Levi 16 - U TIENU MAAMA TILI 2013

Ti tuonbiadi sugili miabu dacianli bali maama

¹ O Diedo den maadi leni Musa, Alono bijaliediba yaaba n den kua o Diedo nintuali ki kpe yeni kuuma puoli po.

² O den yedi Musa: «Waani a kpelo Alono, ke wan da koa u kaangagidiŋanmoanu nni yogunu kuli. Wan da kandi bu kpalidoaginkaabu ki pundi ku ŋantaadikpaku leni ku biili yaali n gagidi yeni kani. Yeni yaa ka o baa kpe, kelima n baa doagidi lankani li biili yeni po, ku tawaligu nni.

³ Diidi Alono n baa fidi ki kua u kaangagidiŋamu nni maama nne: O baa baa li naatonli ti tuonbiadi sugili miabu padili po leni li petonli li padijuukaali po.

⁴ O baa la li kopadician-badiliadili yaali n tie len, ki yaa soali yaa kpataali n tie len, ki ñagini yaa cabiñaginkaali n tie len, ki fini yaa finfingu n tie len. O baa yie o kopadiciamo tiayiegagidikaadi kuli, ama se wan kpa wali hali bonŋanla.

⁵ Lanwani, Isidayeli nitaanli yaaba kuli baa teni o ŋuabuanalie, i candanbaani padili po leni petonyenli li padijuukaali po.

⁶ Alono baa kpa padi li naatonli ti tuonbiadi sugili miabu padili po, ki mia sugili o yuli po leni o diegu yaaba kuli po.

⁷ Li ya puoli, Alono baa taa a ŋuabualieda yeni, ki sieni a o Diedo nintuali u Kadikaanu Gbandieli buliñoabu kani.

⁸ O baa toa tiatia a ŋuabualieda yeni po, ki bandi wan baa taa yua o Diedo po leni wan baa taa yua Asaseli po.

⁹ Alono baa taa tiatia n cuo yaa ŋuabuali o Diedo po yeni, ki padi li ti candandi po.

¹⁰ Ban toani tiatia ki li cuo yaa ŋuabuali ke li tie Asaseli po yeni, bi baa taa li ke li fo ki sieni o Diedo nintuali ti tuonbiadi sugili miabu po. Bi baa yuandi ki gedini li mi fanpienma nni, ki deli ki yaani li, lin bodi cain.

¹¹ Alono baa padi o naatonli ti tuonbiadi sugili miabu po leni o diegu nni yaaba kuli po. O baa kodi o naatonli ti tuonbiadi sugili miabu po.

¹² Lani, o baa taa ku fantanpientiagu ke ku gbie leni yaa mukuana n ñani yaa padibinbinli n se o Diedo nintuali yeni yuli po leni a dugibila yaa yoma nukulalie. O baa taa lani kuli ki kua u Kadikaanu Gbandieli nni ki kandi bu kpalidoaginkaabu,

¹³ ki tieni a dugibila a mukuanmoana po o Diedo nintuali, yaa muñii n pia u nuulumanu baa n pini ku ŋantaadikpaku biili yeni yuli. Lani n tie wan da kpe.

¹⁴ Li yaa puoli, o baa tuu li naatonli soama leni o nubili, ki mii mii ma ku kpaku biili nintuali, naankani n tiegi puoli po yeni. O baa tuu mi soama leni o nubili, ki mii ma taalimilele ku kpaku biili nintuali.

¹⁵ O baa kodi ti tuonbiadi sugili miabu ŋuabuali bi niba po, ki taa li soama ki kandi bu kpalidoaginkaabu ki kua. O baa tieni laa soama mo nani wan bi tieni maama leni li naatonli yaa soama yeni. O baa mii mi soama ku kpaku biili po leni li nintuali.

¹⁶ O baa tieni yeni ki mia sugili u kaangagidiŋamu po, kelima Isidayeli yaaba joagindi, bi biadima leni bi tuonbiadi kuli po. O baa tieni yeni leni u Kadikaanu Gbandieli, yaali n ye leni ba, bi joagindi nni.

¹⁷ Alono yaa kua u kaangagidiŋamu nni ki baa mia sugili yaa yogunu, oba kuli kan yaa ye u Kadikaanu Gbandieli nni, hali wan baa ña. O baa padi ki mia sugili wani o ba leni o diegu yaaba kuli po leni Isidayeli nitaanli kuli po.

¹⁸ O baa ña yaa padibinbinli n se o Diedo nintuali yeni kani, ki mia sugili li padibinbinli po. O baa taa li naatonli yeni leni li ŋuabuali yeni soama, ki duuni ma li padibinbinli yina po leni li lindima kuli.

¹⁹ O baa mii li padibinbinli po taalimilele leni o nubili, ti tuonbiadi sugili miabu soama. O baa gagidi ki ŋanbi li, kelima Isidayeli yaaba yeni joagindi po.

²⁰ Alono yaa tieni ti tuonbiadi sugili miabu padili u kaangagidiŋanmoanu po, u Kadikaanu Gbandieli po leni li padibinbinli po kuli ki gbeni, o baa teni ban cuani yaa ŋuabuali n fo yeni.

²¹ Alono baa maani o niliedi li ŋuabuafuodili yeni yuli po, ki togidi Isidayeli yaaba tagili, bi biadima leni bi tuonbiadi kuli. O baa maani likuli li ŋuabuali yeni yuli po, ki teni ban gedini li mi fanpienma nni. Lani, o baa teni li, yua n baa deli ki yaani li mi fanpienma nni.

²² Li ŋuabuali baa tugi laa tagili kuli ki gedi ki tinkuonga nni. Bi baa deli ki gedini li mi fanpienma nni.

²³ Li yaa puoli, Alono baa kua u Kadikaanu Gbandieli nni, ki landi wan bi la len tiadi yaadi yeni kuli, ki kua u kaangagidiŋamu nni, ki bili ti kuli lankani.

²⁴ O baa wali yaa kaanu n gagidi nni, ki la o tiafandi. Li puoli, o baa ña ki padi wani o ba yaa padijuukaali leni o niba yaa padijuukaali. O baa mia sugili wani o ba leni o niba kuli po.

²⁵ O baa juu ti tuonbiadi padiyanga yeni kpama li padibinbinli po.

²⁶ Yua n deli ki yaani Asaseli ŋuabuali yeni, baa ŋuudi o tiadi ki wali, lani n tie wan fidi ki kua li nagili nni.

²⁷ Lani, bi baa taa ti tuonbiadi padili naatonli leni li ŋuabuali yeni nandi, ki ñani li nagili nni. Li tie ban den gedini yaa yandi yaa soama u kaangagidiŋamu nni, ki baa sugili. Bi baa juu ki buoni ti nandi, ti gbandi leni ti nuadi kuli.

²⁸ Yua n juu ki buoni ti padiyandi yeni baa ŋuudi o tiadi, ki wali. Lani, o baa fidi ki guani ki kua li nagili nni.

²⁹ Line n tie yaa bali maama n kan pendi abada. Cilele dapiiga, yi baa loli yi ñoana, ki waani yi yula fala. Yi kan soani tuonliba kuli, ba u dogu maabiga, bi yaa caano n kaa yi siiga kan soani tuonliba kuli,

³⁰ kelima li tie landaale ke bi baa mia yi po sugili ki ŋanbi yi. Yi baa baa mi ŋuudima yi tuonbiadi kuli po, ki yaa ŋani o Diedo nintuali.

³¹ Landaali baa yaa tie yi po fuodima daali. Yi baa loli yi ñoana, ki waani yi yula fala. Li tie yaa bali maama n kan pendi abada.

³² Yaa kopadiciamo n baa baa mi gagidima sogima, ban baa gagidi yua wan lebidi o baa li kopadiciantuonli nni yeni, wani n baa mia yi po sugili landaali. O baa la yaa tiayiekaadi n tie len, tini yaadi n tie tiagagidikaadi yeni.

³³ O baa mia sugili u kaangagidiŋamu po, u Kadikaanu Gbandieli po leni li padibinbinli po. O baa mia sugili bi kopadicianba kuli po leni li nitaanli kuli po.

³⁴ Li baa yaa tie yi po yaa bali maama n kan pendi abada. O baa padi ti tuonbiadi sugili miabu padili binli kuli yenma, kelima Isidayeli yaaba yaa tuonbiadi po.» Bi den tieni o Diedo n den waani Musa yaala kuli.