

¹ O Diedo den maadi leni Musa, ki yedi:

² «Ŋan waani Isidayeli yaaba yaa maama n tie ne: Isidayeli buolu yua, bi caano yua n kaa yi siiga, yaa padi o biga Moleki po, bi baa kpa li daano. Mi diema niba kuli baa taani ki lugidi o a tana ki kpa o.

³ Mini mo baa buli n nunga laa nilo po, ki paadi ki ñani o o buolu nni, kelima o den padi o biga Moleki po. O joagini n kaangagidiŋamu, ki biidi n yeli yaali n gagidi ki ŋani.

⁴ Li yaa tie ke mi diema niba cedi yaa nilo n padi o bila Moleki po yeni ki naa kpa o,

⁵ mini n ba, n baa buli n nunga laa nilo leni o niba kuli po, ki paadi ki ñani o o buolu nni, wani leni yaaba n ŋoadi o ki cagini bi yula ki ŋoadi Moleki.

⁶ O nilo yaa gedi yaa niba n maadi leni bi tinkpiba kani, bi a baayuadiida kani, ki cagini o yuli leni ba, n baa buli n nunga laa nilo po, ki paadi ki ñani o o buolu nni.

⁷ Yin gagidi ki yaa ŋani n po, kelima n tie Li Miali Diedo yi Tienu.

⁸ Yin yaa kubi n bali maama, ki yaa tiendi mikuli bonŋanla. N tie Li Miali Diedo yua n gagidi ki ŋanbidi yi.

⁹ Yaa nilo n soli o baa bi o naa kuli, bi baa kpa li daano. O soama baa guani ki jagini o yuli po, kelima o den soli o baa bi o naa.

¹⁰ Joa yaa conbi leni o lielo pua, o joa yua n conbi yeni leni o pua yua n conbi yeni kuli baa kpe.

¹¹ Joa yaa duani leni o baa pua, o laa o baa mubima. Laa joa leni laa pua kuli baa kpe, bi soama mo n guani ki jagini bi yula po.

¹² Joa yaa dua o biyuaga, bi baa kpa bani bonbilie yeni kuli, kelima bi tieni ti cagindi. Bi soama mo baa guani ki jagini bi yula po.

¹³ Joa yaa dua jatoa, nani o joa n dua o pua maama, bani bonbilie yeni kuli tieni cagini. Bi baa kpa ba, bi soama mo n guani ki jagini bi yula po.

¹⁴ Joa yaa taa pua leni o bisalo ke bi tua o puoba, li tie caginde. Bi baa juu ba u mu wani leni bi puoba yeni kuli, ban kpe. Yeni, laa cagindi kaa ye yi siiga.

¹⁵ Joa yaa taani leni ki yanga, bi baa kpa li daano. Bi go baa kpa ki yanga yeni mo.

¹⁶ Pua mo yaa nagini yanga ki taani leni ga, bi baa kpa o pua leni ki yanga yeni kuli. Bi baa kpa ba, bi soama n guani ki jagini bi yula po.

¹⁷ Joa yaa taa o naataanpuoga, lan tie o baa bisalo, bi o naa bisalo, ki laa o mubima, ke omo laa o yaa mubima, li tie yaa bonla n gundi. Bi baa paadi ki ñani ba bi buolu nni, kelima o joa yeni dua o naataanpuoga. Bi baa tugi bi tuonbiadi panpaani.

¹⁸ Joa yaa dua pua o ŋmaalo nni, bi baa paadi ki ñani bani bonbilie yeni kuli bi buolu nni, kelima bi taani ki juogi ki laa o soama n ña naani.

¹⁹ A kan le a naa naataanpuoga mubima bi a baa naataanpuoga mubima, kelima a yiedi ki sieni fini leni yua n kpi bonŋanla mubima. Yaaba n tieni laa bonla kuli, baa gaa bi tuonbiadi panpaani.

²⁰ Joa yaa dua o baa kpelo bi o waalo, o laa o puoli mubima. Bi baa tugi bi tuonbiadi panpaani. Bi baa kpe ki naa mali bila.

²¹ Joa yaa taa o kpelo bi o waalo pua, li tie yaala n gundi. O laa o kpelo bi o waalo mubima, bi baa kpe ki naa mali bila.

²² Yin yaa kubi n bali maama kuli leni n ñoamabonbilikaana kuli. Yin yaa tiendi likuli ke min caani yi yaa diema nni, yin baa n yaa ye yaama yaa niinni yeni, n da yie yi.

²³ Yin da togidi min baa deli yaa nibuoli yi kani yeni tuada, kelima bi den tiendi laa bonla buoli kuli. N yama ñani bi niinni.

²⁴ N den yedi yi: ‹Yinba n baa diedi bi diema, N puni yi yin yaa die ma. Mi tie mi naaŋanma leni ti siadi n dua yaa diema nni.› N tie Li Miali Diedo yi Tienu yua n den gagidi ki ñani yi i nibuoli siiga.

²⁵ Lani yaa po, yin gagidi ki paadi yaa yandi n ŋani leni yaa yandi n joagini, ki paadi yaa nuani n ŋani leni yii n ki ŋani. Yin da joagini yi baa leni ti yandi, i nuani leni yaala n balini tiipo kuli, min den tuodi ki bili ki waani ke yaaba n joagini yeni.

²⁶ Yi baa yaa tie n po bi nigagidiŋanba, kelima mini Li Miali Diedo gagidi ki ŋani. N den gagidi ki ñani yi i nibuoli nni, ke yin yaa tie n yaaba.

²⁷ Joa, yaa ka pua, yua n baa fidi ki maadi leni bi tinkpiba, bi ki bu ku baagu, bi baa kpa o. Bi baa lugidi o a tana ki kpa o. Laa niba soama baa guani ki jagini bi yula po.»