Levi 18 - U TIENU MAAMA TILI 2013

Yaa fangili n baa ye joa leni pua siiga

¹ O Diedo den yedi Musa:

² «Yedi Isidayeli yaaba: N tie Li Miali Diedo yi Tienu.

³ Yin da tieni mani yaala n tiendi Ejipiti diema nni, yin den ye naani. Yin da tieni yaala n tiendi Kanana diema nni, min caani yi naani. Yin da ŋoadi bi tuada.

⁴ Yin yaa tiendi mani n ñoamabonbilikaana, ki yaa ŋua n bali maama, ki faami likuli po. Mini n tie Li Miali Diedo yi Tienu.

⁵ Yin yaa kubi n bali maama leni n ñoamabonbilikaana. Yaa nilo n kubi ki tiendi likuli, baa yaa ye kelima li yaa po. N tie Li Miali Diedo.

⁶ Oba kuli n da taani leni wan kpi leni yaa pua. N tie Li Miali Diedo.

⁷ Ŋan da le a baa mubima bi a naa mubima, kelima o tie a naa. A kan le o mubima.

⁸ A kan le a baa pua mubima. Li tie a baa mubima.

⁹ A kan le a naataanpuoga mubima, yua n tie a baa bisalo bi a naa bisalo, bi yaa mali o a diegu nni, bi bi yaa mali o kaanto.

¹⁰ A kan le a bijua bisalo mubima, bi a bisalo yaa bisalo mubima, kelima li tie fini a ba yaa mubime.

¹¹ A kan le a baa bisalo mubima, a baa n mali yua kelima yikuli taa baa yo.

¹² A kan le a baa kpelo bi o waalo yua n tie pua mubima, kelima wani leni a baa kpi bonŋanla.

¹³ A kan le a naa kpelo bi o waalo yua n tie joa mubima, kelima wani leni a naa kpi bonŋanla.

¹⁴ A kan le a baa kpelo pua bi o waalo pua mubima, kelima bi tie a naanba.

¹⁵ A kan le a biyuaga mubima. Li tie a bijua pua yo. Lani yaa po, a kan le o mubima.

¹⁶ A kan le a kpelo pua bi a waalo pua mubima. Li tie a kpelo bi a waalo yaa mubime.

¹⁷ A kan le pua leni o bisalo mubima. A kan taa o bijua bisalo bi o bisalo yaa bisalo ki le bi mubila, kelima bi kpi bonŋanla. Li tie caginde.

¹⁸ A kan taa a pua waalo, ki fiini o kpelo nunponli. A kan le o mubima hali ke a pua da ye.

¹⁹ Ŋan da nagini yaa pua n ye o ŋmaalo nni, wan joagini yaa yogunu ki le o mubima.

²⁰ Ŋan da dua a lielo pua. Ŋan da taani leni o ki joagini.

²¹ Ŋan da pa a bila siiga ba yendo, ban lu o u mu nni ki padi o, o bulo Moleki po. Ŋan da cagini a Tienu yeli. N tie Li Miali Diedo.

²² Ŋan da duani leni joa nani ban baa duani leni o pua maama, li tie caginde.

²³ Ŋan da duani leni yanga ki joagini a baa leni o. Pua mo n da nagini yanga, ki teni kan duani leni o. Li tie caginde.

²⁴ Yin da joagini yi baa leni laa bonla kuli ba bonyenla, kelima min baa deli yaa diema ki pa yi ma yeni, den joagini mi baa leni laa bonla buolu.

²⁵ Mi niba den joagini bi diema yeni kuli. N baa pa mi diema yeni mi biadima panpaani. Mi baa sii ki ñani ba mi niinni.

²⁶ Yin yaa kubi mani n bali maama leni n ñoamabonbilikaana kuli. Yin da tieni laa cagindi buoli ba yenma. Ba u dogu maabiga, ba yaa caano n kaa yi siiga n da tieni la,

²⁷ kelima lani n tie yaa niba n den kpa ye laa diema nni, n den kpa tiendi yaa cagindi buolu, hali ke mi diema kuli mo den cagini.

²⁸ Yeni, mi diema kan sii yi kelima yi joagindi po, nani man baa sii ki ñani yaa nibuoli n den ye likani ke yi daa cua maama yeni.

²⁹ Yaa niba n tieni laa cagindi buoli siiga ba bonyenla, bi baa paadi ki ñani ba bi yaa niba siiga.

³⁰ Yin yaa kubi n bali maama. Yin da tieni laa cagindi siiga ba bonyenla, yaala n den tiendi ke yi daa cua. Yin da joagini yi baa leni laa bonla. N tie Li Miali Diedo yi Tienu.»