Levi 10 - U TIENU MAAMA TILI 2013

O Diedo mu juu ki kpa Alono bijaba

¹ Alono bijaba, Nadabi leni Abihu den taa ti fantantiadi, yuakuli yengu yengu, ki padi u mu ki maani lipo tulale. Bi den kuani u mulamu u Kadikaanu Gbandieli nni o Diedo nintuali, o Diedo n den kuani ba yaala.

² Lanyogunu, u mu den ñani o Diedo nintuali ki juu ki buoni ba. Bi den kpe lankani o Diedo nintuali.

³ Musa den yedi Alono: «U Tienu o Diedo den tuodi ki waani yi lane wan den yedi: ‹N bua ke yaa niba n nagidi nni n yaa fangi n gagidiŋanma, ki kpiagi nni bi niba kuli nintuali.› » Alono den ŋmini suo.

⁴ Lani, Musa den yini Mikayeli leni Elisafani, Alono baa naataanu Usieli bijaba, ki yedi ba: «Nagini mani ki taa yi kpiiba yeni ki ñani ba li nagili nni, ki foagidi ba leni u kaangagidiŋamu.»

⁵ Bi den nagini ki taa a tinkpila yeni leni bi liada ki ñani ba li nagili nni, nani Musa n den yedi ba maama.

⁶ Musa den yedi Alono leni o bijaba Eleasari leni Itamari: «Yin da ŋaa yi yudi ki kan ŋanbi ti, yin da padi yi tiadi ki doagidi ke yi ye leni mi kuuma paboanli. Yeni yaa ka, yi baa kpe, ki go fiini o Diedo pali li nitaanli kuli po. Cedi mani yi kpiiba, Isidayeli yaaba kule n mua i kumoe o Diedo n teni ke u mu kpa yaaba yeni po.

⁷ Yin da fuadi mani u Kadikaanu Gbandieli buliñoabu kani, yeni yaa ka yi baa kpe. Yi bani ke ban wuli yi po yaa kpama yeni gagidi yi o Diedo po.» Bi den tieni Musa n waani ba yaala.

Li dañoli yaa bali maama

⁸ O Diedo den maadi leni Alono ki yedi o:

⁹ «Yi yaa baa kua u Kadikaanu Gbandieli nni, fini leni a bijaba n da ño duven bi dabiadimiba kuli. Yeni, yi kan kpe. Laa bali maama baa yaa ye hali yaa yogunu kuli, yinba leni yi puoliŋuani po.

¹⁰ Yeni, yi baa fidi ki gagidi yaala n gagidi leni yaala n ki gagidi, ki gagidi yaala n joagini leni yaala n ŋani cain,

¹¹ ki bangi Isidayeli yaaba o Diedo n den puogi Musa ke o bili yi po yaa bali maama kuli.»

Ti padinandi bali maama

¹² Musa go den maadi leni Alono leni o bijaliediba yaaba n sieni, Eleasari leni Itamari ki yedi ba: «Yin taa mani ban ñani yaala a padijuukaana padijiedi nni, ke dabinli ki ye lienni, ki je li padibinbinli kani, kelima mi tie yaa bonla n gagidi ki ŋani cain.

¹³ Yi baa je ma yaa kaanu n gagidi. Li tie fini leni a bijaba yaa biinu, ban baa padi ki juu yaa pada o Diedo nintuali kuli siiga. Lani n tie o Diedo n den waani nni maama.

¹⁴ Li bengunli leni li panli kuli, ban tieni li bogidili, ki waani ke bi teni yaa nandi o Diedo, fini, a bijaba leni a bisiaba n die, yi baa ŋmani ti yaa kaanu n gagidi. Isidayeli yaaba n puuni yaa taanyenma pada kuli siiga, li tie fini leni a bijaba biinu.

¹⁵ Isidayeli yaaba baa cuani ban baa juu ki buoni yaa kpama. Bi baa cuani ma leni li panli leni li bengunli, o kopadiciamo n baa taa yaala ki tieni yaa bogidili n doagidi ke o teni la U Tienu. O yaa tieni lani ki gbeni, laa nandi baa yaa tie fini leni a bijaba yaa biinu. Li tie yaa bali maama n baa yaa ye hali yaa yogunu kuli, ki yaa caa hali yi puoliŋuani, nani o Diedo n den bili maama.»

¹⁶ Musa den lingi i candanbaani padiŋuabuali yeni nandi, ki sua ke bi juu ki buoni ti cain. O pali den beni Alono bijaba Eleasari leni Itamari po.

¹⁷ O den yedi ba: «Be yaa po ke yii ŋmani i candanbaani padiyanga yeni nandi yaa kaanu n gagidi nni? Li tie yaa bonla n gagidi ki ŋani cain. O Diedo den puni yi laa bonla ke yin ñani li nitaanli tagili, ki go mia bi po sugili o Diedo nintuali.

¹⁸ Diidi, yii kuani ki padiyanga yeni soama u kaangagidiŋamu tugu nni. Lanwani, yi bi baa ŋmani ti nandi yeni u kaangagidiŋamu nni, nani min den puogi yi maama.»

¹⁹ Alono den guani ki yedi Musa: «Diidi, dinla bi bi padi bi candandi padili leni bi padijuukaali o Diedo nintuali. Ama yaa bonla n bi tieni nni dinla ne, n yaa bi ŋmani i candanbaani padinandi yeni, naani li bi baa mangi o Diedo?»

²⁰ Musa den gbadi mi maama yeni, ki sua ke mi tiegi.