Levi 11 - U TIENU MAAMA TILI 2013

Yaala n joagini leni yaala n ki joagini bali maama 11—16 Yaa yandi n ŋani leni yaa yandi n joagini

¹ O Diedo den maadi Musa leni Alono ki yedi ba:

² «Waani mani Isidayeli yaaba yaa maama n tie ne: Diidi mani ki tinga nni yandi, yin baa ŋmani yaadi:

³ Yi baa fidi ki ŋmani yaa yanga n pia mi taabadima, ki ŋmani ki bugidi.

⁴ Ama yi kan ŋmani yaa yandi n ŋmani ki bugidi bebe, bi yaa yandi n pia mi taabadima bebe. Yeni yaa po, yin da ŋmani yaa yandi n tie ne: Ku yuoyuogu, ku ŋmani ki bugidi, ama ku naa pia taabadima. Yi baa yaa nua ku ke ku joagini.

⁵ Li joamabili, li ŋmani ki bugidi, ama li naa pia taabadima. Yi baa yaa nua li ke li joagini.

⁶ Ki jakpewonga yaaga n ŋmani ki bugidi, ki naa pia taabadima, yi baa yaa nua kani moko ke ki joagini.

⁷ O duolo pia mi taabadima, ama waa ŋmani ki bugidi. Yi baa yaa nua o ke o joagini.

⁸ Yin da ŋmani laa yandi nandi, yin da sii li yankpiendi mo. Yi baa yaa nua ti ke ti joagini.

⁹ Yaa bonfuoda n ye mi ñima nni, yin baa yaa ŋmani yaaba nne: Yi baa ŋmani yaa jami n pia yaala n todi ba ke bi dugi, ki go pia a poaga kuli.

¹⁰ Ama yaa bonfuodibila n ye mi ñincianma nni leni i kpeni kuli nni ki dugi, bi ki balini kuli, ki naa pia yaala n todi ba ke bi dugi leni a poaga, yi baa yaa nua ba ke bi tie yi po kuali.

¹¹ Bi baa yaa tie yi po kuali, yin da ŋmani bi nandi. Yi baa yaa nua laa bonfuoda tinkpila moko ke bi tie yi po kuali.

¹² Yaala n ye mi ñima nni, ki naa pia yaala n todi ba ke bi dugi leni poaga kuli, baa yaa tie yi po kuali.

¹³ I nuani siiga, yii n baa yaa tie yi po kuali, ke yi kan ŋmani yi nne: O yobilo, ku kaciigu, koasinkoanli

¹⁴ li kafenli, a puakenleda leni yaaba n tie bi yaa buolu kuli.

¹⁵ Li kankali leni li yaa buoli kuli.

¹⁶ Ku tataagu, li juuli, mi ñincianma nni yaa kafengu, ki kafenga leni ki yaa buolu kuli.

¹⁷ Ku juugu, ñindugijanboandi leni ki juubalikpendiga.

¹⁸ Li yienli, jeebugi leni ku kulijaŋmaangu.

¹⁹ Goliya, o kpenjanlondo leni yaaba n tie o yaa buolu kuli, ciliboe leni ti janjandi.

²⁰ Yaa bonfuodibila n pia i fiabi ki yugi, ki go cuoni taananaa ki tinga po kuli, baa yaa tie yi po kuali.

²¹ Ama yaa bonfuodibila n pia i fiabi, ki cuoni taananaa kuli siiga, yi baa fidi ki ŋmani yaaba n cuoni taananaa ki pia taafoagidalie, ki dobili tiipo.

²² Yeni yaa po, yi baa fidi ki ŋmani yaa bonbuoli n tie ne: i naaci, a tobiñaana leni bi yaa buoli kuli.

²³ Yaa bonfuoda n sieni ki pia i fiabi ki yugi ki go cuoni taananaa kuli, baa yaa tie yi po kuali.

O nilo n baa sii yaala lan joagini o

²⁴ Ti yantiandi siima baa fidi ki joagini yi. Yaa nilo n sii li bonkpienla, o baa yaa ye leni o joagindi hali ku yenjuagu.

²⁵ Yua n tugi li bonkpienla, o baa ŋuudi o tiadi kuli ki yaa ye leni o joagindi hali ku yenjuagu.

²⁶ Yaa yandi n naa pia taabadima ki naa ŋmani ki bugidi kuli, yi baa yaa nua ti ke ti joagini. Yua n sii ti kuli baa joagini o baa.

²⁷ Yaa yandi n cuoni taananaa ki tie taacubidi kuli, yi baa yaa nua ti ke ti joagini. Yua n sii laa yankpiendi kuli baa yaa ye leni o joagindi hali ku yenjuagu.

²⁸ Yua mo n tugi laa yankpienga baa ŋuudi o tiadi, ki yaa ye leni o joagindi hali ku yenjuagu. Yi baa yaa nua laa yandi kuli ke ti tie yi po joagindi.

²⁹ Diidi mani yaa bonfuoda n balini tiipo siiga, yin baa yaa nua yaaba ke bi joagini: Li soali, o dapolo, i dabunbuoli kuli,

³⁰ li badili, li sadimadili, li kunkuli, o yua leni o kankanminatuolo.

³¹ Yi baa yaa nua laa bonla kuli ke li tie yi po joagindi. Laa bonfuoda buoli kuli siiga, yua n sii li bonkpienla kuli baa yaa ye leni o joagindi hali ku yenjuagu.

³² Laa bonfuoda kpiema yaa baa yaala yaa po kuli, laa bonla moko baa joagini, li yaa tie yaa tiagu n tie daadi, tiayiekaagu, gbangu, kpalipiagu, ba ŋan kubi yaa tiagu a tuonli po, a baa yaa nua ke ku joagini. A baa baa mi ñima ki ŋuudi ku. Ku baa yaa ye leni ku joagindi hali ku yenjuagu. Li yaa pendi, ku baa ŋanbi.

³³ Yaala n kpie tandi tiagu nni, ke li baa lipo, laa bonla baa joagini. Yi baa mudi laa tiagu.

³⁴ Li ñima n wuli yaa jiema po kuli baa joagini. Yaa bonñokaala n kua laa tiagu nni kuli baa joagini.

³⁵ Laa bonfuoda kpiema yaa baa yaa tiagu po, li yaa tie dupenpuakaanu, bi fanu, yi baa mudi la tiagu, kelima ku joagini. Yi baa yaa nua la ke li joagini.

³⁶ Ama li yaa tie ke o baa ñinbunli bi caana nni, mi ñima n yabi naani, laa ñima baa yaa ŋani. Ama yaa nilo n sii laa bonkpienla kuli, o baa joagini o baa.

³⁷ Laa bonkpienla yaa baa bonbuoli nni, yi baa yaa ŋani.

³⁸ Ama nilo yaa wogini bonbii ñima nni, ke laa bonkpienla baa lienni, yi baa yaa nua laa bonbii ke yi joagini.

³⁹ Yin ŋmani yaa yanbuoli yaa niinni yanga yaa kpe, yua n sii ki yankpienga yeni, baa yaa ye leni o joagindi hali ku yenjuagu.

⁴⁰ Yaa nilo n ŋmani laa yankpienga baa ŋuudi o tiadi ki yaa ye leni o joagindi hali ku yenjuagu. Yua mo n taa ki ñani ki yankpienga yeni baa ŋuudi o tiadi ki yaa ye leni o joagindi hali ku yenjuagu.

⁴¹ A bonfuoda yaaba n fuli bi tugidi po kuli, baa yaa tie yi po kuali. Yi kan tuo ki ŋmani ba.

⁴² Yi kan ŋmani yaa bonfuoda n balini tiipo, yaaba n fuli bi tugidi po, yaaba n cuoni ki pia taananaa, bi ki pia a taana boncianla kuli, kelima bi tie yi po kuali.

⁴³ Yin da tuo ki joagini yi yula leni yaa bonfuoda n balini ki tinga po yeni. Yin da tuo ban joagini yi.

⁴⁴ N tie Li Miali Diedo yi Tienu, yi baa gagidi ki ŋanbidi yi yula, ki yaa ŋani cain, kelima n gagidi ki ŋani cain. Yin da joagini yi baa leni yaa bonfuoda n balini tiipo yeni.

⁴⁵ N tie Li Miali Diedo yua n den teni ke yi ñani Ejipiti diema nni, ke min yaa tie yi Tienu. Yi baa gagidi ki ŋanbidi yi yula, kelima n gagidi ki ŋani.»

⁴⁶ Lani n tie min bili yi po yaala ti yandi, ti bonyugiditi, mi ñima nni bonfuoda leni yaa bonfuoda n balini tiipo kuli po.

⁴⁷ Yeni yi baa fidi ki gagidi ki bandi yaala n joagini leni yaala n ŋani, yin baa ŋmani yaa yandi leni yin kan ŋmani yaadi paadima.