Levi 14 - U TIENU MAAMA TILI 2013

O gbaado ŋanbima

¹ O Diedo den maadi leni Musa, ki yedi:

² «Diidi o gbaado ŋanbima daali yaa bali maama. Yi baa yini o, wan cua o kopadiciamo kani.

³ O kopadiciamo baa ña li nagili nni ki tuogi o, ki biigi o.

⁴ O kopadiciamo baa teni ban taa yua n baa ŋanbi yeni po, noanfuodilie yii n ŋani cain, sediri tiidi daadi, i gaalimoani leni isope beni.

⁵ O kopadiciamo baa waani o, wan taa ti tandi tiagu ki tieni mi ñinpuubikaama, ki nan taa noanyenga ki kodi ka ti tandi tiagu yeni niinni.

⁶ Lani, o baa taa yaa nuanga n fo yeni, i gaalimoani, sediri daagu leni isope benu ki tuuni ban kodi yaa nuanga mi ñinpuubikaama po soama nni.

⁷ O baa taa mi soama ki mii hali taalimilele yua n bi pia mi gbaadima, ke bi bua ki ŋanbi o yeni po. Lani yaa pendi, o baa doagidi ki waani ke o ŋani. O baa ŋaa yaa nuanga n sieni i kuani nni.

⁸ Ban ŋanbi yaa nilo yeni baa ŋuudi o tiadi kuli, ki kuo o gbanu po kobidi kuli, ki wali. Yeni, o baa ŋanbi. Li yaa puoli, o baa fidi ki kua li nagili nni. O kan fidi ki kua o gbandieli nni, danalele yàá tuoni.

⁹ Li daleleeli, o go baa kuo o yudi leni o langbiadi, o nungbaakobidi leni yaa kobidi n ye o gbanu po kuli, o baa ŋuudi ki wali, yeni o baa ŋanbi.

¹⁰ Li daniili, o baa taa pebilalie leni binli pesalo, yaaba n ki pia poadi, ki cuani yaa yoma n kali leni mi kpama, kilo bonbiyia leni mi kpama litidi boagidima.

¹¹ Yaa kopadiciamo n baa padi mi ŋanbima padili baa taa yaa nilo n bua ki ŋanbi yeni n cuani yaa bonla kuli, ki cua ki sieni o Diedo nintuali, u Kadikaanu Gbandieli buliñoabu kani.

¹² O kopadiciamo baa taa pebiyenga ki padi ga mi tudima padili po. O baa taa mi kpama litidi boagidima leni ki pebiga yeni, ki tieni yaa bogidili n doagidi ke o teni la U Tienu.

¹³ O baa kodi ki pebiga yeni ban padi ti tuonbiadi pada leni a padijuukaana naankani, yaa kaanu n gagidi ki ŋani nni. O tieni yeni, kelima mi tudima padili leni ti tuonbiadi sugili miabu padili padiyanga yeni tie o kopadiciamo yaa biinu yo. Li tie yaa bonla n gagidi ki ŋani cain.

¹⁴ O kopadiciamo baa taa mi tudima padili soama yeni, ki gedi ki duuni ma wan ŋanbi yua yaa jientubifaagu po, ki go duuni ma o jiennubijali po leni o jientajenbijali po.

¹⁵ Lani, o kopadiciamo baa ñani mi kpama litidi boagidima yeni niinni, ki cabi ma o gannupuogu nni.

¹⁶ O baa tuu o jiennubili yaa kpama n ye o nupuogu nni yeni, ki mii taalimilele o Diedo nintuali.

¹⁷ Li yaa puoli, o kopadiciamo baa ñani yaa kpama n sieni leni o nubili, ki duuni wan baa ŋanbi yua yeni yaa jientubifaagu po, o jiennubijali po leni o jientajenbijali po, wan bi duuni mi tudima padiyanga yaa soama naankani yeni.

¹⁸ Yaa kpama n sieni o kopadiciamo nupuogu nni yeni, o baa duuni ma wan ŋanbidi yua yeni yuli po. O tieni yeni o Diedo nintuali, ki bua ki mia o po sugili o tudima po.

¹⁹ Lanwani, o kopadiciamo baa padi ti tuonbiadi sugili miabu padili, ki mia sugili, wan ŋanbi yua joagindi po. Lani yaa pendi, o baa kodi li padijuukaali yanga.

²⁰ O kopadiciamo baa padi li padijuukaali po, ki go padi bu paabu padili. Yeni, o baa mia sugili o joa yeni po. Lani, o baa ŋanbi cain.

Yaa gbaado n tie luodo ŋanbima

²¹ O nilo yeni yaa tie luodo ki naa pia yaala n dagidi, o baa cuani pebiyenga, yaaga n baa tua o tudima padili. Bi baa tieni yaa bogidili n doagidi ke bi teni ga o Diedo, ki padi ki mia sugili o tuonbiadi po. O baa cuani yaa yonŋanma n kali leni mi kpama, kilo bonbitaa bebe, lan tua mi jiema paabu leni mi kpama litidi boagidima.

²² O go baa cuani kpaajefanmulie bi kpaajenawuundilie, nani o paalu n da maama. Yenga baa tua ti tuonbiadi sugili miabu padili, ki liega mo n tua li padijuukaali.

²³ Li daniili, o baa taa ki cuani laa paabu kuli ki teni o kopadiciamo o ŋanbima po, ki nan yaa se u Kadikaanu Gbandieli buliñoabu kani o Diedo nintuali.

²⁴ O kopadiciamo baa taa mi kpama litidi boagidima leni mi tudima padili yaa pebiga, ki tieni yaa bogidili n doagidi ke o teni U Tienu.

²⁵ O baa kodi mi tudima padili pebiga yeni, ki taa mi soama ki duuni ma, yua n bua ki ŋanbi yeni jientubifaagu po, o jiennubijali po leni o jientajenbijali po.

²⁶ Li yaa puoli, o kopadiciamo baa taa mi kpama litidi boagidima yeni, ki cabi ma o gannupuogu nni,

²⁷ ki tuuni o nubili mi kpama yeni niinni, ki mii taalimilele o Diedo nintuali.

²⁸ O baa ñani mi kpama leni o nubili, ki duuni ma yua n bua ki ŋanbi yeni jientubifaagu po, o jiennubijali po leni o jientajenbijali po, wan bi kpa tieni mi tudima padili soama naankani yeni.

²⁹ Yaa kpama n sieni o kopadiciamo nupuogu nni yeni, o baa duuni ma yua n bua ki ŋanbi yeni yuli po. Lani n tie wan mia o po sugili o tudima po o Diedo nintuali.

³⁰ Lanwani, o kopadiciamo baa taa mu kpaajefanmu bi ti kpaajenawuundi yeni siiga yendo, ki padi o wan tua ti tuonbiadi sugili miabu padili.

³¹ O go baa padi o lielo, wan tua li padijuukaali. Yeni, o kopadiciamo baa mia sugili o Diedo nintuali yaa nilo n bua ki ŋanbi yeni po.»

³² Lani n tie yaala n bili yaa gbaado n luo kaa pia yaala n dagidi, ŋanbima po.

Li dieli goana po lega

³³ O Diedo den maadi Musa leni Alono ki yedi:

³⁴ «Yi yaa kua Kanana, min baa pa yi yaa diema yeni niinni, n yaa pua nilo dieli leni mi gbaadima lega,

³⁵ yua n die li dieli yeni baa gedi o kopadiciamo kani ki yedi o: ‹N laa yaa bonla n naani leni mi gbaadima legili n dieli po.›

³⁶ Hali ke o kopadiciamo daa kua ki diidi li dieli yeni, o baa teni ban kpa ñani yaa tiadi n ye li dieli kuli nni, ke yaala n ye lienni n da joagini. Lani, o kopadiciamo baa kua ki diidi li dieli legili bonŋanla.

³⁷ O kopadiciamo baa diidi li legili yeni. O yaa laa li goanli yeni po ke li legili moani, yaa ka ke li tie waanuama, ke li legili kani mo mia,

³⁸ o baa ña lienni ki luoni bu buliñoabu hali danalele.

³⁹ Li daleleeli, o kopadiciamo go baa guani ki diidi li bonŋanla. O yaa laa ke li legili yeni talini li dieli goanli po,

⁴⁰ o baa teni ban ñani yaa tana n pia a lega yeni, ki ban lu hali u dogu niinpo, ti joagindi kaanu.

⁴¹ O go baa teni ban koadi ki ñani li dieli tugu nni boalima kuli, ki wodi mi tama yeni kuli ki ñani ma niinpo, ki wuli ma ti joagindi kaanu.

⁴² Bi baa taa tantoana ki tieni a tankpiala kaanu, ki buuni ti tansoangidi ki boali li dieli kuli.

⁴³ Ama bi yaa sua ke u yianu yeni go fii ki tieni a lega li dieli nni,

⁴⁴ o kopadiciamo go baa guani ki diidi li bonŋanla. O yaa laa ke a lega yeni talini boncianla li dieli po, li tie yaa gbaadima yaa buoli n puodi. Li dieli yeni joagini.

⁴⁵ Bi baa mudi ki bolini li dieli yeni, li tana, li daadi leni li tama kuli, ki tugi ki ñani likuli u dogu niinpo, ki gedini ti joagindi kaanu.

⁴⁶ Yaa nilo n den kua laa dieli nni lin lo yaa yogunu, baa yaa ye leni o joagindi hali ku yenjuagu.

⁴⁷ Yaa nilo n den duani laa dieli nni bi ki dini lienni kuli, baa ŋuudi o tiadi.

⁴⁸ Ama o kopadiciamo yaa guani ki kua li dieli nni ki diidi li bonŋanla ki laa ke a lega yeni naa talini, ban den boali li yeni yaa puoli po, o baa doagidi ki waani ke li dieli yeni ŋani, kelima li legili yeni bodi.

⁴⁹ Li dieli yeni ŋanbima po, o kopadiciamo baa gaa nuanilie, sediri daadi, i gaalimoani leni isope beni.

⁵⁰ O baa kodi noanyenga ki yini ka ti tandi tiagu po, mi ñinpuubikaama nni.

⁵¹ O baa taa sediri daagu, i gaalimoani, isope beni leni yaa nuanga n fo yeni, ki tuuni ban kodi yaa nuanga yeni soama nni, ki mii taalimilele li dieli goana po.

⁵² Wan kubi yaala ki ŋanbi li dieli yeni tie ki nuanga soama, mi ñinpuubikaama, yaa nuanga n fo, sediri daagu, isope benu leni i gaalimoani.

⁵³ O baa ŋaa ki noanfuodiga u dogu niinpo i kuani nni. Yeni n tie wan baa ŋanbi li dieli yeni maama, ke li baa ŋanbi.»

⁵⁴ Lani n tie yaala n bili ti naabisinkuadi po, mi gbaadima po,

⁵⁵ ti tiayiekaadi po, a diena lega po, mi moalima po, mu calimu po leni a lega po.

⁵⁶ Laa bali maama bangi bi niba ti joagindi n ye yaa yogunu leni mi ŋanbima n ye yaa yogunu.

⁵⁷ Lani n tie mi gbaadima yaa bali maama.