Levi 17 - U TIENU MAAMA TILI 2013

Yaa bali maama n ye mi gagidiŋanma po 17—26 Yaa bali maama n bili mi soama po

¹ O Diedo den yedi Musa:

² «Waani Alono, o bijaba leni Isidayeli yaaba kuli yaa maama n tie ne: Diidi mani o Diedo n bili yaala:

³ Isidayeli nilo yaa bua ki kodi nua, pebiga bi ŋuabo li nagili nni, bi niinpo,

⁴ o da baa cuani o u Kadikaanu Gbandieli buliñoabu kani, lan tua paabu o Diedo po, o gbandieli buliñoatuogili kani. O yàá tieni yeni, o pia mi soama wulima tagili, kelima o wuli mi soama. Bi baa paadi ki ñani o o buolu nni.

⁵ Laa bali maama teni ke Isidayeli yaaba kaa ji padi bi pada bi kuani nni, ama bi baa kpendinni bi padiyandi o Diedo nintuali, ki tendi o kopadiciamo u Kadikaanu Gbandieli buliñoabu kani.

⁶ O kopadiciamo yeni baa wuli mi soama o Diedo padibinbinli po, u Kadikaanu Gbandieli buliñoabu kani. O baa juu mi kpama man tua yaa nuulu n mani o Diedo po.

⁷ Yeni, bi kan go padi, ban den cagini bi yula ki ŋoadi yaa buli yeni po. Li baa yaa tie yaa bali maama n kan pendi abada, bani leni bi puoliŋuani kuli po.

⁸ Lanwani, ŋan yedi ba: Isidayeli nilo, bi yaa caano n kaa bi siiga, yaa padi padijuukaali bi paditoali,

⁹ ki naa cuani u Kadikaanu Gbandieli buliñoabu kani, ki padi o Diedo po, bi baa paadi ki ñani laa nilo o buolu nni.

¹⁰ Li yaa tie ke Isidayeli buolu yua, yaa ka yaa caano n kaa bi siiga ŋmani mi soama, ba lan tie yaa soabuolu kuli, n baa buli o n nunga, ki paadi ki ñani o o buolu nni,

¹¹ kelima gbanandi kuli miali ye mi soama nne. N puni yi ma, ke man yaa ye li padibinbinli po, ke man pa yi sugili ki faabi yi miana, kelima li tie li miali po yo, ke mi soama puuni ti tuonbiadi sugili.

¹² Li tie lani yaa po yo ke n yedi Isidayeli yaaba: Yi siiga niloba kuli n da ŋmani soama. Yaa caano n kaa yi siiga mo n da ŋmani soama.

¹³ Li yaa tie Isidayeli buolu yua, bi yaa caano n kaa bi siiga yaa gedi fuagoadu ki cuo yanga, bi ban ŋmani yaa nuanga, o baa wuli ki soama tiipo, ki tigi ki piini ma leni mi tama,

¹⁴ kelima gbanandi kuli miali n tie ti soama yaama n ye ti niinni. Li tie lani yaa po yo ke n yedi yinba Isidayeli yaaba, yin da ŋmani gbananbuoluba kuli soama, kelima gbanandi kuli miali n tie ti soama. Yua n ŋmani ma kuli, bi baa paadi ki ñani o o buolu nni.

¹⁵ Lan tie yaa nilo kuli, u dogu maabiga bi caano, yua n ŋmani yankpienga, bi moayanga n toadi toadi yaa yanga, baa ŋuudi o tiadi ki wali ki yaa ye leni o joagindi hali ku yenjuagu. Li yaa puoli, o baa ŋanbi.

¹⁶ O yàá ŋuudi o tiadi ki wali, o tagili baa tugi o yuli po.»