Levi 19 - U TIENU MAAMA TILI 2013

U Tienu n bua ban yaa kpiagidi o maama

¹ O Diedo den maadi leni Musa, ki yedi:

² «Maadi leni Isidayeli yaaba nitaanli kuli ki yedi ba: Yi baa gagidi ki yaa ŋani kelima mini Li Miali Diedo yi Tienu, gagidi ki ŋani.

³ Yuakuli n fangi o naa leni o baa, ki kubi n fuodima dana ki gagidi a. N tie Li Miali Diedo yi Tienu.

⁴ Yin da lebidi ki ŋoadi tienfaama. Yin da duadi buliba leni ti kudi. N tie Li Miali Diedo yi Tienu.

⁵ Yi yaa baa cua ki padi o Diedo po mi taanyenma padili, tieni mani maama ke o baa fidi ki gaa yi po.

⁶ Yi baa ŋmani ki padiyanga yeni yin cua ki padi ga yaa daali, bi li yaa fii ki faa. Yaala n sieni hali li dataali daali, yi baa juu la u mu nni.

⁷ Yi yaa ŋmani la li dataali daali, li tie yaa bonla n ki dagidi. O Diedo kan gaa yi paabu.

⁸ Yua n ŋmani yeni, o baa gaa o tudima panpaani, kelima o fali ki joagini yaa bonla n gagidi o Diedo po. Bi baa paadi ki ñani laa nilo o buolu nni.

⁹ Yi yaa ye yi diema nni u jetaagu yogunu, yi baa ŋaa poyendu yi kuanu nni, ki da yendi lipo. Yin da yendi yaala n sieni mi liegima po.

¹⁰ Ŋan da goa ki cie yaala n sieni a duven tiidi bonluonkaala nni, ki da goa ki wodi yaala n suodi ki baa. A baa ŋaa lani o luodo leni o caano po. N tie Li Miali Diedo yi Tienu.

¹¹ Yin da su. Yin da pua yi lieba po faama, ki da boandi yiyaba mo.

¹² Yin da pua faama ki poli n yeli nni, kelima yi baa biidi yi Tienu yeli. N tie Li Miali Diedo.

¹³ Ŋan da mabini a yieninlielo. Ŋan da su, ŋan da kubi a tuonsoanlo panpaani a kani, ke li yaa faa yo ŋan pa o.

¹⁴ Ŋan da soli womo, ŋan da bili bontuudikaala o juamo nintuali, ke wan tuudi ki baa. Ama a baa yaa fangi a Tienu. N tie Li Miali Diedo.

¹⁵ Ŋan da jia yaa buudi n ki tiegi, ŋan da fali nilo, ŋan da jagi ke a baa todi o luodo, bi ŋan go da jagi ke a baa todi o piado mo li bujiali nni. Ama a baa jia a yieninlielo buudi nani lan tiegi maama.

¹⁶ Ŋan da tieni bu tingbangbaabu a buolu yua po. Ŋan da kuli a lielo ban kpa o fanma fanma. N tie Li Miali Diedo.

¹⁷ Ŋan da nani a kpiilo a pali nni. Li pundi ŋan tundi a lielo o tudima po. Lani n tie ŋan da ti tugi tuonbiadi kelima o po.

¹⁸ Ŋan da tuu li panli. Ŋan da pia li koanfaali a buolu nilo po. Ama ŋan bua a lielo nani ŋan bua a yuli maama yeni. N tie Li Miali Diedo.

¹⁹ Yin yaa kubi n ñoamabonbilikaana. Ŋan da teni yanbuolilie, yii n ki taa n do biyaba. Ŋan da coagi bonbuolilie a kuanu nni. Ŋan da yie gaalibuolilie tiayiekaagu.

²⁰ Joa yaa conbi leni puotuado ke o bi pia togibaa, ama ke bi daa bi daa ki faabi o, bi baa faligi ba, ama bi kan kpa ba, kelima o pua daa den faabi.

²¹ Ama o joa yeni baa taa petonli ki cuani li u Kadikaanu Gbandieli buliñoabu kani, o tudima po.

²² O kopadiciamo baa mia o po sugili o Diedo nintuali. O baa padi o po li petonli yeni, lin tua mi tudima padili, kelima o joa yeni n tieni yaa tuonbiadi po. Yeni o joa yeni baa baa o tuonbiadi sugili.

²³ Yi yaa kua mi diema nni yaa yogunu, ki ŋuu lienni yaa tiidi n luoni kuli, yi baa nua yi bonluonkaala ke li naani leni yaa nilo n ki kua ku koanciagu yeni, hali binataa. Yi kan ŋmani la.

²⁴ Li binnaali wani, i tiidi yeni kuli bonluonkaala baa gagidi o Diedo pagidi po.

²⁵ Lanwani, li binmuuli yi baa ŋmani i tiidi yeni bonluonkaala, ki yaa cenli yi yi yula po. N tie Li Miali Diedo yi Tienu.

²⁶ Yin da ŋmani liba kuli leni mi soama. Yin da gedi lingima, ki da bu baagu mo.

²⁷ Yin da koagidi yunianu, ki da koagidi ki dagini yi langbiadi mo.

²⁸ Yin da badi yi baa i be, o tinkpilo po. Yin da tuu tuu yi gbanu po mo. N tie Li Miali Diedo.

²⁹ Ŋan da cagini a bisalo ki teni wan tua puoconconli ki joagini o, ke mi diema n da ti joagini mi yuli ki gbie leni ti cagindi.

³⁰ Yin yaa kubi mani n fuodima dana, ki yaa fangi n kaangagidiŋamu. N tie Li Miali Diedo.

³¹ Yin da lingi mi lingima, yin da ŋoadi ma, kelima laa bonla baa joagini yi. N tie Li Miali Diedo yi Tienu.

³² Nikpeyukobipiendi yaa cua, ŋan fii ki sedi ki fangi o. Ŋan jigini o jakpelo. A baa fangi a Tienu. N tie Li Miali Diedo.

³³ Caano yaa cua ki kali yi diema nni, yin da janbidi o.

³⁴ Yin yaa nua yaa caano n kaa yi siiga, nani u dogu maabiga yua n ye yi siiga yeni. Yin bua o nani yin bua yi yula maama, kelima yimoko den tie canbe Ejipiti diema nni. N tie Li Miali Diedo yi Tienu.

³⁵ Yin da tieni janbi li bujiali nni, bi u foaginu yaa bonbiigikaala nni, bi u kpiagu yaa bonbiigikaala nni, bi u yabinu yaa bonbiigikaala nni.

³⁶ Yin yaa kubi mani u kpiagu bonbiigikaala yaala n tiegi, efa yua n tiegi, hini yua n tiegi. N tie Li Miali Diedo yi Tienu yua n den ñani yi Ejipiti diema nni.

³⁷ Yin yaa kubi mani n bali maama leni n ñoamabonbilikaana kuli, ki go tieni likuli bonŋanla. N tie Li Miali Diedo.»